ബാബരി പള്ളി തകർത്ത കേസിലെ പ്രതികളെ വെറുതെവിട്ട ജഡ്​ജിയെ ഉപ​ ലോകായുക്തയായി നിയമിച്ചു

ബാബരി മസ്​ജിദ്​ തകർത്ത കേസിൽ ബി.ജെ.പി നേതാവ്​ എൽ.കെ. അദ്വാനി അടക്കം മുഴുവൻ പ്രതികളെയും വെറുതെവിട്ട റിട്ട. സി.ബി.ഐ ജഡ്​ജിയെ ഉത്തർപ്രദേശ്​ സർക്കാർ ഉപ ലോകായുക്തയായി നിയമിച്ചു. ജഡ്​ജി സുരേന്ദ്ര കുമാർ യാദവിനെയാണ്​ വിരമിച്ചശേഷം ഉപ ലോകായുക്തയായി നിയമിച്ചത്​.

യാദവിനെ മൂന്നാം ഉപ ലോകായുക്തയായി ഗവർണർ ഏപ്രിൽ 6ന്​ നിയമിച്ചിരുന്നു. ലോകായുക്​ത സഞ്​ജയ്​ മിശ്ര മുമ്പാകെ അദ്ദേഹം സത്യപ്രതിജ്ഞ ചെയ്​ത്​ അധികാരമേറ്റുവെന്ന് ഔദ്യോഗിക അറിയിപ്പിൽ പറയുന്നു. സി.ബി.ഐ പ്രത്യേക കോടതി ജഡ്​ജി ആയിരിക്കെ ബാബരി പള്ളി തകർത്ത കേസിൽ 2020 സെപ്​തംബര്‍ 30നാണ് എൽ.കെ അദ്വാനി, മുരളീ മനോഹർ ജോഷി, ഉമാഭാരതി, കല്യാൺ സിങ്​ എന്നിവരടക്കം 32 പ്രതികളെയും ​വെറുതെവിട്ട് വിധി പ്രസ്​താവിച്ചത്.

പൊതുപ്രവർത്തകർക്കും ഉദ്യോഗസ്ഥർക്കും എതിരായ അഴിമതി, അധികാരദുർവിനിയോഗം തുടങ്ങിയ ആരോപണങ്ങൾ അന്വേഷിക്കുന്ന സ്​റ്റാറ്റ്യൂട്ടറി അതോറിറ്റിയായ ലോകായുക്തയിൽ ഒരു ലോകായുക്തയും മൂന്ന്​ ഉപ ലോകായുക്തമാരുമാണ്​ ഉണ്ടാവുക. 2016 ആഗസ്ത് 4 ന് നിയമിതനായ ശംഭു സിംഗ് യാദവ്, 2020 ജൂൺ 6ന് നിയമിതനായ ദിനേശ് കുമാർ സിംഗ് എന്നിവരാണ് മറ്റ് രണ്ട് ലോകായുക്തകൾ. എട്ടു വർഷമാണ്​ കാലാവധി.