‘ബാഴ്സക്ക് ഇനി പുതിയ ആരെയും ആവശ്യമില്ല’; 7-0ത്തിന്റെ വിജയത്തിന് പിന്നാലെ റഫീന്യ

മാഡ്രിഡ്: ലാലിഗയിൽ ബാഴ്സലോണ തകർപ്പൻ ഫോം തുടരുന്നതിനിടെ പ്രതികരണവുമായി മുന്നേറ്റ നിര താരം റഫീന്യ. എന്തൊക്കെയാണോ ടീം തേടുന്നത് അതെല്ലാം ഈ സ്ക്വാഡിൽ തന്നെയുണ്ടെന്ന് റഫീന്യ അഭിപ്രായപ്പെട്ടു. വല്ലഡോളിഡിനെതിരായ മത്സരത്തിൽ എതിരില്ലാത്ത ഏഴ് ഗോളുകൾക്ക് ബാഴ്സ വിജയിച്ചതിന് പിന്നാലെയാണ് താരത്തിന്റെ പ്രതികരണം. നീ​ക്കോ വില്യംസ് അടക്കമുള്ള താരങ്ങളെ ക്ലബിലെത്തിക്കാൻ ബാഴ്സ ശ്രമിക്കുന്നതിനിടെയാണ് താരത്തിന്റെ പ്രതികരണമെന്നത് ശ്രദ്ധേയമാണ്.

മത്സരത്തിൽ ഹാട്രിക്കും ഗോളും രണ്ട് അസിസ്റ്റുമായി റഫീന്യ നിറഞ്ഞാടിയിരുന്നു.‘‘ടീം തേടുന്നതെല്ലാം ഈ സ്ക്വാഡിൽ തന്നെയുണ്ടെന്ന് ഇന്നത്തെ മത്സരം തെളിയിച്ചിരിക്കുന്നു. അതിൽ ഞങ്ങൾ സന്തോഷവാന്മാരാണ്. ഈ ടീം ഇപ്പോൾ മികച്ച ഘടനയിലാണ്. ഞങ്ങൾ കഠിനാധ്വാനം ചെയ്തിരുന്നു. ഇന്നത്തെ ഫലത്തിൽ അത് കാണാം. ഞങ്ങളുടെ കോച്ച് സൈഡ് ലൈനിരുന്ന് കൂടുതൽ ഗോള​ുകൾ അടിക്കാൻ പറയുകയായിരുന്നു. അതാണ് ഞങ്ങളുടെ മെന്റാലിറ്റി. പരമാവധി ഗോളുകൾ അടിച്ചുകൂട്ടാൻ ഞങ്ങൾ അക്ഷമരായി കാത്തിരിക്കുകയാണ്’’ - റഫീന്യ പ്രതികരിച്ചു.

കടുത്ത സാമ്പത്തിക പ്രതിസന്ധി ക്ലബിന് മുകളിൽ തൂങ്ങി നിൽക്കുമ്പോഴും ലാലിഗയിൽ തകർപ്പൻ പ്രകടനമാണ് ബാഴ്സ പുറത്തെടുക്കുന്നത്. നാല് മത്സരങ്ങളിൽ നാലും ജയിച്ച ബാഴ്സലോണ പോയന്റ് പട്ടികയിൽ ഒന്നാമതാണ്. ബദ്ധവൈരികളായ റയൽ മാഡ്രിഡിന് മൂന്ന് കളികളിൽ അഞ്ച് പോയന്റ് മാത്രമേയുള്ളൂ.