'മിന്നൽ മുരളി' ഓണത്തിനെത്തും; മോഷൻ പോസ്റ്റർ പുറത്ത്​

ടൊവീനോ തോമസിനെ നായകനാക്കി ബേസില്‍ ജോസഫ് സംവിധാനം ചെയ്യുന്ന 'മിന്നല്‍ മുരളി' ഓണത്തിന്​ തിയറ്ററുകളിലെത്തും. അണിയറപ്രവർത്തകർ സാമൂഹിക മാധ്യമങ്ങളിലൂടെയാണ്​ റിലീസ്​ വിവരം അറിയിച്ചത്​.

മലയാളത്തിലെ ആദ്യ സൂപ്പർ ഹീറോ ചിത്രമെന്ന വിശേഷണവുമായെത്തുന്ന സിനിമയുടെ മോഷൻ പോസ്റ്ററും പുറത്തിറക്കി. നടൻ മോഹൻലാൽ ഫേസ്​ബുക്കിലൂടെയാണ്​ പോസ്റ്റർ പുറത്ത്​ വിട്ടത്​. വന്‍ വിജയം നേടിയ 'ഗോദ'ക്ക്​ ശേഷം ബേസിൽ ജോസഫും ടോവിനോയും വീണ്ടും ഒന്നിക്കുന്ന ചിത്രമാണ്​ മിന്നൽ മുരളി.

മലയാളം, തമിഴ്, തെലുഗു, ഹിന്ദി ഭാഷകളിലായാണ്​ ചിത്രം റിലീസിനെത്തുക. മിസ്റ്റര്‍ മുരളിയെന്നാണ് ഹിന്ദി പതിപ്പിന്‍റെ പേര്. മെരുപ്പ് മുരളിയെന്ന് തെലുഗു പതിപ്പിനും മിഞ്ചു മുരളിയെന്ന് കന്നഡ പതിപ്പിനും പേരിട്ടിരിക്കുന്നു.

തമിഴ്​ നടൻ ഗു​രു സോമസുന്ദരം, അജു വർഗീസ്​, ബൈജു, ഹരിശ്രീ അശോകൻ, ഫെമിന ജോർജ്ജ്​ എന്നിവരാണ്​ സുപ്രധാന വേഷങ്ങളിലെത്തുന്നത്​. അരുൺ അനിരുദ്ധനും ജസ്റ്റിൻ മാത്യുവുമാണ്​ രചന. സമീര്‍ താഹിര്‍ ആണ് ഛായാഗ്രഹണം. ഷാന്‍ റഹ്മാന്‍ സംഗീത സംവിധാനം നിർവഹിച്ചിരിക്കുന്നു. വീക്കെൻഡ് ബ്ലോക്ക്ബസ്റ്റേഴ്സിന്‍റെ ബാനറിൽ സോഫിയ പോളാണ് നിർമാണം.

മീഡിയവൺ വാർത്തകൾ ടെലിഗ്രാമിൽ ലഭിക്കാൻ ജോയിൻ ചെയ്യുക