ഒരു ജിബി ഡാറ്റക്ക് 2.27 രൂപ നിരക്കിലുള്ളതാണ് പുതിയ ഓഫറുകള്‍.

റിലയന്‍സ് അവതരിപ്പിച്ച ജിയോ 4ജി മറ്റു ടെലികോം കമ്പനികളെ മുള്‍മുനയില്‍ നിര്‍ത്തി പുതിയ ഓഫറുകള്‍ പ്രഖ്യാപിച്ചു. ഒരു ജിബി ഡാറ്റക്ക് 2.27 രൂപ നിരക്കിലുള്ളതാണ് പുതിയ ഓഫറുകള്‍. നാലു തരം റീച്ചാര്‍ജ് ഓഫറുകളാണ് ജിയോ ഉപഭോക്താക്കള്‍ക്ക് സമ്മാനിക്കുന്നത്. 509 രൂപ, 149 രൂപ, 309 രൂപ, 999 രൂപ എന്നിങ്ങനെയാണ് റീച്ചാര്‍ജ് വകഭേദങ്ങള്‍.

509 രൂപയുടെ റീചാര്‍ജ് ചെയ്താല്‍ ഉപഭോക്താവിന് പ്രതിദിനം രണ്ടു ജിബി ഡാറ്റ പരിധിയില്‍ നാല് മാസത്തേക്ക് 224 ജിബി ഡാറ്റയാണ് ലഭിക്കുക. ഡാറ്റക്കൊപ്പം പരിധിയില്ലാത്ത വോയിസ് കോളും ലഭ്യമാണ്. കുറഞ്ഞ ഡാറ്റ ഉപഭോഗമുള്ളവര്‍ക്ക് വേണ്ടിയുള്ളതാണ് 149 രൂപയുടെ ഓഫര്‍. 149 രൂപയുടെ ഓഫറാണ് തെരഞ്ഞെടുക്കുന്നതെങ്കില്‍ ഉപഭോക്താവിന് ഒരു വര്‍ഷത്തേക്ക് 4ജി ഇന്റര്‍നെറ്റ് ലഭ്യമാകും. ഓരോ മാസവും രണ്ടു ജിബി ഡാറ്റ വീതം മൊത്തം 24 ജിബി ഡാറ്റയാണ് ജിയോ നല്‍കുക. 309 രൂപയുടെ ഓഫറാണ് മൂന്നമത്തേത്. ആറു മാസത്തെ കാലാവധിയില്‍ പ്രതിദിനം ഒരു ജിബി ഡാറ്റ വീതം മൊത്തം 168 ജിബി ഡാറ്റയാണ് ഈ ഓഫറില്‍ ലഭ്യമാകുക. കൂടുതല്‍ ഡാറ്റ ഉപഭോഗമുള്ളവരെ ലക്ഷ്യമിട്ടാണ് 999 രൂപയുടെ ഓഫര്‍. രണ്ടു മാസത്തേക്ക് 60 ജിബി ഡാറ്റയാണ് ഈ റീച്ചാര്‍ജില്‍ ലഭിക്കുക. ഇതില്‍ ലഭിക്കുന്ന 60 ജിബി ഡാറ്റ ഉപയോഗിക്കുന്നതിന് ദിനംപ്രതിയുള്ള പരിധികളൊന്നുമില്ല. വേണമെങ്കില്‍ ഒരു ദിവസം കൊണ്ടും രണ്ടു മാസം കൊണ്ടും ഈ 60 ജിബി ഡാറ്റയും ഉപയോഗിച്ച് തീര്‍ക്കാം.

ഈ ഓഫറുകള്‍ ലഭിക്കുന്നതിന് പുതുതായി ജിയോയുടെ വൈഫൈ ഉപകരണം വാങ്ങണം എന്നതാണ് ഏക നിബന്ധന. 1999 രൂപ മുടക്കി പുതിയ ജിയോഫൈ വാങ്ങുന്നവര്‍ 99 രൂപയുടെ പ്രൈം മെമ്പര്‍ഷിപ്പ് എടുത്ത ശേഷമാണ് മുകളില്‍ പറഞ്ഞിരിക്കുന്ന ഓഫറുകള്‍ തെരഞ്ഞെടുക്കേണ്ടത്.