തൂക്കിയടി, എറിഞ്ഞിട്ടു; ദക്ഷിണാഫ്രിക്കക്കെതിരെ ഇന്ത്യക്ക് 135 റൺസിന്റെ തകർപ്പൻ ജയം, പരമ്പര

ജൊഹാനസ്ബർഗ്: ആദ്യം സഞ്ജു സാംസണിന്റേയും തിലക് വർമയുടേയും തകർപ്പൻ ബാറ്റിങ്. അർഷ്ദീപ് സിങിന്റെ മാസ്മരിക സ്വിങ് ബൗളിങ്. ദക്ഷിണാഫ്രിക്കക്കെതിരായ നാലാമത്തെയും അവസാനത്തെയും ടി20യിൽ ഇന്ത്യക്ക് 135 റൺസിന്റെ തകർപ്പൻ ജയം. പരമ്പര 3-1 സ്വന്തമാക്കി. വാണ്ടറേഴ്‌സിൽ ഇന്ത്യ ഉയർത്തിയ 283-1 എന്ന പടുകൂറ്റൻ സ്‌കോർ പിന്തുടർന്ന് ഇറങ്ങിയ ദക്ഷിണാഫ്രിക്കയുടെ പോരാട്ടം 18.2 ഓവറിൽ 148ൽ അവസാനിച്ചു. ഒരുഘട്ടത്തിൽ പോലും ഇന്ത്യക്ക് ഭീഷണിയാകാൻ പ്രോട്ടീസ് ബാറ്റർമാർക്കായില്ല. ട്രിസ്റ്റൻ സ്റ്റബ്‌സ്(29 പന്തിൽ 43) റൺസുമായി ടോപ് സ്‌കോററായി. ഇന്ത്യൻ നിരയിൽ അർഷ്ദീപ് സിങ് മൂന്ന് വിക്കറ്റ് വീഴ്ത്തി. സീരിസിലുടനീളം മികച്ച പ്രകടനം നടത്തിയ തിലക് വർമയാണ് കളിയിലേയും പരമ്പരയിലേയും താരം

മറുപടി ബാറ്റിങിൽ ആതിഥേയരുടെ തുടക്കം മികച്ചതായില്ല. സ്‌കോർ ബോർഡിൽ ഒരു റൺ ചേരുന്നതിനിടെ ഓപ്പണർ റീസ ഹെൻ റിക്‌സിനെ(0) നഷ്ടമായി. അർഷ്ദീപ് സിങിന്റെ സ്വിങ്ബൗളിൽ ക്ലീൻബൗൾഡാകുകയായിരുന്നു. തൊട്ടുപിന്നാലെ റിയാൻ റികെട്ടസ്‌നെ(1) സഞ്ജു സാംസണിന്റെ കൈകളിലെത്തിച്ച് ഹാർദിക് പാണ്ഡ്യയും പ്രഹരമേൽപ്പിച്ചു. ക്യാപ്റ്റൻ എയ്ഡൻ മാർക്രത്തെ(8)യും ഹെൻറിച് ക്ലാസനേയും(0) തൊട്ടടുത്ത പന്തുകളിൽ പുറത്താക്കിയതോടെ ദക്ഷിണാഫ്രിക്ക 10-4 എന്ന നിലയിൽ വൻ തകർച്ച നേരിട്ടു. എന്നാൽ അഞ്ചാം വിക്കറ്റിൽ ഒത്തുചേർന്ന ട്രിസ്റ്റൻ സ്റ്റബ്‌സ്-ഡേവിഡ് മില്ലർ കൂട്ടുകെട്ട് പ്രതീക്ഷ നൽകിയെങ്കിലും സ്‌കോറിംഗ് ഉയർത്താനായില്ല. 27 പന്തിൽ 36 റൺസെടുത്ത ഡേവിഡ് മില്ലറിനെ ചക്രവർത്തിയും 29 പന്തിൽ 43 റൺസെടുത്ത സ്റ്റബ്‌സിനെ രവി ബിഷ്‌ണോയിയും മടക്കിയതോടെ ആതിഥേയരുടെ അവസാന പ്രതീക്ഷയും അസ്തമിച്ചു. കഴിഞ്ഞ മാച്ചിലേതിന് സമാനമായി അവസാന ഓവറുകളിൽ മാർക്കോ ജാൻസൻ(12 പന്തിൽ 29) തകർത്തടിച്ചെങ്കിലും ലക്ഷ്യം ഏറെ അകലെയായിരുന്നു.

നേരത്തെ സഞ്ജു സാംസണിന്റേയും തിലക് വർമയുടേയും സെഞ്ച്വറി കരുത്തിലാണ് ഇന്ത്യ റൺമല ഉയർത്തിയത്. കഴിഞ്ഞ രണ്ട് മത്സരങ്ങളിൽ പൂജ്യത്തിന് പുറത്തായതിന്റെ എല്ലാ നിരാശയും മായ്ക്കുന്ന പ്രകടനമാണ് മലയാളി താരം നടത്തിയത്. മാർക്കോ ജാൻസൻ എറിഞ്ഞ ആദ്യ ഓവർ കരുതലോടെ നേരിട്ട താരം തൊട്ടടുത്ത ഓവർമുതൽ വിശ്വരൂപം പുറത്തെടുത്തു. 56 പന്തിൽ ഒൻപത് സിക്സറും ആറു ബൗണ്ടറിയും സഹിതം 109 റൺസുമായി സഞ്ജുവും 47 പന്തിൽ 10 സിക്സറും ഒൻപത് ബൗണ്ടറിയുമടക്കം 120 റൺസാണ് തിലക് വർമയും പുറത്താകാതെ നിന്നു. ഇരുവരും ചേർന്ന് രണ്ടാം വിക്കറ്റിൽ 210 റൺസാണ് അടിച്ചെടുത്തത്. 18 പന്തിൽ 36 റൺസെടുത്ത അഭിഷേക് ശർമയുടെ വിക്കറ്റ് മാത്രമാണ് നഷ്ടമായത്. ദക്ഷിണാഫ്രിക്കയിൽ ടി20യിൽ ഒരുടീം നേടുന്ന ഉയർന്ന സ്‌കോറും ജൊഹാനസ്ബർഗിലെ വലിയ സ്‌കോറുമാണ് ഇന്ത്യ പടുത്തുയർത്തിയത്. മൂന്നാംതവണയാണ് ടി20യിൽ ഒരുമാച്ചിൽ രണ്ട് താരങ്ങൾ സെഞ്ച്വറി നേടുന്നത്. പവർപ്ലെയിൽ 73 റൺസ് നേടിയ ഇന്ത്യ 15 ഓവറിലെത്തുമ്പോൾ 146 റൺസ് പിന്നിട്ടു. ഡെത്ത് ഓവറിൽ കത്തികയറിയ സഞ്ജുവും തിലകും സ്‌കോർ 250 കടത്തി.