വികാസ് കൃഷ്ണന്‍ സെമി കാണാതെ പുറത്തായി

ഒളിമ്പിക്സില്‍ പുരുഷന്മാരുടെ മിഡില്‍ വെയ്റ്റ്75 കിലോഗ്രാം വിഭാഗം ബോക്സിങില്‍ ഇന്ത്യയുടെ വികാസ് കൃഷ്ണന്‍ യാദവ് സെമി കാണാതെ പുറത്തായി.

ഒളിമ്പിക്സില്‍ പുരുഷന്മാരുടെ മിഡില്‍ വെയ്റ്റ്75 കിലോഗ്രാം വിഭാഗം ബോക്സിങില്‍ ഇന്ത്യയുടെ വികാസ് കൃഷ്ണന്‍ യാദവ് സെമി കാണാതെ പുറത്തായി. ക്വാര്‍ട്ടര്‍ ഫൈനലില്‍ ഉസ്ബെകിസ്ഥാന്റെ ബെക്തെമിര്‍ മെലിക്കുസെയ്‌വുവാണ് 3-0ന് വികാസ് കൃഷ്ണനെ ഇടിച്ചിട്ടത്. ഇതോടെ ബോക്സിങില്‍ ഇന്ത്യയുടെ അവസാന പ്രതീക്ഷയും അസ്തമിച്ചു.

ജയിച്ചാല്‍ മെഡലുറപ്പിക്കാവുന്ന മത്സരത്തിനിറങ്ങിയ വികാസ് കൃഷ്ണന്‍ യാദവ് നിരാശപ്പെടുത്തുന്ന പ്രകടനമാണ് റിങില്‍ പുറത്തെടുത്തത്. പ്രതിരോധത്തിലൂന്നി കളിച്ച ഇന്ത്യന്‍ താരത്തിനെതിരെ ഉസ്ബെക് താരം പലപ്പോഴും മികവ് പുറത്തെടുത്തു. ആദ്യ റൌണ്ടിന്റെ തുടക്കത്തില്‍ വികാസ് കൃഷ്ണനായിരുന്നു മുന്‍തൂക്കം. എന്നാല്‍ അപകടം മണത്ത് മികച്ച പഞ്ചുകളുതിര്‍ത്ത് മുന്നേറിയ ബെക്തമിര്‍ ആദ്യ റൌണ്ട് സ്വന്തമാക്കി.

മത്സരത്തില്‍ പിന്നീടും ആധിപത്യം 20കാരനായ ബെക്തമിറിനായിരുന്നു. രണ്ടാം റൌണ്ട് അനായാസമായാണ് ഉസ്ബെക് താരം നേടിയത്. വേഗത കുറവായിരുന്ന വികാസ് കൃഷ്ണന്‍ ഇടി വാങ്ങുന്ന കാഴ്ച പലപ്പോഴും കണ്ടു. മൂന്നാം റൌണ്ടിലും വികാസിന്റെ പ്രകടനത്തില്‍ മാറ്റമുണ്ടായില്ല. അവസാന റൌണ്ടും വിജയവും സ്വന്തമാക്കി ഉസ്ബെക് താരം സെമി ഫൈനലിലേക്ക് യോഗ്യത നേടി.