ശശി തരൂരും കേരളത്തിലെ കോൺഗ്രസും ഏറ്റുമുട്ടുമ്പോൾ

നയതന്ത്രജ്ഞനും രാഷ്ട്രീയ നേതാവും പ്രശസ്ത എഴുത്തുകാരനുമായ ശശി തരൂർ 2026 ലെ അടുത്ത നിയമസഭാ തിരഞ്ഞെടുപ്പിന് ശേഷം കേരളത്തിന്റെ മുഖ്യമന്ത്രിയായേക്കും. ഈ സാധ്യത ഉറക്കം കളയുന്നത് ഇടതുപക്ഷത്തേക്കാൾ കൂടുതൽ കോൺഗ്രസ് നേതാക്കളുടെയാണ്. ഒക്ടോബറിൽ കോൺഗ്രസ് പ്രസിഡന്റ് തിരഞ്ഞെടുപ്പിൽ ഔദ്യോഗിക സ്ഥാനാർത്ഥി മല്ലികാർജുൻ ഖാർഗെക്കെതിരെ വീരോചിതമായി പരാജയപ്പെട്ടതിന് ശേഷം, തരൂർ തന്റെ ശ്രദ്ധ സ്വന്തം സംസ്ഥാനത്തേക്ക് തിരിച്ചിരിക്കുകയാണ്. തിരുവനന്തപുരത്ത് നിന്ന് മൂന്ന് തവണ പാർലമെന്റ് അംഗമായ അദ്ദേഹം നവംബർ 20 ന് വടക്കൻ കേരളത്തിൽ നാല് ദിവസത്തെ പര്യടനം ആരംഭിച്ചു. ജവഹർലാൽ നെഹ്റു, മതേതരത്വം തുടങ്ങിയ തന്റെ പ്രിയപ്പെട്ട വിഷയങ്ങളിൽ നിരവധി യോഗങ്ങളിൽ സംസാരിച്ചു. തന്റെ രാഷ്ട്രീയവും സാമൂഹികവും സാംസ്കാരികവുമായ മണ്ഡലങ്ങളെ അലങ്കരിക്കുക എന്നതായിരുന്നു തരൂരിന്റെ പ്രചാരം എന്ന് വ്യക്തം. എം.ടി. വാസുദേവൻ നായരെപ്പോലുള്ള സഹസാഹിത്യകാരന്മാരെ സന്ദർശിച്ച അദ്ദേഹം മുസ്ലിംലീഗ് നേതാക്കളോടും കത്തോലിക്കാ സഭാ മേധാവികളോടും കൂടിക്കാഴ്ചകൾ നടത്തി. ശക്തമായ നായർ സംഘടനയായ നായർ സർവീസ് സൊസൈറ്റി വാർഷികാഘോഷത്തിന് മുഖ്യാതിഥിയായി അദ്ദേഹത്തെ ക്ഷണിച്ചിട്ടുണ്ട്.

അടുത്ത മുഖ്യമന്ത്രി സ്ഥാനാർഥിയായി അവകാശവാദം ഉന്നയിക്കാനുള്ള പ്രചാരണമായി തരൂരിന്റെ 'പ്രഭാഷണ പര്യടനം' കണ്ട് സംസ്ഥാന കോണ്ഗ്രസ് നേതാക്കൾ അദ്ദേഹത്തിനെതിരെ ശക്തമായി രംഗത്തെത്തിയിട്ടുണ്ട്. തരൂരിന്റെ ആദ്യ യോഗം കോഴിക്കോട്ട് പ്രഖ്യാപിച്ച യൂത്ത് കോൺഗ്രസ് സംസ്ഥാന കോൺഗ്രസ് നേതൃത്വത്തിന്റെ നിർദേശത്തെ തുടര്ന്നാണ് പിൻവാങ്ങിയത്. ആവേശഭരിതരായ യുവ കോൺഗ്രസ് പ്രവർത്തകരുടെ പിന്തുണയോടെയാണ് യോഗം ചേർന്നതെങ്കിലും കോഴിക്കോട് എം.പിയും കടുത്ത തരൂരിന്റെ വിശ്വസ്തനുമായ എം.കെ. രാഘവൻ മാത്രമാണ് ചടങ്ങിൽ പങ്കെടുത്തത്. എന്നാൽ, മുസ്‌ലിം ലീഗ് മലപ്പുറത്തെ സയ്യിദ് സാദിഖലി ശിഹാബ് തങ്ങളുടെ വീട്ടിൽ ശശി തരൂരിനെ ഊഷ്മളമായി സ്വാഗതം ചെയ്തു. മുസ്‌ലിം ലീഗ് ഏറ്റവും വിശ്വസ്ത സഖ്യകക്ഷിയായതിനാൽ കോൺഗ്രസ് നേതാക്കൾ ഈ നീക്കത്തിൽ ആശങ്കയിലായി.

