എവർട്ടണിനെതിരെ രണ്ട് ​ഗോൾ വിജയവുമായി മാഞ്ചസ്റ്റർ യുണൈറ്റ‍ഡ്

എവർട്ടണിനെതിരായ പ്രീമിയർ ലീ​ഗ് മത്സരത്തിൽ മാഞ്ചസ്റ്റർ യുണൈറ്റ‍ഡിനു വിജയം. എതിരില്ലാത്ത രണ്ടു ​ഗോളുകൾക്കായിരുന്നു മാഞ്ചസ്റ്റർ യുണൈറ്റ‍ഡിന്റെ വിജയം. എവർട്ടണിനെതിരായ മത്സരത്തിൽ തുടക്കം മുതൽ ആക്രമിച്ചു കളിച്ചെങ്കിലും ​ഗോൾ കീപ്പർ പിക്ക്ഫോർഡാണ് യുണൈറ്റഡിനു വിലങുതടിയായത്. റാഷ്ഫോർഡിന്റെയും, ആന്റണിയുടെയും ​ഗോൾ എന്നുറപ്പിച്ച ഷോർട്ടുകൾ അസാമാന്യമായാണ് പിക്ക്ഫോർഡ് തട്ടിയകറ്റിയത്. എന്നാൽ 36-ാം മിനുറ്റിൽ മധ്യനിരതാരം മക്ടോമിനായി പിക്ക്ഫോർഡിനെ മറികടന്ന് യുണൈറ്റഡിനായി ആദ്യ ​ഗോൾ നേടി. ജേ‍ഡൻ സാഞ്ചോ കൃത്യതയോടെ നൽകിയ പന്ത് യാതൊരു പിഴവുകളുമില്ലാതെ താരം വലയിലെത്തിച്ചു. ആദ്യ പകുതിക്ക് വിസിൽ മുഴങ്ങാൻ സെക്കന്റുകൾ ബാക്കിയുളളപ്പോൾ ലീ‍ഡ് രണ്ടാക്കാൻ ആന്റണിക്കു സുവർണ്ണാവസരം ലഭിച്ചെങ്കിലും ഒരിക്കൽ കൂടി പിക്ക്ഫോർഡ് എവർട്ടണിന്റെ രക്ഷകനായി.

.@ManUtd march back into third 🔴#MUNEVE pic.twitter.com/REadCxQD0j

— Premier League (@premierleague) April 8, 2023

രണ്ടാം പകുതിയിൽ എവർട്ടൺ ചില മുന്നേറ്റങ്ങൾക്ക് ​ശ്രമിച്ചെങ്കിലും യുണൈറ്റ‍ഡിന്റെ പ്രതിരോധനിരയിൽ തട്ടി ശ്രമങ്ങളെല്ലാം വിഫലമായി. 67-ാം മിനുറ്റിൽ ബ്രൂണോ ഫെർണാണ്ടസിനു കിട്ടിയ ഫ്രീ ഹെ‍ഡർ അവസരവും പിക്ക്ഫോർഡ് തട്ടിയകറ്റി. എന്നാൽ നാലു മിനുറ്റുകൾക്കകം പകരക്കാരനായി വന്ന ആന്തണി മാർഷ്യൽ യുണൈറ്റ‍‍ഡിന്റെ രണ്ടാം ​ഗോൾ നേടി. എവർട്ടൺ പ്രതിരോധനിരയിൽ നിന്ന് തട്ടിതെറിച്ച പന്ത് താരം ​ഗോളാക്കി. വിജയത്തോടെ 29- മത്സരങ്ങളിൽ നിന്ന് 56- പോയിന്റുമായി മൂന്നാമതാണ് മാഞ്ചസ്റ്റർ യുണൈറ്റ‍ഡ്. 30- മത്സരങ്ങളിൽ നിന്നായി 27- പോയിന്റ് മാത്രമുളള എവർട്ടൺ 16-ാം സ്ഥാനത്താണ്.