ഗസ്സയിൽ അടിയന്തര വെടിനിർത്തൽ വേണമെന്ന യു.എൻ ആവശ്യം തള്ളി അമേരിക്ക; കൊല്ലപ്പെട്ടവർ 17,490 ആയി

ഗസ്സയിൽ അടിയന്തര വെടിനിർത്തൽ വേണമെന്ന യു.എൻ സെക്രട്ടറി ജനറലിന്റെയും രക്ഷാസമിതിയുടേയും ആവശ്യം തള്ളി അമേരിക്ക. യു.എസ്​ നിലപാട്​ കാരണം 55 രാജ്യങ്ങളുടെ പിന്തുണയോടെ യു.എ.ഇ കൊണ്ടുവന്ന കരട്​ പ്രമേയം രക്ഷാസമിതിയിൽ പാസായില്ല. ഇസ്രായേൽ ആക്രമണം കടുപ്പിച്ചതോടെ ഗസ്സയിൽ മരണം 17,490 ആയി.

യുദ്ധം മൂന്നാം മാസത്തിലേക്ക്​ കടന്നതോടെ ഗസ്സയിലെ മാനുഷിക ദുരന്തത്തിന്​ പരിഹാരം തേടിയാണ്​ യു.എൻ രക്ഷാസമിതി ഇന്നലെ വീണ്ടും യോഗം ചേർന്നത്​. ഗസ്സയിൽ അടിയന്തര വെടിനിർത്തലിന് ആഹ്വാനം ചെയ്യുന്ന കരട്​ പ്രമേയം യു.എ.ഇയാണ്​ കൊണ്ടുവന്നത്​. 55 രാജ്യങ്ങളുടെ പിന്തുണയും ഇതിനുണ്ടായിരുന്നു. ചൈന, റഷ്യ, ഫ്രാൻസ്​ ഉൾപ്പെടെ വൻശക്തി രാജ്യങ്ങളും പ്രമേയത്തെ പിന്തുണച്ചു.

എന്നാൽ നിലവിൽ വെടിനിർത്തൽ ഉണ്ടായാൽ ഹമാസിനാകും ഗുണം ചെയ്യുകയെന്ന്​​ യു.എന്നിലെ യു.എസ് പ്രതിനിധി റോബർട്ട് വുഡ് അറിയിച്ചു. ഹമാസ് ഇസ്രായേലിന് ഭീഷണി ആയതിനാൽ വെടിനിർത്തലിന് സമയപരിധി വയ്ക്കാൻ ഇസ്രായേലിനെ നിർബന്ധിക്കാനാവില്ലെന്നും അദ്ദേഹം പറഞു.

ഗസ്സയിൽ കൊല്ലപ്പെട്ടവരിൽ 7,870 പേർ കുട്ടികളും 6,121 പേർ സ്​ത്രീകളുമാണ്​. പട്ടിണി പിടിമുറുക്കുന്ന സാഹചര്യമാണ് ഗസ്സയിൽ ഉള്ളതെന്ന്​ യു.എൻ സെക്രട്ടറി ജനറൽ ആന്റണിയോ ഗുട്ടറസ് പറഞ്ഞു​. ആരോഗ്യ സംവിധാനം അപ്പാടെ തകർന്നതായി വിവിധ യു.എൻ ഏജൻസികളും വ്യക്തമാക്കുന്നു. ഇന്നലെയും വ്യാപക വ്യോമാക്രമണമാണ്​ ഗസ്സയിലുടനീളം തുടർന്നത്​.

ഖാൻ യൂനുസിലും മറ്റും ശക്തമായ ചെറുത്തുനിൽപ്പ്​ തുടരുന്നതായി അൽ ഖസ്സാം ബ്രിഗേഡ് പറയുന്നു​. ബന്ദിയായ ഇസ്രായേൽ സൈനികനെ മോചിപ്പിക്കാനുള്ള ഇസ്രായേൽ നീക്കം പരാജയപ്പെടുത്തിയെന്നും അൽഖസ്സാം ബ്രിഗേഡ്​. ഓഫീസർ ഉൾപ്പെടെ രണ്ട്​ സൈനികർ കൊല്ലപ്പെട്ടതായി ഇസ്രായേൽ സൈന്യം സ്ഥിരീകരിച്ചു

അതിനിടെ അധിനിവിഷ്ട വെസ്റ്റ് ബാങ്കിൽ ആറ് ഫലസ്തീനികൾ ഇസ്രായേൽ വെടിവെപ്പിൽ കൊല്ലപ്പെട്ടു. തുബാസിന് സമീപം അൽ ഫറ അഭയാർഥി ക്യാമ്പിലാണ് അക്രമം. ലബനാനിൽ​ നിന്നുള്ള മിസൈൽ ആക്രമണത്തിൽ സിവിലിയൻമാർ കൊല്ലപ്പെട്ട പശ്ചാത്തലത്തിൽ ഹിസ്ബുല്ലയ്ക്ക് മുന്നറിയിപ്പ് നൽകി ഇസ്രായേൽ പ്ര​ധാന​മന്ത്രി ബിന്യമിൻ നെതന്യാഹു രം​ഗത്തെത്തി.

അതേസമയം, ഹമാസ്​ പോരാളികളെന്ന പേരിൽ സാധാരണക്കാരെ അറസ്റ്റ്​ ചെയ്ത്​ അടിവസ്​ത്രം മാത്രം ധരിപ്പിച്ച്​ പീഡിപ്പിക്കുന്ന ദൃശ്യങ്ങൾ അറബ്​ ലോകത്തും പുറത്തും വ്യാപക പ്രതിഷേധത്തിനിടയാക്കി. വടക്കൻ ഗസ്സയിൽ നിന്ന് പിടികൂടിയ നൂറോളം വരുന്ന ഫലസ്തീനികളെയാണ് അടിവസ്ത്രം മാ​ത്രം ധ​രിക്കാൻ അനുവദിച്ച് കൈകൾ ബന്ധിച്ച് കുനിച്ചിരുത്തിയത്. ഫലസ്തീൻ മാധ്യമ​പ്രവർത്തകൻ ദിയഅൽ കഹ്‍ലൂ​തും ഇവരിൽ ഉൾ​പ്പെടുന്നുണ്ട്​. തടവുകാരോടുള്ള ഇസ്രായേലിന്റെ പെരുമാറ്റം ഞെട്ടിക്കുന്ന​തും രണ്ടാം ലോക​യുദ്ധ​കാലത്തെ ഓർമിപ്പിക്കുന്നതുമാണെന്ന് വിവിധ പൗരാവകാശ സംഘടനകൾ കുറ്റപ്പെടുത്തി.