പ്രമേഹ രോഗികള്‍ക്ക് തണ്ണിമത്തൻ കഴിക്കാമോ? അറിയേണ്ടതെല്ലാം..

ചൂട് കാലത്ത് മിക്ക ആളുകള്‍ക്കും ഇഷ്ടപ്പെട്ട ഒന്നാണ് തണ്ണിമത്തൻ. ചുട്ടുപൊള്ളുമ്പോള്‍ ശരീരത്തിനും മനസിനും കുളിരേകുന്ന തണ്ണിമത്തനിൽ ഉയർന്ന അളവിൽ ജലാംശം അടങ്ങിയിട്ടുണ്ട്. ധാരാളം ആരോഗ്യഗുണങ്ങൾ പ്രദാനം ചെയ്യുന്ന തണ്ണിമത്തൻ ഉയർന്ന പോഷകഗുണമുള്ള പഴമാണ്. എന്നാൽ ജലാംശത്തോടൊപ്പം മധുരവും അടങ്ങിയ തണ്ണിമത്തൻ പ്രമേഹരോഗികൾക്ക് ദോഷകരമാണോ? തണ്ണിമത്തൻ കഴിക്കുന്നത് രക്തത്തിലെ പഞ്ചസാരയുടെ അളവ് കൂട്ടുമോ? പ്രമേഹമുള്ളവരുടെ മനസിൽ ഉയരുന്ന ചില ചോദ്യങ്ങളാണിത്. പ്രമേഹരോഗികള്‍ക്കും തണ്ണിമത്തൻ കഴിക്കാമെന്നാണ് ഇതിന് ഉത്തരം.

ഡോ. ഭട്ട് പറയുന്നതനുസരിച്ച് തണ്ണിമത്തൻ പ്രമേഹരോഗികൾക്ക് ദോഷകരമല്ല, പക്ഷേ പ്രമേഹമുള്ളവർ ഇത് മിതമായ അളവിൽ കഴിക്കുകയും അവരുടെ രക്തത്തിലെ പഞ്ചസാരയുടെ അളവ് ഫലപ്രദമായി നിയന്ത്രിക്കാൻ മൊത്തത്തിലുള്ള ഭക്ഷണക്രമം ക്രമീകരിക്കുകയും വേണം. പ്രമേഹമുള്ളവർ തണ്ണിമത്തൻ കഴിച്ചതിനുശേഷം അവരുടെ രക്തത്തിലെ പഞ്ചസാരയുടെ അളവ് നിരീക്ഷിക്കുകയും ചെയ്യേണ്ടത് ആവശ്യമാണ്. പ്രമേഹമുള്ള ആളുകളുടെ വ്യക്തിഗത പോഷകാഹാര പദ്ധതി വികസിപ്പിക്കുന്നതിന് ഒരു ഹെൽത്ത് കെയർ പ്രൊഫഷണലുമായി കൂടിയാലോചിക്കുന്നതും നല്ലതാണ്.

എന്നാൽ പ്രമേഹമുള്ളവർക്ക് ആരോഗ്യകരവും സമീകൃതവുമായ ഭക്ഷണത്തിന്റെ ഭാഗമായി ആസ്വദിക്കാൻ കഴിയുന്ന നിരവധി വേനൽക്കാല പഴങ്ങൾ ഉണ്ട്. പ്രമേഹരോഗികൾക്ക് സ്ട്രോബെറി, റാസ്ബെറി, ബ്ലൂബെറി, ബ്ലാക്ക്ബെറി തുടങ്ങിയ സരസഫലങ്ങളാണ് പ്രധാനമായും വിദഗ്ധർ നിർദ്ദേശിക്കുന്നത്. ഇവയിൽ പഞ്ചസാര കുറവും നാരുകൾ കൂടുതലും ഉള്ളതിനാൽ പ്രമേഹമുള്ളവർക്കുള്ള മികച്ച തെരഞ്ഞെുപ്പാണിത്. പ്ലംസിൽ കലോറി കുറവും നാരുകൾ, വിറ്റാമിനുകൾ, ധാതുക്കൾ എന്നിവയും കൂടുതലാണ്. അവ ആന്റിഓക്‌സിഡന്റുകളുടെ നല്ല ഉറവിടം കൂടിയാണ്, മാത്രമല്ല രക്തത്തിലെ പഞ്ചസാരയുടെ അളവ് നിയന്ത്രിക്കാനും ഇത് സഹായിച്ചേക്കാം. മാർഗമാണിത്.