കരുണാകരനെയും ആന്റണിയെയും ചെന്നിത്തലയെയും ചാണ്ടിയെയും പോലുള്ള നേതാക്കളുടെ സാന്നിധ്യം ഉപയോഗിച്ച് ഹിന്ദു, ക്രിസ്ത്യൻ നേതാക്കളുമായി അടുത്തകാലം വരെ കോൺഗ്രസ് അതിന്റെ സോഷ്യൽ എഞ്ചിനീയറിംഗിനെ സന്തുലിതമാക്കിയിരുന്നു.

ശശി തരൂരിന്റെ പേരെടുത്ത് പറയാതെ പാർട്ടിക്ക് സമാന്തരമായി പ്രവർത്തിക്കുന്നതിനെതിരെ പ്രതിപക്ഷ നേതാവ് വി.ഡി സതീശന് ആദ്യം മുന്നറിയിപ്പ് നൽകിയിരുന്നു. "ഒരു മൊട്ടുസൂചി ഉപയോഗിച്ച് പൊട്ടിക്കാവുന്ന എയർ ബലൂണുകൾ പോലെയുള്ള മാധ്യമ സൃഷ്ടികളായ നേതാക്കളെ" അദ്ദേഹം ദേഷ്യത്തോടെ വിമർശിച്ചു. ശശി തരൂർ പാർട്ടിക്കെതിരെ ഒന്നും ചെയ്യുന്നില്ലെന്ന് പറഞ്ഞിട്ടും സമാന്തര രാഷ്ട്രീയത്തിനെതിരെ കെ.പി.സി.സി പ്രസിഡന്റ് കെ. സുധാകരൻ മുന്നറിയിപ്പ് നൽകി. കോൺഗ്രസിന്റെ പുതിയ അധികാര കേന്ദ്രമായ ഗാന്ധി കുടുംബവുമായി അടുപ്പമുള്ള അഖിലേന്ത്യാ കോണ്ഗ്രസ് കമ്മിറ്റിയുടെ ജനറൽ സെക്രട്ടറി കെ.സി വേണുഗോപാലും തരൂരിന്റെ പ്രവർത്തനങ്ങളെ എതിർത്തു. തരൂർ പാർട്ടി വിരുദ്ധ പ്രവർത്തനങ്ങളിൽ ഏർപ്പെട്ടിട്ടില്ലെന്ന് പറഞ്ഞെങ്കിലും കേരളത്തിന്റെ ചുമതലയുള്ള എ.ഐ.സി.സി ജനറൽ സെക്രട്ടറി താരിഖ് അൻവറിനെ സംസ്ഥാനത്തേക്ക് പാഞ്ഞെത്താൻ നിർബന്ധിച്ചാണ് പരാതികൾ ഹൈക്കമാന്ഡിലേക്ക് പോയത്. ഐക്യജനാധിപത്യമുന്നണിയുടെ സാമൂഹിക അടിത്തറയിലെ പ്രധാന വിഭാഗങ്ങളായ മുസ്‌ലിം ലീഗ്, കത്തോലിക്കാ സഭ, എൻ.എസ്.എസ് എന്നിവയുടെ ഇടയിൽ തരൂരിനോടുള്ള വർദ്ധിച്ചുവരുന്ന ആവേശം കാരണം ഒരുപക്ഷേ, കോൺഗ്രസ് ഹൈക്കമാൻഡ് സംസ്ഥാന നേതാക്കൾക്ക് അവരുടെ പ്രകോപനം നിയന്ത്രിക്കാൻ നിർദ്ദേശം നൽകിയതായി തോന്നുന്നു. തരൂരിന്റെ യോഗങ്ങൾ തടയേണ്ടെന്നും സംഘടനാ അച്ചടക്കത്തിന് അനുസൃതമായി പാര്ട്ടിയെ അറിയിക്കണമെന്നും കെ.പി.സി.സി അച്ചടക്ക സമിതി ഇപ്പോൾ തീരുമാനിച്ചിട്ടുണ്ട്.

