2002​ലെ ലോകപ്പ് ജേതാക്കളായ ബ്രസീൽ ടീമംഗങ്ങൾ ഇന്ത്യയിൽ കളിക്കും; തീയ്യതിയും സ്ഥലവും തീരുമാനമായി

ചെന്നൈ: കാൽപന്ത് ലോകം ആരാധനയോടെ കാണുന്ന 2002ലെ ലോക ജേതാക്കളായ ബ്രസീൽ ടീമംഗങ്ങൾ ഇന്ത്യയിൽ പന്തുതട്ടുന്നു. മാർച്ച് 30ന് ചെന്നൈ ജവഹർലാൽ നെഹ്റു സ്റ്റേഡിയത്തിൽ നടക്കുന്ന പ്രദർശന മത്സരത്തിനായാണ് താരങ്ങൾ ഇന്ത്യയിലെത്തുന്നത്.

മാർച്ച് 31, ഏപ്രിൽ 1 എന്നീ തീയ്യതികളിലായി നടക്കുന്ന ഫുട്ബോൾ സമ്മിറ്റിന് മുന്നോടിയായാണ് മത്സരം. ഇന്ത്യൻ ലെജൻഡ്സും ബ്രസീൽ ലെജൻഡ്സുമായി തിരിഞ്ഞാണ് മത്സരം ഒരുക്കുക. റൊണാൾഡീന്യോ, കക്ക, റിവാൽഡോ, എഡ്മിൽസൺ, ദുംഗ അടക്കമുള്ള പ്രമുഖ ബ്രസീൽ താരങ്ങൾ കളിക്കാനെത്തുമെന്ന് ‘സ്​പോർട്സ് സ്റ്റാർ’ റിപ്പോർട്ട് ചെയ്തു. മത്സരത്തിന് പുറമേ താരങ്ങൾ ഇന്ത്യക്കാരുമായി സംവദിക്കുകയും ചെയ്യും. ദുംഗ, റിവാൾഡോ, എഡ്മിൽസൺ, ​െക്ലബഴേ്സൺ അടക്കമുള്ളവർ സമ്മിറ്റിൽ സംസാരിക്കും.

‘‘ഇന്ത്യൻ ഇതിഹാസങ്ങളുമായി കളിക്കാനായി കക്കയെയും റൊണാൾഡീന്യോയെയും എത്തിക്കാൻ ഞങ്ങൾ ശ്രമിച്ചുകൊണ്ടിരിക്കുകയാണ്. അന്തിമ തീരുമാനം അറിവായിട്ടില്ലെങ്കിലും ഏതാണ്ട് ഉറപ്പായിട്ടുണ്ട്. ഇന്ത്യൻ ടീമിൽ ആരൊക്കെ കളിക്കുമെന്ന് പിന്നീട് പ്രഖ്യാപിക്കും’’ -സംഘാടകരായ ഫുട്ബോൾ പ്ലസ് അക്കാഡമി തലവൻ ഡേവിഡ് ആനന്ദ് പ്രതികരിച്ചു. ഇന്ത്യക്കായി ബൈച്യൂങ് ബൂട്ടിയയും സുനിൽ ഛേത്രിയും അടക്കമുള്ള ഇതിഹാസങ്ങൾ ബൂട്ട് കെട്ടുമെന്നാണ് റിപ്പോർട്ടുകൾ.