ബെൻസീമയുടെ ഇരട്ട ഗോളിന് മറുപടിയായി റൊണാൾഡോയുടെ ഇരട്ടഗോൾ: പോര്‍ച്ചുഗല്‍ പ്രീക്വാർട്ടറിൽ

യൂറോ കപ്പിൽ ഫ്രാൻസും ജർമനിയും പോർച്ചുഗലും പ്രീക്വാട്ടറിൽ. ഫ്രാൻസ് പോർച്ചുഗൽ മത്സരവും ജർമനി ഹംഗറി മത്സരവും സമനിലയിൽ പിരിഞ്ഞു. പോർച്ചുഗലിനായി ക്രിസ്റ്റ്യാനോ റൊണാൾഡോയും ഫ്രാൻസിനായി കരീം ബെൻസേമയും ഇരട്ട ഗോൾ നേടി. ഫ്രാൻസ് ഗ്രൂപ്പ് ചാമ്പ്യന്മാരായപ്പോൾ മികച്ച മൂന്നാം സ്ഥാനക്കാരയാണ് പോർച്ചുഗൽ പ്രീക്വാട്ടറിൽ കടന്നത്.

30ാം മിനുറ്റിലായിരുന്നു ആദ്യ പെനല്‍റ്റി. പെനാൾട്ടി എടുത്ത ക്യാപ്റ്റൻ ക്രിസ്റ്റ്യാനോ റൊണാൾഡോ ലക്ഷ്യം തെറ്റാതെ പന്ത് വലയിൽ എത്തിച്ചു. ഈ ഗോളിന് ഫ്രാൻസിന്റെ മറുപടി വന്നതും പെനാൾട്ടിയിൽ നിന്നായിരുന്നു. ആദ്യ പകുതി അവസാനിക്കുന്നതിന് തൊട്ടു മുമ്പ് സെമെഡോ എമ്പപ്പെയെ വീഴ്ത്തിയതിനായിരുന്നു പെനാൾട്ടി.ബെൻസീമ ആ പെനാൾട്ടി വലയിൽ എത്തിച്ചു.

രണ്ടാം പകുതിയുടെ തുടക്കത്തിൽ തന്നെ ഫ്രാൻസ് ലീഡ് എടുത്തു. പോൾ പോഗ്ബയുടെ മനോഹര പാസാണ് ബെൻസീമ ഗോളാക്കിയത്. ഈ ലീഡ് അധിക നേരം നീണ്ടു നിന്നില്ല. 60ാം മിനുട്ടിൽ ഒരു പെനാൾട്ടിയിലൂടെ തന്നെ പോര്‍ച്ചുഗല്‍ ഗോള്‍ മടക്കി. ഇക്കുറിയും കിക്കെടുത്തത് ക്രിസ്റ്റ്യാനോ റൊണാള്‍ഡോ.