എതിരാളികളായ കോൺഗ്രസ് വിഭാഗങ്ങൾ തരൂരിനെതിരെ ഒറ്റക്കെട്ടാണ്. സുധാകരനോടോ സതീശനോടോ ഒരു സ്നേഹവും നഷ്ടപ്പെടാത്ത മുൻ കെ.പി.സി.സി അദ്ധ്യക്ഷൻ രമേശ് ചെന്നിത്തല സമാന്തര പ്രവർത്തനങ്ങൾക്കെതിരെയാണ് പ്രതികരിച്ചത്. എൽ.ഡി.എഫ് സർക്കാരിനെതിരായ പ്രക്ഷോഭങ്ങളിൽ ഒരിക്കലും ഇടപെട്ടിട്ടില്ലെന്നും മുഖ്യമന്ത്രി പിണറായി വിജയനോട് മൃദുസമീപനം പുലർത്തുന്നയാളാണ് തരൂരെന്നും തരൂരിനെ എതിർക്കുന്നവർ പറയുന്നു. നിർദിഷ്ട സിൽവർ ലൈനിനെതിരായ യു.ഡി.എഫ് സമരത്തെ പിന്തുണയ്ക്കാൻ തരൂർ ആദ്യം വിസമ്മതിച്ചത് അവർ ഉദാഹരണമായി ചൂണ്ടിക്കാണിക്കുന്നു. എല്ലാ ആരോപണങ്ങളും തള്ളിക്കളഞ്ഞ തരൂർ തന്റെ പര്യടനം കോൺഗ്രസിന്റെ തത്വശാസ്ത്രവും മൂല്യങ്ങളും ഉയർത്തിപ്പിടിക്കുക മാത്രമാണ് ചെയ്യുന്നതെന്നും പറഞ്ഞു. "ഞാൻ കോൺഗ്രസിന്റെ സെന്റർ ഫോർവേഡ് ആയി കളിക്കുന്നു," ഇപ്പോൾ നടക്കുന്ന ലോകകപ്പിന്റെ ആവേശം പ്രതിധ്വനിച്ചുകൊണ്ട് അദ്ദേഹം പറഞ്ഞു. തനിക്ക് നേരെ ചുവപ്പ് കാർഡ് കാണിച്ചുവെന്ന് സമ്മതിക്കാൻ അദ്ദേഹം വിസമ്മതിച്ചു.

തരൂരിനെ പിന്തുണച്ച ഏക കോൺഗ്രസ് നേതാവ് മുൻ മുഖ്യമന്ത്രി കെ.കരുണാകരന്റെ മകനും എം.പിയുമായ കെ.മുരളീധരൻ ആയിരുന്നു. ഇപ്പോഴത്തെ നേതൃത്വത്തെ വെറുക്കുന്ന മുരളീധരൻ അടുത്ത മുഖ്യമന്ത്രിയാകാൻ ആഗ്രഹിക്കുന്നവരാണ് തരൂരിനെ എതിർത്തതെന്നും പറഞ്ഞു. തന്നെ വില കുറച്ച് കാണുന്നവർ ലോകകപ്പിൽ സൗദി അറേബ്യയെ പരാജയപ്പെടുത്തിയ അർജന്റീനയെ പോലെയായിരിക്കുമെന്നും മുരളീധരൻ പറഞ്ഞു. ശശി തരൂരിനെപ്പോലെ തന്നെ സതീശനും ചെന്നിത്തലയും വേണുഗോപാലും നായർ ജാതിയിൽപ്പെട്ടവരാണെന്ന വാദവും കാര്യങ്ങൾ രൂക്ഷമാക്കിയിട്ടുണ്ട്. കോൺഗ്രസിലെ അടുത്ത മുഖ്യമന്ത്രിയുടെ ഊഴം ഒരു നായരുടേതാണ്.

സുധാകരന്റെ സംഘപരിവാർ അനുകൂല പ്രസ്താവനകൾ ന്യൂനപക്ഷങ്ങളുടെ ഭയം വർധിപ്പിക്കുന്നുണ്ട്.

യുവ പാർട്ടി പ്രവർത്തകരെയും രാഷ്ട്രീയേതര വിഭാഗത്തെയും തരൂർ ആവേശഭരിതരാക്കി. ഉജ്ജ്വലമായ തെരഞ്ഞെടുപ്പ് വിജയങ്ങളിലൂടെ തെളിയിക്കപ്പെട്ടതുപോലെ ഇടതുപക്ഷ, സംഘപരിവാർ ക്യാമ്പുകൾക്കിടയിലും അദ്ദേഹത്തിന് അനുയായികളുണ്ട് . 2021 ൽ എൽ.ഡി.എഫ് അഭൂതപൂര്വമായ തിരിച്ചുവരവ് നടത്തിയതോടെ രാഷ്ട്രീയ, മത, ജാതി ഭിന്നതകൾക്കതീതമായ സ്വാധീനമുള്ള നേതാവിനെയാണ് യുഡിഎഫിനും കോൺഗ്രസിനും ആവശ്യം.

