പ്രളയത്തിനിടയിലും ഫുട്ബോൾ; പ്രതിഷേധവുമായി ലാലിഗ പരിശീലകർ

മാഡ്രിഡ്: സ്​പെയിനിൽ പ്രളയക്കെടുതികൾ തുടരുന്നതിനിടയിലും ലാലിഗ ഫുട്ബോൾ മത്സരങ്ങൾ നടത്തുന്നതിനെതിരെ പ്രതിഷേധവുമായി ​പരിശീലകർ. ബാർ​സലോണ പരിശീലകൻ ഹാൻസി ഫ്ലിക്ക്, റയൽ മാഡ്രിഡ് പരിശീലകൻ കാർലോ ആഞ്ചലോട്ടി, അത്ലറ്റിക്കോ മാഡ്രിഡ് പരിശീലകൻ ഡിയഗോ സിമിയോണി അടക്കമുള്ളവരാണ് പ്രതിഷേധം അറിയിച്ചത്.

‘‘കളി നടത്തുന്നതിൽ യുക്തിയില്ല. ​ജനങ്ങൾക്ക് വളരെ മോശം അവസ്ഥയുള്ളപ്പോഴും കളി നടത്തുന്നതിൽ സങ്കടമുണ്ട്. അവർ തുടരാൻ പറഞ്ഞതുകൊണ്ടാണ് ഞങ്ങളിത് ചെയ്യുന്നത്’’ -അത്‍ലറ്റിക്കോ മാഡ്രിഡ് പരിശീലകൻ ഡിയഗോ സിമിയോണി പ്രതികരിച്ചു.

‘‘ഈ സ്ഥാനത്ത് ഞാനായിരുന്നെങ്കിൽ കളി സസ്​പെൻഡ് ചെയ്യുമായിരുന്നു. കാരണം സ്​പെയിനിനും വലൻസ്യക്കും ഇതൊരു ദുരന്ത സമയമാണ്. ആ മേഖലയിൽ നിന്നുള്ളവരോട് ഞങ്ങൾ സംസാരിക്കുന്നുണ്ട്. ഫെറൻ ടോറസ് അവിടുത്തുകാരനാണ്. കളി തുടരണോ വേണ്ടയോ എന്നത് ഒരു ബുദ്ധിമുട്ടേറിയ തീരുമാനമാണ്. സഹായത്തിനായി ഞങ്ങൾക്കാകുന്നതെല്ലാം ചെയ്യും. ബാക്കിയുള്ളത് തീരുമാനിക്കേണ്ടത് ലാലിഗയാണ്’’ -ഹാൻസി ഫ്ലിക്ക് പ്രതികരിച്ചു.

ബുധനാഴ്ച നടക്കുന്ന റയൽ മാഡ്രിഡ് എ.സി മിലാൻ മത്സരത്തിന് മുന്നോടിയായി വാർത്ത സമ്മേളനത്തിന് വന്ന റയൽ മാ​​ഡ്രിഡ് കോച്ച് കാർലോ ആഞ്ചലോട്ടിയുടെ പ്രതികരണം ഇങ്ങനെ. ‘‘എല്ലാവരോടുമുള്ള ബഹുമാനം നിലനിർത്തിക്കൊണ്ടുതന്നെ പറയട്ടെ. ഈ പത്രസമ്മേളനം പരമാവധി ചുരുക്കും. കാരണം ഈ സമയത്ത് ഫുട്ബോൾ ചർച്ച ചെയ്യുന്നത് ശരിയല്ല. എന്നെ സംബന്ധിച്ച് നാളെ നടക്കുന്നത് ഒരു സ്​പെഷ്യൽ മാച്ചാണ്. പരമാവധി കുറച്ച് സംസാരിക്കാനാണ് ഞാൻ ശ്രമിക്കുന്നത്’’.

വലൻസ്യ മേഖലയിലെ പ്രളത്തിന് പിന്നാലെ ബാഴ്സലോണ മേഖലയിലും മഴ കനക്കുകയാണ്. പ്രളയത്തിൽ ഇതിനോടകം തന്നെ 217 പേർ പ്രളയക്കെടുതികളിൽ മരണ​പ്പെട്ടിട്ടുണ്ട്.