പന്ത് കൊണ്ട് റാഷിദ് ഖാന്‍, ബാറ്റ് കൊണ്ട് വാര്‍ണര്‍: ഹൈദരാബാദിന് തകര്‍പ്പന്‍ ജയം  

ടൂര്‍ണമെന്റിലെ രണ്ടാം ജയമാണ് ഹൈദരാബാദ് സ്വന്തമാക്കിയത്.

പന്ത് കൊണ്ട് റാഷിദ് ഖാനും ബാറ്റ് കൊണ്ട് വാര്‍ണറും മിന്നിയപ്പോള്‍ ഗുജറാത്ത് ലയണ്‍സിനെതിരെ സണ്‍ റൈസേഴ്‌സ് ഹൈദരാബാദിന് ഒമ്പത് വിക്കറ്റിന്റെ തകര്‍പ്പന്‍ ജയം. ടൂര്‍ണമെന്റിലെ രണ്ടാം ജയമാണ് ഹൈദരാബാദ് സ്വന്തമാക്കിയത്. ഗുജറാത്തിന് രണ്ടാം തോല്‍വിയും. ഗുജറാത്ത് ഉയര്‍ത്തിയ 136 എന്ന വിജയലക്ഷ്യം ഹൈദരാബാദ് 15.1 ഓവറില്‍ ഒരു വിക്കറ്റ് നഷ്ടത്തില്‍ മറികടന്നു. 45 പന്തില്‍ നിന്ന് നാല് സിക്‌സറും ആറു ബൗണ്ടറിയും ഉള്‍പ്പെടെ 76 റണ്‍സാണ് വാര്‍ണര്‍ അടിച്ചെടുത്തത്.

39 പന്തില്‍ ആറ് ബൗണ്ടറികളുടെ അകമ്പടിയോടെ 52 റണ്‍സെടുത്ത മോയിസ് ഹെന്റി ക്വിസും തിളങ്ങി. ഇരുവരെയും പുറത്താക്കാന്‍ ഗുജറാത്ത് ബൗളര്‍മാര്‍ക്കായില്ല. ഒമ്പത് റണ്‍സെടുത്ത ശിഖര്‍ ധവാനാണ് പുറത്തായത്. ആദ്യം ബാറ്റ് ചെയ്ത ഗുജറാത്തിനെ അഫ്ഗാന്‍ സ്പിന്നര്‍ റാഷിദ് ഖാന്റെ മികവിലാണ് ചെറിയ സ്‌കോറിലൊതുക്കിയത്. നാല് ഓവറില്‍ 19 റണ്‍സ് മാത്രം വിട്ടുകൊടുത്ത് മൂന്ന് വിക്കറ്റുകളാണ് റാഷിദ് ഖാന്‍ വീഴ്ത്തിയത്. രണ്ട് വിക്കറ്റെടുത്ത ഭുവനേശ്വര്‍ കുമാറും തിളങ്ങി.

ഗുജറാത്ത് നിരയില്‍ ജേസണ്‍ റോയ്(31) ദിനേഷ് കാര്‍ത്തിക്ക്(30) ഡ്വെയ്ന്‍ സ്മിത്ത്( 37) എന്നിവര്‍ തിളങ്ങിയപ്പോള്‍ അരങ്ങേറ്റം കുറിച്ച മലയാളി താരം ബേസില്‍ തമ്പി 13 റണ്‍സെടുത്ത് പുറത്താകാതെ നിന്നു. 8 പന്തില്‍ നിന്ന് ഒരു സിക്‌സറിന്റെ അകമ്പടിയോടെയാണ് ബേസിലിന്റെ ഇന്നിങ്‌സ്. റാഷിദ് ഖാനാണ് മാന്‍ഓഫ്ദ മാച്ച്.