മുസ്‌ലിം ലീഗിലും കേരള കോൺഗ്രസിലും യു.ഡി.എഫിന്റെ വിവിധ കക്ഷികളിലും കേരളത്തിലെ ജനസംഖ്യയുടെ 45 ശതമാനത്തോളം വരുന്ന മുസ്‌ലിംകളുടെയും ക്രിസ്ത്യാനികളുടെയും മുൻനിര പാർട്ടികളിലും തരൂരിനോടുള്ള ആവേശം പ്രകടമാണ്. മൃദുഹിന്ദുത്വമുള്ള ഹൃദയമുള്ള തരൂരിനെതിരെ ആരോപണങ്ങൾ ഉയർന്നിട്ടും തരൂരിന്റെ വ്യാപകമായ ജനപ്രീതിയും മതേതര യോഗ്യതകളും അവരെ ആകർഷിക്കുന്നു. ചാണ്ടിയെയോ എ.കെ.ആന്റണിയെയോ പോലുള്ളവരെ മാറ്റി എൽ.ഡി.എഫിനെ വെല്ലുവിളിക്കാനോ ഭാരതീയ ജനതാപാർട്ടിക്കെതിരായ പ്രതിരോധമായി മാറാനോ കോൺഗ്രസിന്റെ പുതിയ നേതൃത്വമായ സുധാകരൻ, സതീശൻ, വേണുഗോപാൽ എന്നിവരുടെ കഴിവിൽ അവർക്ക് ഉറപ്പില്ല. ഇത് പരസ്യമായി പറഞ്ഞിട്ടില്ലെങ്കിലും ദേശീയ തലത്തിൽ പോലും ബിജെപിയെ നേരിടാനുള്ള കോൺഗ്രസിന്റെ ശേഷിയെക്കുറിച്ച് മുസ്‌ലിം ലീഗിന് ആശങ്കയുണ്ട്.

ന്യൂനപക്ഷ സമുദായത്തിൽ നിന്ന് ഒരുകാലത്ത് ഉണ്ടായിരുന്ന നേതാക്കളുടെ നല്ല പ്രാതിനിധ്യം ഇപ്പോൾ കോൺഗ്രസിലില്ല. കരുണാകരനെയും ആന്റണിയെയും ചെന്നിത്തലയെയും ചാണ്ടിയെയും പോലുള്ള നേതാക്കളുടെ സാന്നിധ്യം ഉപയോഗിച്ച് ഹിന്ദു, ക്രിസ്ത്യൻ നേതാക്കളുമായി അടുത്തകാലം വരെ കോൺഗ്രസ് അതിന്റെ സോഷ്യൽ എഞ്ചിനീയറിംഗിനെ സന്തുലിതമാക്കിയിരുന്നു. കത്തോലിക്കാ സഭയുമായി ബന്ധമുള്ള പ്രബലമായ കേരള കോൺഗ്രസ് വിഭാഗം കെ.എം.മാണിയുടെ നിര്യാണത്തെ തുടർന്ന് എൽ.ഡി.എഫിലേക്ക് ചേക്കേറി. മുസ്‌ലിംകളിൽ വലിയൊരു വിഭാഗം സി.പി.എമ്മിലേക്ക് മാറുകയാണെന്ന് മുസ്‌ലിം ലീഗ് ആശങ്കപ്പെടുന്നു.

മുസ്‌ലിം ലീഗിലും കേരള കോൺഗ്രസിലും യു.ഡി.എഫിന്റെ വിവിധ കക്ഷികളിലും കേരളത്തിലെ ജനസംഖ്യയുടെ 45 ശതമാനത്തോളം വരുന്ന മുസ്‌ലിംകളുടെയും ക്രിസ്ത്യാനികളുടെയും മുൻനിര പാർട്ടികളിലും തരൂരിനോടുള്ള ആവേശം പ്രകടമാണ്.

