ഫേസ്ബുക്കില്‍ ലൈക്കും ഷെയറും കമന്‍റും കൂടുതല്‍ വ്യാജ വാര്‍ത്തകള്‍ക്ക്, പഠനം
തെറ്റിദ്ധരിപ്പിക്കുന്ന വിവരങ്ങള്‍ പങ്കിടാനുള്ള പ്രവണത പ്രസാധകരില്‍ കൂടുതലാണെന്നും പഠനം കണ്ടെത്തി
ഫെയ്‌സ്ബുക്കില്‍ ശരിയായ വാര്‍ത്തകളേക്കാള്‍ ആളുകള്‍ കൂടുതല്‍ കാണുന്നതും ഷെയര്‍ ചെയ്യുന്നതും വ്യാജവാര്‍ത്തകളിലെന്ന് പഠനം. ന്യൂയോര്‍ക്ക് സര്‍വകലാശാലയിലേയും ഫ്രാന്‍സിലെ ഗ്രെനോബിള്‍ ആല്‍പ്‌സ് സര്‍വകലാശാലയിലേയും ഗവേഷകര്‍ നടത്തിയ പഠനത്തിലാണ് കണ്ടെത്തല്‍.
ശരിയായ വാര്‍ത്തകളേക്കാള്‍ വ്യാജ വാര്‍ത്തകളില്‍ ആറിരട്ടി ഇടപെടല്‍ നടക്കുന്നുണ്ടെന്ന് പഠനം പറയുന്നു. 2020 ആഗസ്റ്റ് മുതല്‍ 2021 ജനുവരി വരെയുള്ള കാലയളവില്‍ 2500ലേറെ വാര്‍ത്താ പോര്‍ട്ടലുകളുടെ പേജുകളെ പഠനത്തിനെടുത്ത ശേഷമാണ് ഗവേഷകര്‍ റിപ്പോര്‍ട്ട് സമര്‍പ്പിച്ചത്.
വ്യാജ വാര്‍ത്തകള്‍ വരുന്ന പേജുകളില്‍ നിരന്തരം കൂടുതല്‍ ലൈക്കുകളും ഷെയറുകളും കമന്‍റുകളും വരുന്നുണ്ട്. തെറ്റിദ്ധരിപ്പിക്കുന്ന വിവരങ്ങള്‍ പങ്കിടാനുള്ള പ്രവണത പ്രസാധകരില്‍ കൂടുതലാണെന്നും പഠനം കണ്ടെത്തി. നവംബറില്‍ നടക്കുന്ന ഇന്‍റര്‍നെറ്റ് മെഷര്‍മെന്‍റ് കോണ്‍ഫറന്‍സിന് മുന്നോടിയായി ഈ ഗവേഷണ പഠന റിപ്പോര്‍ട്ട് പ്രസിദ്ധീകരിക്കും.
ഫെയ്‌സ്ബുക്ക് ഉള്ളടക്കങ്ങളുടെ റീച്ചിന്‍റെ വിവരങ്ങള്‍ കമ്പനി ഗവേഷര്‍ക്ക് ലഭ്യമാക്കുന്നില്ല. ഇതിന് പകരം ഫെയ്‌സ്ബുക്കിന്‍റെ തന്നെ ക്രൗഡ് ടാങ്കിള്‍ സേവനം ഉപയോഗിച്ചാണ് ഗവേഷകര്‍ വിവരശേഖരണം നടത്തുന്നത്.
Adjust Story Font
16