തണ്ണിമത്തന്റെ ആരോഗ്യ ഗുണങ്ങൾ

ധാരാളം ആരോഗ്യഗുണങ്ങൾ പ്രദാനം ചെയ്യുന്ന ഉയർന്ന പോഷകഗുണമുള്ള പഴമാണ് തണ്ണിമത്തൻ. ഉയർന്ന അളവിൽ വെള്ളം അടങ്ങിയിരിക്കുന്നതിനാൽ ജലാംശം നിലനിർത്താനുള്ള മികച്ച മാർഗമാണിത്.

1. ഹൃദയാരോഗ്യം

തണ്ണിമത്തനിൽ അടങ്ങിയ പോഷകങ്ങൾ ഹൃദയാരോഗ്യത്തെ സഹായിക്കുന്നവയാണ്. കൊളസ്ട്രോളും രക്തസമ്മർദ്ദവും കുറയ്ക്കാൻ തണ്ണിമത്തനിൽ അടങ്ങിയിരിക്കുന്ന ലൈക്കോപീൻ സഹായിക്കുമെന്നാണ് പഠനങ്ങൾ സൂചിപ്പിക്കുന്നത്. ഉയർന്ന കൊളസ്ട്രോൾ മൂലമുണ്ടാകുന്ന ഓക്സിഡേറ്റീവ് കേടുപാടുകൾ തടയാനും ഇത് സഹായിച്ചേക്കാം. തണ്ണിമത്തനിൽ സിട്രുലിൻ എന്ന അമിനോ ആസിഡും അടങ്ങിയിട്ടുണ്ട്, ഇത് ശരീരത്തിലെ നൈട്രിക് ഓക്സൈഡിന്റെ അളവ് വർദ്ധിപ്പിക്കും. നൈട്രിക് ഓക്സൈഡ് രക്തക്കുഴലുകൾ വികസിപ്പിക്കാൻ സഹായിക്കുകയും ഇതിലൂടെ രക്തസമ്മർദ്ദം കുറയുകയും ചെയ്യുന്നു.

2. ദഹനം മെച്ചപ്പെടുത്താം

തണ്ണിമത്തനിൽ ധാരാളം വെള്ളവും ചെറിയ അളവിൽ നാരുകളും അടങ്ങിയിട്ടുണ്ട്. ഇവ രണ്ടും ആരോഗ്യകരമായ ദഹനത്തിന് ആവശ്യമാണ്. ഫൈബർ കുടലിന്‍റെ പ്രവർത്തനത്തെ സഹായിക്കുമ്പോള്‍ വെള്ളം ദഹനനാളത്തിലൂടെ മാലിന്യങ്ങളെ കൂടുതൽ കാര്യക്ഷമമായി നീക്കം ചെയ്യുന്നു.

3. ചർമ്മത്തിന്റെ ആരോഗ്യം മെച്ചപ്പെടുത്താൻ സഹായിക്കുന്നു

തണ്ണിമത്തനിൽ അടങ്ങിയിരിക്കുന്ന വിറ്റമിൻ എ, സി എന്നിവ ചർമ്മത്തിന്റെ ആരോഗ്യത്തെ മെച്ചപ്പെടുത്താൻ സഹായിക്കുന്നവയാണ്. വിറ്റമിൻ സി അടങ്ങിയ ഭക്ഷണങ്ങള്‍ കഴിക്കുന്നത് ശരീരത്തെ കൊളാജൻ നിർമ്മിക്കാൻ സഹായിക്കുന്നു. കൊളാജൻ ചർമ്മത്തെ മൃദുലമാക്കുകയും മുടിയെ ശക്തമാക്കുകയും ചെയ്യുന്നു. ചർമ്മകോശങ്ങൾ സൃഷ്ടിക്കാൻ സഹായിക്കുന്ന ഒന്നാണ് വൈറ്റമിൻ എ.

