കാർബണിന്റെ A40 എന്ന മോഡലാണ്​ പ്രത്യേക ആനുകൂല്യങ്ങൾ നൽകി എയർടെൽ പുറത്തിറക്കുന്നത്​.

റിലയൻസ്​ ജിയോയുടെ വഴിയെ വില കുറഞ്ഞ സ്മാർട്ട്​ഫോൺ പുറത്തിറക്കാനൊരുങ്ങി എയർടെൽ. 1399 രൂപ വിലയിൽ​ ‘മേരാ പെഹ്‍ല സ്മാർട്ട്​ഫോൺ’ എന്ന പേരിലാവും എയർടെല്ലിന്റെ 4ജി ഫോൺ വിപണിയിലെത്തുക. കാർബണിന്റെ A40 എന്ന മോഡലാണ്​ പ്രത്യേക ആനുകൂല്യങ്ങൾ നൽകി എയർടെൽ പുറത്തിറക്കുന്നത്​.

കാർബൺ A40 ഇപ്പോൾ വിൽക്കുന്നത്​ 3499 രൂപക്കാണ്​. ഈ ഫോണിന്​ എയർടെൽ 1500 രൂപ കിഴിവ്​ നൽകും. മൂന്ന്​ വർഷത്തേക്ക്​ 169 എയർടെൽ പ്ലാൻ റിചാർജ്​ ചെയ്യണമെന്ന വ്യവസ്ഥയോട്​ കൂടിയാവും കിഴിവ്​ നൽകുക. ഈ പ്ലാനിൽ പരിധിയില്ലാത്ത കോളുകളും ദിവസവും 500 എംബി ഡാറ്റയും ലഭിക്കും. രാജ്യത്തെ മുൻനിര 4ജി സേവനദാതാവെന്ന നിലയിൽ ഇന്ത്യയിലെ എല്ലാ ജനങ്ങൾക്കും അതിവേഗ ഡാറ്റ ലഭ്യമാക്കുക എന്നതാണ്​ എയർടെല്ലിന്റെ ലക്ഷ്യമെന്ന്​ കമ്പനി സിഎംഒ അറിയിച്ചു. കാർബണുമായി ചേർന്ന്​ ലക്ഷക്കണക്കിന്​ ഇന്ത്യക്കാർക്ക്​ ടച്ച്​ സ്ക്രീൻ ഫോണുകളുടെ ഉപയോഗം നൽകാൻ എയർടെല്ലിന്​ കഴിയുമെന്നാണ് പ്രതീക്ഷയെന്നും അദ്ദേഹം പറഞ്ഞു.