കശ്‍മീരും കടന്ന് കേരളം; ഫൈനല്‍ റൗണ്ടിലേക്ക്‌ ഇനി ഒരു ജയത്തിന്‍റെ ദൂരം

കോഴിക്കോട്: സന്തോഷ് ട്രോഫി ഫുട്‌ബോളിൽ കേരളം വിജയക്കുതിപ്പ് തുടരുന്നു. എതിരില്ലാത്ത മൂന്നു ഗോളുകൾക്ക് ജമ്മു കശ്മീരിനെയാണ് ഇന്ന് കേരളം തകർത്തത്. കേരളത്തിന്റെ തുടർച്ചയായ നാലാം ജയമാണിത്. ഈ ജയത്തോടെ കേരളം ഫൈനൽ റൗണ്ട് സാധ്യതകൾ സജീവമാക്കി. 12 പോയിന്റുമായി ഗ്രൂപ്പിൽ ഒന്നാം സ്ഥാനത്താണിപ്പോൾ കേരളം.

ഗോൾ രഹിതമായ ഒന്നാം പകുതിക്ക് ശേഷമായിരുന്നു കേരളത്തിന്റെ തകർപ്പൻ പ്രകടനം. 51ാം മിനിറ്റിൽ വിഘ്‌നേഷാണ് കേരളത്തിനായി ആദ്യം വലകുലുക്കിയത്. 76ാം മിനിറ്റിൽ കേരളത്തിന്റെ രണ്ടാം ഗോളുമെത്തി. ഇക്കുറി രിസ്‍വാന്‍ അലിയുടെ ഊഴമായിരുന്നു. വിശാഖ് മോഹൻ നീട്ടി നൽകിയ പന്തിനെ രിസ്‍വാന്‍ മനോഹരമായി വലയിലെത്തിച്ചു. കളിയവസാനിക്കാൻ നിമിഷങ്ങൾ മാത്രം ബാക്കി നിൽക്കേ ഇഞ്ചുറി ടൈമിലാണ് കേരളം ഗോൾപട്ടിക പൂർത്തിയാക്കിയത്. വിഘ്‌നേഷിന്റെ പാസിൽ നിജോ ഗിൽബർട്ടാണ് വലകുലുക്കിയത്.

ഞായറാഴ്ച മിസോറാമിനെതിരെ നടക്കുന്ന ഗ്രൂപ്പിലെ അവസാന മത്സരത്തിൽ വിജയിച്ചാൽ കേരളത്തിന് ഫൈനൽറൗണ്ടിലേക്ക് മുന്നേറാം.