വാട്‌സ്ആപ്പില്‍ മള്‍ട്ടി-ഡിവൈസ് 2.0, മെസേജ് റിയാക്ഷന്‍ ഫീച്ചറുകള്‍ ഉടന്‍
മാതൃസ്ഥാപനമായ ഫെയ്‌സ്ബുക്കിന്റെ ഉടമസ്ഥതയിലുള്ള ഇന്‍സ്റ്റഗ്രാമിലും, ഫെയ്‌സ്ബുക്ക് മെസഞ്ചറിലും സന്ദേശങ്ങള്‍ക്ക് റിയാക്ഷനുകള്‍ നല്‍കാനാവും
വാട്‌സ്ആപ്പില്‍ മള്‍ട്ടി-ഡിവൈസ് 2.0, മെസേജ് റിയാക്ഷന്‍ ഫീച്ചറുകള്‍ ഉടന്‍ ഉപഭോക്താക്കളിലെത്തും. ഫേസ്ബുക്കിന്റെ ഉടമസ്ഥതയിലുള്ള കമ്പനി വാട്‌സാപ്പിന്റെ വരാനിരിക്കുന്ന അപ്‌ഡേറ്റില്‍ മള്‍ട്ടി-ഡിവൈസ് സപ്പോര്‍ട്ട് ഉള്‍പ്പെടുത്തുന്നതിനായി പ്രവര്‍ത്തിക്കുന്നുണ്ട്. ഈ ഫീച്ചര്‍ ഇതിനകം തന്നെ ബീറ്റ പതിപ്പില്‍ ലഭ്യമാണ്. ഇതിനൊപ്പം വാട്‌സ്ആപ്പിന്റെ ഐപാഡിനായുള്ള പതിപ്പും ഉടന്‍ യാഥാര്‍ത്ഥ്യമാകും.
വാട്‌സ്ആപ്പിനെക്കുറിച്ചുള്ള വാര്‍ത്തകള്‍ നല്‍കുന്ന ഡബ്ല്യുഎ ബീറ്റ ഇന്‍ഫോ എന്ന ബ്ലോഗിലെഒരു റിപ്പോര്‍ട്ടില്‍ വാട്‌സ്ആപ്പ് ''മള്‍ട്ടി-ഡിവൈസ് 2.0'' ഫീച്ചറില്‍ പ്രവര്‍ത്തിക്കാന്‍ തുടങ്ങിയതായി പറയുന്നു. ഉപയോക്താക്കള്‍ക്ക് ഉടന്‍ തന്നെ അവരുടെ ഐപാഡ് ഒരു പുതിയ ലിങ്ക് ചെയ്ത ഉപകരണമായി ഉപയോഗിക്കാന്‍ കഴിയുമെന്നും റിപ്പോര്‍ട്ടില്‍ പറയുന്നു. ആന്‍ഡ്രോയിഡ് ടാബ്ലെറ്റുകള്‍ക്ക് വാട്ട്സ്ആപ്പിന്റെ മള്‍ട്ടി-ഡിവൈസ് പിന്തുണയും ലഭിക്കുമെന്ന് റിപ്പോര്‍ട്ട് വ്യക്തമാക്കുന്നു.
നാല് ഉപകരണങ്ങളും ഒരു സ്മാര്‍ട്ട്ഫോണും വരെ ബന്ധിപ്പിക്കാന്‍ വാട്ട്സ്ആപ്പ് നിങ്ങളെ അനുവദിക്കുന്നുവെന്ന് പറയപ്പെടുന്നു. നിങ്ങളുടെ ഫോണ്‍ കണക്റ്റ് ചെയ്യാതെ തന്നെ ഒന്നിലധികം ഉപകരണങ്ങളില്‍ വാട്ട്സ്ആപ്പ് ഉപയോഗിക്കാന്‍ ഈ ഫീച്ചര്‍ സഹായിക്കുമെന്ന് വാട്ട്സ്ആപ്പ് വക്താവ് ടെക് റാഡറിനോട് പറഞ്ഞു.നിലവില്‍ വാട്‌സ്ആപ്പ് ഫോണിന് പുറമെ ഡെസ്‌ക്ടോപ്പിലും വെബ് ബ്രൌസറിലും തുറക്കാനാവും. എന്നാല്‍ ഫോണില്‍ വാട്‌സ്ആപ്പ് ലോഗിന്‍ ചെയ്ത് ഫോണ്‍ ഇന്റര്‍നെറ്റുമായി കണക്ട് ചെയ്തിട്ടുണ്ടെങ്കില്‍ മാത്രമേ മറ്റ് ഉപകരണങ്ങളില്‍ ഇത്തരത്തില്‍ വാട്‌സ്ആപ്പ് ഉപയോഗിക്കാനാവൂ. എന്നാല്‍ മള്‍ട്ടി ഡിവൈസ് സപ്പോര്‍ട്ടില്‍ വരുന്ന പുതിയ മാറ്റം പ്രകാരം ഫോണ്‍ ഇന്റര്‍നെറ്റുമായി കണക്ടഡ് അല്ലെങ്കിലും മറ്റ് ഉപകരണങ്ങളില്‍ വാട്‌സ്ആപ്പ് ഉപയോഗിക്കാം.
