ആഴ്ചകൾക്കുശേഷം വടക്കൻ ഗസ്സയിലേക്ക് ആദ്യ സഹായമെത്തി

ദുബൈ: ഖത്തറിൽ വെടിനിർത്തൽ കരാർ ചർച്ച ഊർജിതമായി തുടര​വെ, ആഴ്​ചകൾക്കുശേഷം വടക്കൻ ഗസ്സയിലേക്ക്​ ആദ്യ സഹായമെത്തി. താൽക്കാലിക വെടിനിർത്തൽ കരാറിനു വേണ്ടി തിരക്കിട്ട ചർച്ചകൾ തുടരുന്നതായി അമേരിക്ക അറിയിച്ചു. ബന്ദികളുടെ മോചനവും ഗസ്സയിൽ സഹായം എത്തിക്കലും പ്രസിഡൻറ്​ ജോ ബൈഡ​െൻറ പ്രധാന മുൻഗണനയെണെന്ന് വൈറ്റ്​ ഹൗസ് വ്യക്തമാക്കി. എന്തൊക്കെ തിരിച്ചടികൾ ഉ​ണ്ടായാലും വെടിനിർത്തൽ നടപ്പാക്കുമെന്നും വൈറ്റ്​ ഹൗസ്​ കൂട്ടിച്ചേർത്തു.

തിങ്കളാഴ്​ചയോടെ വെടിനിർത്തൽ കരാർ യഥാർഥ്യമാകുമെന്ന്​ കഴിഞ്ഞ ദിവസം ജോ ബൈഡൻ വെളിപ്പെടുത്തിയിരുന്നു. ഖത്തറിൽ ഇസ്രായേൽ, ഹമാസ്​ നേതൃത്വവുമായി പല തലങ്ങളിൽ ചർച്ച തുടരുകയാണ്​.

എന്നാൽ ഈ ഘട്ടത്തിൽ ചർച്ചയുടെ പുരോഗതി വെളിപ്പെടുത്താൻ മധ്യസ്​ഥ രാജ്യങ്ങളായ ഖത്തറും ഈജിപ്​തും വിസമ്മതിച്ചു.വടക്കൻ ഗസ്സയിൽ ഇന്നലെ ചെറിയ തോതിൽ സഹായം എത്തിക്കാനായത്​ പ്രതീക്ഷ പകരുന്നുണ്ട്​. ജനുവരി 23നാണ്​ ഇവിടേക്ക്​ അവസാനമായി യു.എൻ സഹായം എത്തിയത്​. പട്ടിണി പിടിമുറുക്കിയതു കാരണം ജനങ്ങൾ ചെടികളും മറ്റും കഴിക്കേണ്ട സ്​ഥിതിയിലാണ്​. പട്ടിണിയെ തുടർന്ന്​ നാല്​ കുട്ടികൾ മരിച്ചതായും ഗസ്സ ആരോഗ്യവകുപ്പ്​ അറിയിച്ചു.

വടക്കൻ ഗസ്സയിലേക്കും മറ്റും​ കൂടുതൽ സഹായം ഉടൻ എത്തിക്കണമെന്ന്​ ഖത്തറും ഫ്രാൻസും സംയുക്​ത പ്രസ്​താവനയിൽ ആവശ്യപ്പെട്ടു. വടക്കൻ ഗസ്സയിൽ നിലവിലുള്ള ഏക ആശുപത്രിയായ കമാൽ അദ്​വാന്റെ പ്രവർത്തനം നിലച്ചതായി അധികൃതർ വെളിപ്പെടുത്തി.

അതിനിടെ, ഗസ്സയിൽ ഹമാസ് ബന്ദികളാക്കിയവരെ മോചിപ്പിക്കണമെന്നാവശ്യപ്പെട്ട് ബന്ധുക്കളുടെയും അവരെ അനുകൂലിക്കുന്നവരുടെയും നാലുദിവസം നീളുന്ന മാർച്ചിന്​ തുടക്കമായി. തെക്കൻ ഇസ്രായേലിൽനിന്ന് ജറൂസലമിലേക്കാണ് മാർച്ച്.

അൽ അഖ്​സ പള്ളിയുടെ ചുമതലയിൽനിന്ന്​ മന്ത്രി ബെൻ ഗവിറിനെ ഒഴിവാക്കിയതായി ഇസ്രായേൽ മാധ്യമങ്ങൾ റിപ്പോർട്ട്​ ചെയ്​തു. അൽ അഖ്​സ പള്ളിയിൽ വിശുദ്ധ മാസത്തിൽ മുസ്​ലിംകളെ വിലക്കണമെന്ന ബെൻഗവിറിന്റെ പ്രസ്​താവനക്കെതിരെ പ്രതിഷേധം ശക്​തമായിരുന്നു. ഗസ്സയുടെ വിവിധ ഭാഗങ്ങളിൽ ഇസ്രായേൽ ആക്രമണത്തിൽ ഇന്നലെയും നൂറോളം പേർ കൊല്ലപ്പെട്ടു.

ഹമാസി​െൻറ അപ്രതീക്ഷിത ആക്രമണത്തിൽ ഗിവാറ്റി ബ്രിഗേഡിന്റെ 432-ാം 'സബർ' ബറ്റാലിയൻ കമ്പനി കമാൻഡറും പ്ലാറ്റൂൺ കമാൻഡറും കൊല്ലപ്പെട്ടത്​ വലിയ തിരിച്ചടിയാണെന്ന്​ ഇസ്രായേൽ സൈനിക വക്​താവ്​ പ്രതികരിച്ചു. പ്ലാറ്റൂണിലെ ഏഴ് സൈനികർക്ക് പരിക്കേൽക്കുകയും ചെയ്​തു. ഗസ്സ സിറ്റിയിലെ സെയ്‌തൂൻ പരിസരത്തുള്ള കെട്ടിടത്തിലായിരുന്നു സൈന്യത്തിനെതിരെ ഹമാസിന്റെ സ്ഫോടനം.