ഖത്തറിൽ ലോകകപ്പ്​ നടത്താൻ ഉപാധികൾ വേണമെന്ന ആവശ്യവുമായി യു.എ.ഇ

സമാന ആവശ്യവുമായി കൂടുതൽ ശക്​തമായി രംഗത്തു വരാൻ സൗദി അനുകൂല രാജ്യങ്ങൾ തയ്യാറെടുക്കുന്നതായും സൂചനയുണ്ട്​.

ഖത്തറിൽ ലോകകപ്പ്​ നടത്താൻ ഉപാധികൾ വേണമെന്ന ആവശ്യവുമായി യു.എ.ഇ രംഗത്ത്​. കാൽപന്തുകളിയുടെ ലോകോത്തര മേളയുടെ വിശുദ്ധി നിലനിർത്താൻ അത്​ കൂടിയേ തീരൂവെന്നും യു.എ.ഇ വ്യക്​തമാക്കി. സമാന ആവശ്യവുമായി കൂടുതൽ ശക്​തമായി രംഗത്തു വരാൻ സൗദി അനുകൂല രാജ്യങ്ങൾ തയ്യാറെടുക്കുന്നതായും സൂചനയുണ്ട്​.

2022 ലോകകപ്പ്​ ഫുട്​ബാളിനുള്ള ആതിഥേയത്വത്തിൽ ഭീകരവാദത്തിന്‍റെയും തീവ്രവാദത്തിന്‍റെയും നിരാകരണം കൂടി ഉൾപ്പെടുത്തണമെന്നാണ്​​ യു.എ.ഇയുടെ ആവശ്യം. വിദേശകാര്യ സഹമന്ത്രി ഡോ. അൻവർ ബിൻ മുഹമ്മദ് ഗർഗാശ് ആണ്​ ഇക്കാര്യം വ്യക്​തമാക്കിയത്​. വിധി ട്വീറ്റ്​ സന്ദേശങ്ങളിലാണ്​ അദ്ദേഹം ഇൗ അഭിപ്രായ പ്രകടനം അദ്ദേഹം നടത്തിയത്​. തീവ്രവാദ വ്യക്​തികളുടെയും സംഘടനകളുടെയും ഭീകരവാദികളുടെയും പിന്തുണകൊണ്ട്​ 2022ലെ ലോകകപ്പ്​ ഫുട്​ബാൾ ആതിഥ്യം കളങ്കപ്പെട്ടുകൂടെന്നും അദ്ദേഹം പറഞ്ഞു.

ഖത്തർ അവരുടെ നയങ്ങൾ പുനരവലോകനം ​ചെയ്യണം. ചതുർരാഷ്​ട്രങ്ങളുടെ ആവശ്യത്തിന്​ വേണ്ടിയല്ല ഇൗ പുനരവലോകനം നടത്തേണ്ടത്​. അങ്ങനെയെങ്കിൽ അത്​ അപൂർണമായിരിക്കും. അന്താരാഷ്​ട്ര പ്രതിബദ്ധതയാണ്​ ഖത്തറിൽനിന്ന്​ ഉണ്ടാവേണ്ടതെന്നും ഗർഗാശ്​ അഭിപ്രായപ്പെട്ടു.