മാര്‍ച്ച് 31 വരെയാണ് ജിയോ മെമ്പര്‍ഷിപ്പ് സ്വന്തമാക്കാനുള്ള സമയം.

റിലയന്‍സ് ജിയോ പ്രൈം സബ്‍സ്ക്രിപ്ഷന്‍ ഇന്ന് മുതല്‍ തുടങ്ങി. മാര്‍ച്ച് 31 വരെയാണ് ജിയോ മെമ്പര്‍ഷിപ്പ് സ്വന്തമാക്കാനുള്ള സമയം. കഴിഞ്ഞയാഴ്ച 303 രൂപയുടെ പ്രതിമാസ താരിഫ് പ്രഖ്യാപിച്ച ജിയോ, പുതിയ രണ്ടു ഓഫറുകള്‍ കൂടി പ്രഖ്യാപിച്ചിട്ടുണ്ട്. ഏപ്രില്‍ ഒന്നുമുതലാണ് ജിയോ പ്രൈം ഓഫറുകള്‍ ലഭ്യമായി തുടങ്ങുക.

ഏറ്റവും കുറഞ്ഞ പ്രൈം പ്ലാന്‍ 149 രൂപയുടെ ഓഫറാണ്. ഇതില്‍ ഒരു മാസത്തേക്ക് പരിധികളില്ലാത്ത കോളുകളും രണ്ടു ജിബി 4ജി ഡേറ്റയുമാണ് ലഭ്യമാകുക. ഡാറ്റ ഉപഭോഗത്തില്‍ നിയന്ത്രണങ്ങളുണ്ടാകില്ല. 499 രൂപയുടേതാണ് മറ്റൊരു പുതിയ ഓഫര്‍. ഇതില്‍ 60 ജിബി ഡാറ്റയാണ് ലഭിക്കുക. എന്നാല്‍ ദിവസം രണ്ടു ജിബി വരെയാണ് 4ജി വേഗതയില്‍ ഉപയോഗിക്കാന്‍ കഴിയൂ. ഇതിനൊപ്പം പരിധികളില്ലാത്ത കോളുകളും ലഭ്യമാകും. 303 രൂപയുടെ ഓഫറില്‍ അണ്‍ലിമിറ്റഡ് ഡാറ്റയും കോളുകളും മെസേജ് സംവിധാനവും ഉപയോഗിക്കാന്‍ കഴിയും. പ്രതിദിനം ഒരു ജിബി വരെയാണ് 4ജി വേഗതയില്‍ ഉപയോഗിക്കാന്‍ സാധിക്കുക. ഇതിനൊപ്പം 60 ദിവസത്തെ വാലിഡിറ്റിയുള്ള 999 രൂപയുടെ പ്ലാനും ജിയോ അവതരിപ്പിച്ചു. ഇതില്‍ 60 ജിബി ഡാറ്റയാണ് ലഭിക്കുക. 1999 രൂപയുടെ 90 ദിവസത്തെ കാലാവധിയിലുള്ള പ്ലാനില്‍ 125 ജിബി ഡാറ്റയും 4999 രൂപയുടെ 180 ദിവസത്തെ കാലാവധിയിലുള്ള പ്ലാനില്‍ 350 ജിബി ഡാറ്റയും ലഭിക്കും.