4. കണ്ണിന്‍റെ ആരോഗ്യം വർധിപ്പിക്കുന്നു

തണ്ണിമത്തനിൽ അടങ്ങിയ ലൈക്കോപീൻ കണ്ണുകൾക്ക് ഏറെ ഗുണകരമായ ഒന്നാണ്. പ്രായമായവരിൽ അന്ധതയ്ക്ക് കാരണമാകുന്ന നേത്ര പ്രശ്നമാണ് മാക്യുലർ ഡീജനറേഷൻ (എഎംഡി). മാക്യുലർ ഡീജനറേഷൻ തടയാനും കണ്ണിന്റെ ആരോഗ്യം വർധിപ്പിക്കാനും തണ്ണിമത്തൻ സഹായിക്കും. കൂടാതെ തണ്ണിമത്തനിലെ ബീറ്റാ കരോട്ടിൻ, വിറ്റാമിൻ സി, ല്യൂട്ടിൻ, സിയാക്സാന്തിൻ എന്നിവ കണ്ണുകളെ സംരക്ഷിക്കും. കണ്ണുകൾ വരളുന്നതും ഗ്ലോക്കോമയും പോലുള്ള അസുഖങ്ങളിൽ നിന്നും ഇത് കണ്ണുകളെ സംരക്ഷിക്കുന്നു.

5. ശരീരത്തിലെ ജലാംശം നിലനിർത്താൻ സഹായിക്കുന്നു

ശരീരത്തിന്‍റെ താപനില, അവയവങ്ങളുടെ പ്രവർത്തനം, കോശങ്ങളിലേക്കുള്ള പോഷക വിതരണം എന്നിവ മതിയായ ജലാംശത്തെ ആശ്രയിക്കുന്ന ശാരീരിക പ്രക്രിയകളാണ്. ഉയർന്ന ജലാംശമുള്ള ഭക്ഷണങ്ങൾ കഴിക്കുന്നത് ശരീരത്തിന് ശരിയായ രീതിയിൽ പ്രവർത്തിക്കാൻ ആവശ്യമായ വെള്ളം നൽകാൻ സഹായിക്കും. 92% വെള്ളം അടങ്ങിയ തണ്ണിമത്തൻ കഴിക്കുന്നത് വെള്ളം കുടിക്കുന്നതിന് സമാനമാണ്. കുറഞ്ഞ അളവിൽ കലോറി അടങ്ങിയ ഭക്ഷണമായതിനാൽ തണ്ണിമത്തൻ കഴിക്കുന്നതിലൂടെ കൂടുതൽ നേരം വയറുനിറഞ്ഞിരിക്കുകയും ശരീരഭാരം നിയന്ത്രിക്കാൻ സഹായിക്കുകയും ചെയ്യും

6. പോഷകങ്ങളാൽ സമ്പന്നം

തണ്ണിമത്തനിൽ പൊട്ടാസ്യം, മഗ്നീഷ്യം, വൈറ്റമിൻ എ, സി എന്നിവയുൾപ്പെടെ വിവിധ പോഷകങ്ങൾ അടങ്ങിയിട്ടുണ്ട്. താരതമ്യേന കലോറി കുറഞ്ഞ ഭക്ഷണം കൂടിയാണ് തണ്ണിമത്തൻ. സിട്രുലിൻ എന്ന അമിനോ ആസിഡിന്റെ സമ്പന്നമായ ഉറവിടമാണ് തണ്ണിമത്തൻ. കൂടാതെ, വൈറ്റമിൻ സി, കരോട്ടിനോയിഡുകൾ, ലൈക്കോപീൻ, കുക്കുർബിറ്റാസിൻ ഇ എന്നിവയുൾപ്പെടെയുള്ള ആന്റിഓക്‌സിഡന്റുകൾ ഇതിൽ അടങ്ങിയിട്ടുണ്ട്.

ഈ സംയുക്തങ്ങൾ ഫ്രീ റാഡിക്കലുകളെ ചെറുക്കാൻ സഹായിക്കുന്നു, അസ്ഥിരമായ തന്മാത്രകൾ നിങ്ങളുടെ ശരീരത്തിൽ അടിഞ്ഞുകൂടുകയാണെങ്കിൽ അവ നിങ്ങളുടെ കോശങ്ങളെ നശിപ്പിക്കും. കാലക്രമേണ ഇവ പ്രമേഹം, ഹൃദ്രോഗം, കാൻസർ തുടങ്ങിയ അവസ്ഥകളിലേക്ക് നയിച്ചേക്കാം.