ഗസ്സയിലെ വെടിനിർത്തൽ: ചർച്ചക്ക്​ അരങ്ങൊരുങ്ങുന്നു

ദുബൈ: യു.എൻ രക്ഷാസമിതി പാസാക്കിയ പ്രമേയം അടിസ്​ഥാനമാക്കി ഗസ്സയിലെ വെടിനിർത്തൽ ചർച്ചക്ക്​ ഉടൻ അരങ്ങൊരുങ്ങും. സമഗ്ര വെടിനിർത്തലും സൈനിക പിൻമാറ്റവും വ്യവസ്​ഥ ചെയ്യുന്ന ഏതൊരു നിർദേശത്തോടും തങ്ങൾ അനുകൂലമാണെന്ന്​ ഹമാസും ഇസ്​ലാമിക്​ ജിഹാദും മധ്യസ്​ഥ രാജ്യങ്ങളെ രേഖാമൂലം അറിയിച്ചു.

കരാർ വ്യവസ്​ഥകൾ നടപ്പാക്കാനും ആക്രമണത്തിൽനിന്ന്​ ഇസ്രായേലിനെ പൂർണമായി പിന്തിരിപ്പിക്കാനും വ്യക്​തമായ ​ഫോർമുല ഉണ്ടാകണമെന്ന ഭേദഗതി നിർദേശവും ഹമാസും ഇസ്​ലാമിക്​ ജിഹാദും ഉന്നയിച്ചു. ഈജിപ്​ത്​, ഖത്തർ എന്നീ മധ്യസ്​ഥ രാജ്യങ്ങൾക്ക്​ കൈമാറിയ ​കത്തിലാണ്​ ഈ ആവശ്യം.

ഹമാസിന്റെ അനുകൂല പ്രതികരണം ലഭിച്ചതായി ഈജിപ്​ത്​ വിദേശകാര്യ മന്ത്രാലയം സ്​ഥിരീകരിച്ചു. ഹമാസ്​ പ്രതികരണം ഉചിതമായി വിലയിരുത്തി തുടർ നടപടികളിലേക്ക്​ നീങ്ങുമെന്ന്​ അമേരിക്ക അറിയിച്ചു.

എത്രയും പെ​ട്ടെന്ന്​ വെടിനിർത്തൽ യാഥാർഥ്യമാക്കാനും ഗസ്സയിലേക്ക്​ സഹായം ഉറപ്പാക്കാനും എല്ലാ നടപടികളും സ്വീകരിക്കുമെന്ന്​ യു.എസ്​ വിദേശകാര്യ സെക്രട്ടറി ആൻറണി ബ്ലിൻകൻ പറഞ്ഞു. ഫലസ്​തീൻ ക്ഷേമത്തിനായി പുതുതായി 404 ദശലക്ഷം ഡോളർ കൂടി അനുവദിക്കുമെന്നും ബ്ലിൻകൻ വെളിപ്പെടുത്തി.

മൂന്ന്​ ഘട്ടങ്ങളിലായി നടപ്പാക്കാൻ വ്യവസ്​ഥ ചെയ്യുന്ന അമേരിക്ക മുന്നോട്ടുവെച്ച വെടിനിർത്തൽ കരാർ സംബന്ധിച്ച്​ ഇസ്രായേൽ നേതാക്കളുമായി ആൻറണി ബ്ലിൻകൻ ഇന്നലെ വിശദമായ ചർച്ച നടത്തി. പ്രതിപക്ഷ നേതാവ്​ യായിർ ലാപിഡ്, മുൻമന്ത്രി ബെന്നി ഗാൻറ്​സ്​​ ഉൾപ്പെടെയുള്ളവരുടെ പിന്തുണയും ബ്ലിൻകൻ തേടി.

അതേസമയം, തീവ്രവലതുപക്ഷ മന്ത്രിമാരായ ബെൻ ഗവിർ, സ്​മോട്രിക്​ എന്നിവരെ മന്ത്രിസഭയിൽനിന്ന്​ മാറ്റിനിർത്താൻ ബ്ലിൻകൻ നെതന്യാഹുവിനോട്​ നിർദേശിച്ചതായും റിപ്പോർട്ടുണ്ട്​. ബന്ദിമോചനം ഉൾപ്പെടെയുള്ള ലക്ഷ്യങ്ങളാണ്​ പ്രധാനമെന്നും യുദ്ധാന്തര ഗസ്സയുടെ ഭരണം ഉൾപ്പെടെയുള്ള കാര്യങ്ങളിൽ പിന്നീട്​ ചർച്ചയാകാമെന്നുമാണ്​ ബ്ലിൻകൻ നെതന്യാഹുവിനെ ധരിപ്പിച്ചതെന്നാണ്​ വിവരം​.

ബെന്നി ഗാൻറ്​സ്​, ഗാഡി ഈസൻകോട്ട്​ എന്നിവരുടെ രാജി നെതന്യാഹു സർക്കാറിനെ ഉലച്ചിട്ടുണ്ട്​. അമേരിക്കയുടെ ശക്​തമായ ഇടപെടലുണ്ടായിട്ടും ഗസ്സയിലെ വെടിനിർത്തൽ നീക്കത്തോട്​ പരസ്യമായി പ്രതികരിക്കാൻ നെതന്യാഹു വിസമ്മതിക്കുകയാണ്​. അതിനിടെ, ദക്ഷിണ ലബനാനിൽ നിന്നുള്ള ഹിസ്​ബുല്ലയുടെ വ്യാപക മിസൈൽ ആക്രമണം ഇസ്രായേലി​ന്​ തിരിച്ചടിയാകുന്നുണ്ട്.