ഇഞ്ചുറി ടൈമിൽ മക്ടോമിനേ മാജിക്; യുണൈറ്റഡ് ഈസ് ബാക്ക്

ഓള്‍ഡ് ട്രാഫോഡ്: 90 മിനിറ്റ് നേരം എതിരില്ലാത്ത ഒരു ഗോളിന് പിന്നിട്ട് നിൽക്കുക. ഇഞ്ചുറി ടൈമിൽ നേടിയ രണ്ട് ഗോളിൽ ഐതിഹാസിക തിരിച്ചു വരവ് നടത്തുക. ഓൾഡ് ട്രാഫോഡിനെ ആവേശക്കൊടുമുടി കയറ്റിയ പോരാട്ടത്തിൽ മാഞ്ചസ്റ്റർ യുണൈറ്റഡിന് തകർപ്പൻ ജയം. ഇഞ്ചുറി ടൈം ത്രില്ലറിൽ ബ്രെൻഡ്‌ഫോർഡിനെ ഒന്നിനെതിരെ രണ്ട് ഗോളുകൾക്കാണ് റെഡ് ഡെവിൾസ് തകര്‍ത്തത്.

ഇതോടെ തുടർ തോൽവികളിൽ നിരന്തര വിമർശനങ്ങൾ നേരിട്ടിരുന്ന എറിക് ടെൻഹാഗിന്റെ കളിക്കൂട്ടം വിജയവഴിയിൽ തിരിച്ചെത്തി. മത്സരത്തിന്റെ 26 ാം മിനിറ്റിൽ മതിയാസ് ജെൻസണിലൂടെ മുന്നിലെത്തിയ ബ്രെൻഡ് ഫോർഡ് 90ാം മിനിറ്റ് വരെ ഓൾഡ് ട്രാഫോഡിൽ കോട്ടകെട്ടി. എന്നാൽ ഇഞ്ചുറി ടൈം ആരംഭിച്ച് മൂന്നാം മിനിറ്റിൽ മക്ടോമിനേ ആദ്യ വെടിപൊട്ടിച്ചു.

പെനാൽട്ടി ബോക്‌സിലെ കൂട്ടപ്പൊരിച്ചിലിനൊടുവിലാണ് ആദ്യ ഗോൾ പിറന്നത്. ബോൾ ക്ലിയർ ചെയ്യാനുള്ള ബ്രെൻഡ്‌ഫോർഡ് താരങ്ങളുടെ ശ്രമങ്ങൾക്കിടെ പന്ത് മക്ടോമിനേയുടെ കാലുകളിലേക്ക്. രണ്ടാമതൊന്നാലോചിക്കാതെ മക്ടോമിനേ ഗോള്‍വലയെ ലക്ഷ്യമാക്കി വെടിയുതിർത്തു.

അടുത്ത ഗോൾ പിറക്കാനെടുത്തത് വെറും നാല് മിനിറ്റ്. ഇഞ്ചുറി ടൈമിന്റെ അവസാന മിനിറ്റില്‍ ഹാരി മഗ്വെയറിന്റെ തലയിൽ നിന്ന് പാഞ്ഞെത്തിയ പന്തിനെ തകർപ്പനൊരു ഹെഡ്ഡറിലൂടെ മക്ടൊമിനേ വലയിലാക്കി. ഓൾഡ് ട്രാഫോഡ് ഇളകി മറിഞ്ഞു.