സുധാകരന്റെ സംഘപരിവാർ അനുകൂല പ്രസ്താവനകൾ ന്യൂനപക്ഷങ്ങളുടെ ഭയം വർധിപ്പിക്കുന്നുണ്ട്. ജവഹർലാൽ നെഹ്‌റുവിന്റെ 133-ാം ജന്മവാർഷിക ദിനമായ നവംബർ 14 ന്, ഇന്ത്യയുടെ ആദ്യ പ്രധാനമന്ത്രിയെ അവഹേളിച്ചതിന്റെ പേരിൽ മറ്റെല്ലായിടത്തും കോൺഗ്രസ് ബി.ജെ.പിയെ കടന്നാക്രമിച്ചപ്പോൾ കേരളത്തിൽ സുധാകരൻ സെൽഫ് ഗോൾ അടിക്കുകയായിരുന്നു. വർഗീയ ഫാസിസ്റ്റുകളോട് പോലും വിട്ടുവീഴ്ച ചെയ്ത നെഹ്റു വളരെ ജനാധിപത്യവാദിയാണെന്ന് ജില്ലാ കോണ്ഗ്രസ് കമ്മിറ്റി കണ്ണൂരിൽ സംഘടിപ്പിച്ച യോഗത്തിൽ സുധാകരൻ പറഞ്ഞു. സ്വതന്ത്ര ഇന്ത്യയുടെ ആദ്യ മന്ത്രിസഭയിൽ വ്യവസായ വിതരണ മന്ത്രിയായി ബി.ജെ.പിയുടെ മുൻ രൂപമായ ഭാരതീയ ജനസംഘത്തിന്റെ സ്ഥാപകൻ ശ്യാമപ്രസാദ് മുഖർജിയെ നെഹ്റു ഉൾപ്പെടുത്തിയതിനെ പരാമർശിച്ചായിരുന്നു കെ.പി.സി.സി അധ്യക്ഷന്റെ പരാമർശം. ഇത് വാൻ വിവാദമായി ആളിക്കത്തി. ഇടതുപക്ഷം സുധാകരനെ രൂക്ഷമായി വിമർശിച്ചു. കോൺഗ്രസിനുള്ളിൽ പോലും പ്രതിഷേധം ഉയർന്നിരുന്നു. താരിഖ് അൻവർ പരസ്യമായ വിശദീകരണം നൽകണമെന്ന് വാശിപിടിക്കുന്നതുവരെ സുധാകരൻ വീണ്ടും പ്രതിരോധിച്ചു. മുസ്‌ലിം ലീഗും അതൃപ്തി പ്രകടിപ്പിച്ചു. അത് നാക്കുപിഴയാണെന്ന് സമ്മതിക്കുകയല്ലാതെ സുധാകരന് വേറെ വഴിയില്ലായിരുന്നു.

ഏതാനും ദിവസങ്ങൾക്ക് മുമ്പ് സുധാകരൻ മറ്റൊരു വിവാദത്തിന് കൂടി തിരി കൊളുത്തിയിരുന്നു. 1970 കളിൽ താൻ വിദ്യാർത്ഥി നേതാവായിരുന്നപ്പോൾ ആർ.എസ്.എസിന്റെ പല ശാഖകളെയും സി.പി.എമ്മിന്റെ ആക്രമണങ്ങളിൽ നിന്ന് സംരക്ഷിക്കാൻ തന്റെ ആളുകളെ അയച്ചിരുന്നുവെന്ന് കണ്ണൂരിൽ നടന്ന ഒരു പൊതുയോഗത്തിൽ അദ്ദേഹം വെളിപ്പെടുത്തി. സി.പി.എമ്മിന്റെ ഭീഷണി നേരിടുന്ന ജനാധിപത്യത്തോടുള്ള തന്റെ ആശങ്കയുടെ സൂചനയായാണ് സുധാകരൻ തന്റെ നടപടിയെ ന്യായീകരിച്ചത്. എന്നാൽ, കോൺഗ്രസിൽ ആർ.എസ്.എസ് ചിന്താഗതിക്കാർക്ക് സ്ഥാനമില്ലെന്ന രാഹുൽ ഗാന്ധിയുടെ പ്രസ്താവന എം.കെ മുനീർ എല്ലാവരേയും ഓർമിപ്പിച്ചു. സുധാകരന്റെ പ്രസ്താവന ചർച്ച ചെയ്യാൻ യു.ഡി.എഫ് അടിയന്തരമായി യോഗം ചേരണമെന്ന് മുസ്‌ലിം ലീഗ് ആവശ്യപ്പെട്ടു. സുധാകരനും വേണുഗോപാലും സതീശനും ലീഗ് നേതാക്കളെ വിളിച്ച് അനുനയിപ്പിക്കുകയായിരുന്നു.

കടപ്പാട് : ദി ടെലഗ്രാഫ് / വിവർത്തനം : അഫ്സൽ റഹ്‌മാൻ