ഡച്ച് പടക്ക് മുന്നിൽ ബംഗ്ലാ കടുവകൾ ഠിം; ബംഗ്ലാദേശിനെതിരെ നെതർലൻഡ്‌സിന് 87 റൺസ് ജയം

ഈഡൻ ഗാർഡൻസ്: ബംഗ്ലാദേശിനെതിരെ നെതർലൻഡ്‌സിന് 87 റൺസിന്റെ ഉജ്ജ്വല ജയം. 230 റൺസ് വിജയലക്ഷ്യവുമായി ബാറ്റിങ്ങിനിറങ്ങിയ ബംഗ്ലാദേശ് 42.2 ഓവറിൽ 142 റൺസിന് എല്ലാവരും പുറത്തായി. നെതർലൻഡ്‌സിനായി പോൾ മക്കീരൻ 7.2 ഓവറിൽ 23 റൺസ് വഴങ്ങി നാല് വിക്കറ്റ് വീഴ്ത്തി. ലീഡെ രണ്ട് വിക്കറ്റ് വീഴ്ത്തി.

ബംഗ്ലാ നിരയിൽ 40 ബോളിൽ 35 റൺസ് നേടിയ ഹസൻ മിറാസ് ആണ് ടോപ് സ്‌കോറർ. ക്യാപ്റ്റൻ ഷാകിബൽ ഹസൻ അഞ്ച് റൺസിന് പുറത്തായി. മഹ്മൂദുല്ല (20), മുസ്തഫിസുർ റഹ്മാൻ (20), മെഹ്ദി ഹസൻ (17), തൻസീദ് ഹസൻ (15), തസ്‌കിൻ അഹമ്മദ് (11) എന്നിവരാണ് രണ്ടക്കം കടന്ന മറ്റു ബംഗ്ലാദേശ് ബാറ്റർമാർ.

ടോസ് നേടി ബാറ്റിങ് തിരഞ്ഞെടുത്ത നെതർലൻഡ്‌സ് 239 റൺസ് നേടി. 68 റൺസ് നേടിയ സ്‌കോട്ട് എഡ്വേർഡ്‌സ് ആണ് ടിമിലെ ടോപ് സ്‌കോറർ. വെസ്‌ലി ബാരെസ്സി 41 റൺസ് നേടിയപ്പോൾ സൈബ്രാൻഡ് എംഗെൽബ്രെച്റ്റ് 35 റൺസ് നേടി.

ബംഗ്ലാദേശിനായി ഷൊരിഫുൽ ഇസ്‌ലാം, തസ്‌കിൻ അഹമ്മദ്, മുസ്തഫിസുർ, മഹെദി ഹസൻ എന്നിവർ രണ്ടു വിക്കറ്റ് വീതം വീഴ്ത്തി.