ഇലക്ട്രിക്കിലും ചെറുകാറുകള്‍ തന്നെ; മാരുതിയില്‍ നിന്നും വരാനിരിക്കുന്നത് 6 ഇലക്ട്രിക് കാറുകള്‍

പരമ്പരാഗത ഇന്ധനങ്ങളുപയോഗിക്കുന്ന വാഹനങ്ങൾ വിട്ട് ലോകമിപ്പോൾ ഇലക്ട്രിക് വാഹനങ്ങൾക്കുപിന്നാലെയാണ്. നിലവിൽ ടാറ്റയാണ് ഇന്ത്യയിൽ ഇല്കട്രിക് വാഹനവിപണിയിൽ കുതിപ്പ് തുടരുന്നത്. നെക്‌സോണും നെക്‌സോണും ടിയാഗോയും ടിഗോറുമെല്ലാം ഇലക്ട്രിക് ശ്രേണിയിലെ ടാറ്റയുടെ മുൻനിര പോരാളികളാണ്. എന്നാലിപ്പോഴിതാ ഇവയോടെല്ലാം നേരിട്ട് മുട്ടാനൊരുങ്ങുകയാണ് മാരുതി സുസൂക്കി.

2030 ആകുമ്പോഴേക്കും ആറ് ഇലക്ട്രിക് വാഹനങ്ങളെ പുറത്തിറക്കാനാണ് മാരുതിയുടെ പദ്ധതി. ഈ ശ്രേണിയിലെ ആദ്യ വാഹനം 2024 സാമ്പത്തിക വർഷം ഇന്ത്യൻ വിപണിയിൽ അവതരിപ്പിക്കും. ഇവി.എക്‌സിന്റെ പ്രൊഡക്ഷൻ മോഡലായിരിക്കും ഇത്. സൂസൂക്കി മോട്ടോർ കോർപ്പറേഷൻ പുറത്തിറക്കിയ ഫ്യൂച്ചർ പ്ലാനിങ് റിപ്പോർട്ടിലാണ് ഇക്കാര്യങ്ങളുള്ളത്. കഴിഞ്ഞ ന്യൂഡൽഹി ഓട്ടോ എക്‌സ്‌പോയിലാണ് കമ്പനി ഇലക്ട്രിക് കൺസെപ്റ്റ് മോഡലായ ഇവി.എക്‌സിനെ അവതരിപ്പിച്ചത്.

Also Read:'ഇലക്ട്രിക് വാഹനങ്ങൾ': ഖത്തറിന്റെ ഗതാഗത മേഖല സമഗ്രമാറ്റത്തിനൊരുങ്ങുന്നു

2030 ആകുന്നതോടെ ഇന്ത്യൻ നിരത്തുകളിൽ 15 ശതമാനം വൈദ്യുത വാഹനങ്ങളും നാലിലൊന്ന് ഹൈബ്രിഡ് വാഹനങ്ങളും കയ്യടക്കുമെന്നാണ് മാരുതി സുസൂക്കി കണക്കു കൂട്ടുന്നത്. ഇക്കാലത്തിനുള്ളിൽ പുതിയ ആറ് ഇലക്ട്രിക് വാഹനങ്ങളളെ നിരത്തിലിറക്കി വിപണി പിടിക്കാനാകുമെന്നാണ് മാരുതിയുടെ പ്രതീക്ഷ.

ബാറ്ററി ഉപയോഗിച്ച് പ്രവർത്തിക്കുന്ന വാഹനങ്ങൾക്കൊപ്പം കാർബൺ ന്യൂട്രൽ വാഹനങ്ങളും ഐ.സി.ഇ വാഹനങ്ങളും കമ്പനി പുറത്തിറക്കും. സി.എൻ.ജി, ബയോഗ്യാസ്, എഥനോൾ മിശ്രിതം എന്നിവ ഉപയോഗിച്ചാവും ഈ വാഹനങ്ങൾ പ്രവർത്തിക്കുക. 2050 ഓടെ യൂറോപ്പിലും ജപ്പാനിലും കാർബൺ ന്യൂട്രാലിറ്റി നേടാനുള്ള പദ്ധതികളും കമ്പനി രൂപീകരിക്കുന്നുണ്ട്.

ഇലക്ട്രിക് വാഹന വിപണിയിൽ മറ്റു കമ്പനികൾ കൂടിയ മോഡലുകൾ നിർമിക്കുമ്പോൾ തങ്ങളുടെ ശക്തി തിരിച്ചറിഞ്ഞ് ചെറു ഇലക്ട്രിക് കാറുകൾ ഇറക്കാനാണ് മാരുതിയുടെ പദ്ധതി. ചെറുകാറുകൾ കൂടുതൽ വിറ്റ് ലാഭം നേടുകയെന്ന തന്ത്രം ഇ.വിയിലും പയറ്റും.

Also Read:തമിഴ്‌നാട്ടിൽ ലോകത്തെ ഏറ്റവും വലിയ ഇ.വി പ്ലാന്‍റ് വരുന്നു; വമ്പന്‍ പദ്ധതിയുമായി ഒല

അതേസമയം കമ്പനിയുടെ ഏറ്റവും പുതിയ മോഡലായ ഫ്രോങ്ക്സ് ക്രോസോവറിന്റെ വില പ്രഖ്യാപിച്ചു. 7.46 ലക്ഷം രൂപ പ്രാരംഭ വിലയിലാണ് വാഹനം അവതരിപ്പിച്ചിരിക്കുന്നത്. ടോപ്പ് എൻഡ് മോഡലിനായി 13.13 ലക്ഷം രൂപയാണ് എക്സ്ഷോറൂം വില.സിഗ്മ, ഡെൽറ്റ, ഡെൽറ്റ പ്ലസ്, സീറ്റ, ആൽഫ എന്നിങ്ങനെ അഞ്ച് വേരിയന്റുകളിലാണ് ക്രോസ്ഓവർ വാഹനം വിപണിയിൽ എത്തുന്നത്.

