‘‘കൊറിയക്കാർ എല്ലാം കാണാൻ ഒരുപോലെ’’; തമാശ കാര്യമായി, ടോട്ടനം താരത്തിന് ഏഴ് മത്സരങ്ങളിൽ വിലക്കും പിഴയും

ലണ്ടൻ: ദക്ഷിണ കൊറിയക്കാർക്കെതിരെ വംശീയ പരാമർശം നടത്തിയെന്ന് കാണിച്ച് ടോട്ടൻഹാം താരം റോഡ്രിഗ്രോ ബെൻറ്റൺകുറിന് ഏഴ് മത്സരങ്ങളിൽ വിലക്കും ഒരു ലക്ഷം പൗണ്ട് പിഴയും വിധിച്ചു. ഇംഗ്ലീഷ് ഫുട്ബോൾ ​അസോസിയേഷനാണ് ഇതു സംബന്ധിച്ച തീരുമാനം കൈകൊണ്ടത്.

ജൂണിൽ ഉറുഗ്വായ് ചാനലിന് നൽകിയ അഭിമുഖത്തിൽ പറഞ്ഞ വാക്കുകളാണ് താരത്തിന് വിനയായത്. സംഭവം ഇങ്ങനെ: ടിവി അവതാരകൻ താരത്തിന്റെ കൈയ്യിലുള്ള ജഴ്സി സണിന്റേതാണോയെന്ന് (സൺ ഹ്യൂങ് മിൻ) ചോദിച്ചു. ചി​ലപ്പോൾ സണിന്റെ കസിന്റേതുമാകാം. കാരണം ഏറിയും കുറഞ്ഞും അവരെല്ലാം കാണാൻ ഒരുപോലെയാണെന്നായിരുന്നു താരത്തിന്റെ മറുപടി.

ദീർഘകാലമായി ടോട്ടനത്തിനായി കളിക്കുന്ന ദക്ഷിണകൊറിയൻ താരം സൺ ഹ്യൂങ് മിനിനെക്കുറിച്ചുളള ഈ പ്രസ്താവനക്കെതിരെ സമൂഹമാധ്യമങ്ങളിൽ പലരും വിമർശനമുയർത്തിയിരുന്നു. തൊട്ടുപിന്നാലെ ബെൻറ്റൺകുർ സണിനോട് ക്ഷമചോദിക്കുകയും ചെയ്തു. സൺ പരാതിയില്ലെന്ന് പറയുകയും ചെയ്തു.

പക്ഷേ ഈ പ്രസ്താവന തങ്ങളുടെ നിയമത്തിന്റെ ലംഘനമാണെന്ന് കാണിച്ച് ഫുട്ബോൾ ​അസോസിയേഷൻ നടപടി സ്വീകരിക്കുകയായിരുന്നു.