''മള്‍ട്ടി-ഡിവൈസ് സപ്പോര്‍ട്ട് പ്രകാരം വാട്‌സ്ആപ്പ് ഫോണില്‍ കണക്റ്റ് ചെയ്യാതെ തന്നെ, വാട്ട്സ്ആപ്പ് വെബ്, ഡെസ്‌ക്ടോപ്പ്, പോര്‍ട്ടല്‍ എന്നിവയില്‍ ലഭ്യമാകും. ഞങ്ങളുടെ മള്‍ട്ടി-ഡിവൈസ് ശേഷി ഡെസ്‌ക്ടോപ്പ്/വെബ്, പോര്‍ട്ടല്‍ എന്നിവ ഉപയോഗിക്കുന്ന ആളുകള്‍ക്ക് അനുഭവം മികച്ചതാക്കുന്നു. കാലക്രമേണ കൂടുതല്‍ തരം ഉപകരണങ്ങള്‍ക്കുള്ള പിന്തുണ ചേര്‍ക്കുന്നത് ഇത് സാധ്യമാക്കും,'' വാട്ട്സ്ആപ്പ് വക്താവ് പറഞ്ഞു. കൂടാതെ, വാബീറ്റ ഇന്‍ഫോയുടെ ഏറ്റവും പുതിയ റിപ്പോര്‍ട്ട് അനുസരിച്ച്, ആപ്പില്‍ മെസേജ് റിയാക്ഷന്‍ ഫീച്ചര്‍ ചേര്‍ക്കാനും വാട്ട്സ്ആപ്പ് പദ്ധതിയിടുന്നു. ഈ ഫീച്ചര്‍ ഇതിനകം ഐഒഎസ് പതിപ്പില്‍ വന്നിട്ടുണ്ട്. ഇത് ഇപ്പോള്‍ ആന്‍ഡ്രോയ്ഡ് 2.21.20.8 ബീറ്റയിലും ലഭ്യമാണ്. ഫെയ്‌സ്ബുക്ക് പോസ്റ്റുകള്‍ക്ക് ലൈക്കും റിയാക്ഷനുകളും നല്‍കാന്‍ കഴിയുന്നത് പോലെ വാട്‌സ്ആപ്പില്‍ വരുന്ന സന്ദേശങ്ങള്‍ക്കും ലൈക്കും റിയാക്ഷനുകളും നല്‍കാനുള്ള ഫീച്ചര്‍ ആണ് ഇത്.
മാതൃസ്ഥാപനമായ ഫെയ്‌സ്ബുക്കിന്റെ ഉടമസ്ഥതയിലുള്ള ഇന്‍സ്റ്റഗ്രാമിലും, ഫെയ്‌സ്ബുക്ക് മെസഞ്ചറിലും സന്ദേശങ്ങള്‍ക്ക് റിയാക്ഷനുകള്‍ നല്‍കാനാവും. ഈ മെസേജുകളില്‍ ടാപ്പ് ചെയ്താല്‍ റിയാക്ഷനുകള്‍ ലഭ്യമാവും. സമാന രീതിയിലാവും വാട്‌സ്ആപ്പിലും റിയാക്ഷനുകള്‍ ലഭ്യമാവുക.
Adjust Story Font
16
