തകർപ്പൻ ഹെഡ്ഡർ ഗോളുമായി ഇസാക്ക്; ആർസനലിനെ കീഴടക്കി ന്യൂകാസിൽ 1-0

ലണ്ടൻ: ഇംഗ്ലീഷ് പ്രീമിയർലീഗിൽ ആർസനലിന് തോൽവി. എതിരില്ലാത്ത ഒരു ഗോളിന് ന്യൂകാസിൽ യുണൈറ്റഡാണ് ഗണ്ണേഴ്‌സിനെ വീഴ്ത്തിയത്. 12ാം മിനിറ്റിൽ അലക്‌സാണ്ടർ ഇസാക്കാണ് വിജയ ഗോൾനേടിയത്. സീസണിലെ ആർസനലിന്റെ രണ്ടാം തോൽവിയാണിത്.

സ്വന്തം തട്ടകമായ സെന്റ് ജെയിംസ് പാർക്കിൽ ആദ്യാവസാനം ആക്രമണത്തിലും പ്രതിരോധത്തിലും മികച്ച പ്രകടനമാണ് ന്യൂകാസിൽ നടത്തിയത്. ആർസനൽ ബോക്‌സിലേക്ക് നിരന്തരം ഇരമ്പിയെത്തിയ ആതിഥേയർ 12ാം മിനിറ്റിൽ നിർണായക ഗോൾ നേടി. വലതുവിങിൽ നിന്ന് ബോക്‌സിലേക്ക് ആന്റണി ഗോർഡൻ നൽകിയ നെടുനീളൻ ക്രോസ് മികച്ചൊരു ഹെഡ്ഡറിലൂടെ അലക്‌സാണ്ടർ ഇസാക്ക് വലയിലാക്കി. ആർസനൽ പ്രതിരോധ താരങ്ങൾക്ക് നോക്കിനിൽക്കാനേ ആയുള്ളൂ. ഗോൾ വഴങ്ങിയതോടെ സന്ദർശകർ ആക്രമണത്തിന്റെ മൂർച്ചകൂട്ടിയെങ്കിലും ഫൈനൽതേർഡിലെ പ്രശ്‌നങ്ങൾ തിരിച്ചടിയായി.

GET INNNNNNN!!!! 🙌 pic.twitter.com/tTYbUm5IPI

— Newcastle United FC (@NUFC) November 2, 2024

പതിവ്മത്സരങ്ങൾപോലെ മധ്യനിരയിൽ മികച്ച നീക്കങ്ങളുമായി കളംനിറയാനും ഗണ്ണേഴ്‌സിനായില്ല. മറുഭാഗത്ത് ലഭിച്ച അവസരങ്ങളിൽ എതിർബോക്‌സിൽ ന്യൂകാസിൽ നിരന്തരം ഭീഷണി സൃഷ്ടിച്ചു. അവസാനമിനിറ്റുകളിൽ ഗണ്ണേഴ്‌സ് ആക്രമണത്തെ കൃത്യമായി പ്രതിരോധിച്ച ന്യൂകാസിൽ സ്വന്തം തട്ടകത്തിൽ നിന്ന് നിർണായക മൂന്ന് പോയന്റ് സ്വന്തമാക്കി.