ഷൂട്ടൗട്ട്​ ദുരന്തം: യുറുഗ്വായോട്​ തോറ്റ്​ ​ബ്രസീൽ പുറത്ത്​

ലാസ് വേഗാസ്:കോപ്പ അമേരിക്കയിൽ നിന്നും ബ്രസീലിന്​ വീണ്ടും കണ്ണീർമടക്കം. നിശ്ചിത സമയത്ത്​ ​ഗോൾ രഹിതമായ മത്സരം ഷൂട്ടൗട്ടിലേക്ക്​ നീണ്ടപ്പോൾ 4-2നായിരുന്നു യുറുഗ്വായ്​ വിജയം. 74ാം മിനുറ്റിൽ യുറുഗ്വായു​ടെ നഹിതാൻ നാൻഡെസ്​ ചുവപ്പുകാർഡ്​ കണ്ട്​ പുറത്തായെങ്കിലും മുതലെടുക്കാൻ ബ്രസീലിനായില്ല. പനാമയെ എതിരില്ലാത്ത അഞ്ചുഗോളുകൾക്ക്​ തകർത്തുവരുന്ന കൊളംബിയയാണ്​ സെമിയിൽ യുറുഗ്വായുടെ എതിരാളികൾ.

വീനീഷ്യസിന്​ പകരം പുതുപ്രതീക്ഷയായ എൻട്രിക്കിനെ മുന്നിൽ നിർത്തിയാണ്​ ബ്രസീൽ തുടങ്ങിയത്​. 4-2-3-1 എന്ന ഫോർമേഷനിൽ ഇറങ്ങിയ ബ്രസീൽ​ പന്തടക്കത്തിലും പാസിങ്ങിലും മുന്നിൽ നിന്നെങ്കിലും ഗോൾ നേടാനായില്ല. മത്സരത്തിലുടനീളം ഫൗളുകൾ നിറഞ്ഞുനിന്നു. യുറുഗ്വായ്​ 26 ഉം ബ്രസീൽ 15ഉം ഫൗളുകളാണ്​ മത്സരത്തിൽ ചെയ്​തത്​.

പത്തുപേരിലേക്ക്​ ചുരുങ്ങിയ യുറുഗ്വായ്​ പ്രതിരോധത്തിലേക്ക്​ വലിഞ്ഞെങ്കിലും ബ്രസീലിന്​ ​ഗോളിലേക്ക്​ നിറയൊഴിക്കാനായില്ല. സാവിന്യോ, പെരരേ, ലൂയിസ്​ അടക്കമുള്ളവരെ കോച്ച്​ സബ്​സ്​റ്റിറ്റ്യൂട്ടായി വിളിച്ചെങ്കിലും മാറ്റമുണ്ടാക്കാനായില്ല.

ഷൂട്ടൗട്ടിൽ യുറുഗ്വായ്​ക്കായി ആദ്യം കിക്കെടുത്ത വാൽവെർഡെ സ്​കോർ ചെയ്​തപ്പോൾ ബ്രസീലിനായെത്തിയ മിലിറ്റാവോക്ക്​ പിഴച്ചു. തുടർച്ചയായി സ്​കോർ ചെയ്​ത്​ ഷൂട്ടൗട്ടിൽ യുറുഗ്വായ്​ ആത്മവിശ്വാസമുയർത്തി. ബ്രസീലിനായി മൂന്നാം കിക്കെടുക്കാനെത്തിയ ഡഗ്ലസ്​ ലൂയിസ്​ പോസ്​റ്റിലടിച്ചതോടെ യുറുഗ്വായ്​ 3-1ന്​ മുന്നിൽ. തൊട്ടുപിന്നാ​ലെ ഗ്വിമനസി​െൻറ ഷോട്ട്​ അലിസൺ തടുത്തി​ട്ടെങ്കിലും നിർണായക കിക്കെടുക്കാനെത്തിയ ഉഗാർ​ട്ടെ ലക്ഷ്യം കണ്ടതോടെ മൈതാനത്ത്​ ബ്രസീൽ കണ്ണീർ വീണു.