ജനുവരി 12ന് തന്നെ ബുക്കിങ് ആരംഭിച്ചിരുന്നു. മാരുതി സുസുക്കിയുടെ പ്രീമിയം സെഗ്മെന്റ് ഡീലർഷിപ്പായ നെക്സ വഴിയാണ് വിൽപ്പന നടക്കുക. എസ്.യു.വി സെഗ്മെന്റിലെ മൂന്നാമത്തെ മോഡലാണ് ഫ്രോങ്ക്സ്.ഇതുവരെ 13,000 ബുക്കിങുകൾ ഫ്രോങ്ക്‌സിനായി ലഭിച്ചതായാണ് കമ്പനി പറയുന്നത്.

ഫ്രോങ്ക്സിൽ രണ്ട് പെട്രോൾ എൻജിൻ ഓപ്ഷനുകളാണുള്ളത്. ആദ്യത്തെ എൻജിൻ 1.0 ലിറ്റർ ബൂസ്റ്റർജെറ്റ് പെട്രോൾ എൻജിനാണ്. ബലേനോ ആർഎസിൽ നിർത്തലാക്കിയ ഈ എൻജിൻ ഫ്രോങ്ക്സിലൂടെ ഇന്ത്യൻ വിപണിയിൽ തിരിച്ചെത്തുന്നു എന്ന പ്രത്യേകത കൂടിയുണ്ട്. ബലേനോയിലൂടെ ഏവർക്കും സുപരിചിതമായ 1.2 ലിറ്റർ, 4 സിലിണ്ടർ നാച്ചുറലി ആസ്പിറേറ്റഡ് പെട്രോൾ എഞ്ചിനാണ് രണ്ടാമത്തേത്.

Also Read:'നെക്‌സോൺ ഒന്നു പേടിക്കണം'; മഹീന്ദ്ര എക്‌സ്‌യുവി 400 അടുത്ത മാസം എത്തിയേക്കും

ക്രോം ആക്‌സന്റുകളോടുകൂടിയ പുതിയ ഫ്രണ്ട് ഗ്രിൽ, എൽഇഡി ഡിആർഎല്ലുകളുള്ള എൽഇഡി മൾട്ടി-റിഫ്ലക്ടർ ഹെഡ്‌ലാമ്പുകൾ, സ്‌ക്വയർ ഓഫ് വീൽ ആർച്ചുകൾ, പ്രിസിഷൻ കട്ട് 16 ഇഞ്ച് അലോയ് വീലുകൾ, മുൻവശത്ത് ഫ്രോങ്ക്‌സ് സ്‌കിഡ് പ്ലേറ്റുകൾ എന്നിവ ഉൾപ്പെടുന്ന ഫീച്ചറുകളുടെ പാക്കേജ് ഫ്രോങ്ക്‌സിന്റെ എല്ലാ വേരിയന്റുകളിലും സ്റ്റാൻഡേർഡാണ്.

ആർട്ടിക് വൈറ്റ്, സ്പ്ലെൻഡിഡ് സിൽവർ, ഗ്രാൻഡ്യുർ ഗ്രേ, ബ്ലൂഷ് ബ്ലാക്ക്, സെലസ്റ്റിയൽ ബ്ലൂ, ഒപുലന്റ് റെഡ്, എർത്ത് ബ്രൗൺ എന്നിങ്ങനെ 7 മോണോടോൺ ഷേഡുകൾ എന്നിവയാണ് കളർ ഓപ്ഷനുകൾ . ബ്ലൂഷ് ബ്ലാക്ക് റൂഫുള്ള സ്പ്ലെൻഡിഡ് സിൽവർ, ബ്ലൂഷ് ബ്ലാക്ക് റൂഫുള്ള ഒപ്യുലന്റ് റെഡ്, ബ്ലൂഷ് ബ്ലാക്ക് റൂഫുള്ള എർത്ത് ബ്രൗൺ എന്നിവയാണ് ഓഫറിലുള്ള ഡ്യുവൽ ടോൺ കളർ കോമ്പിനേഷനുകൾ.

മാനുവൽ, എഎംടി ഗിയർബോക്‌സുള്ള 1.2 ലിറ്റർ പെട്രോൾ എഞ്ചിനുള്ള മോഡലിന് യഥാക്രമം 21.79 കിലോമീറ്റർ, 22.89 കിലോമീറ്റർ ഇന്ധനക്ഷമത നൽകാനാവും. 1.0 ലിറ്റർ ടർബോ പെട്രോൾ മാനുവൽ വേരിയന്റുകൾക്ക് 21.5 കിലോമീറ്ററും ഓട്ടോമാറ്റിക് പതിപ്പുകൾക്ക് 20.01 കിലോമീറ്റർ മൈലേജുമാണ് കമ്പനി അവകാശപ്പെടുന്നത്. സുരക്ഷക്കായി 360-ഡിഗ്രി ക്യാമറ, ഇലക്ട്രോണിക് സ്റ്റെബിലിറ്റി പ്രോഗ്രാം , എബിഎസ്, ഇബിഡി, ഹിൽ-ഹോൾഡ് അസിസ്റ്റ്, നാല് എയർബാഗുകൾ എന്നിവയും നൽകിയിട്ടുണ്ട്.