ആനന്ദ് മഹീന്ദ്രയെ 'നാട്ടുനാട്ടു' സ്റ്റെപ്പ് പഠിപ്പിച്ച് രാംചരണ്‍

ഹൈദരാബാദ്: ആര്‍ആര്‍ആറിലെ 'നാട്ടുനാട്ടു' എന്ന ഗാനം ഇതിനകം നിരവധി പുരസ്കാരങ്ങള്‍ സ്വന്തമാക്കുകയും അന്താരാഷ്ട്ര തലത്തില്‍ ശ്രദ്ധ നേടുകയും ചെയ്തിട്ടുണ്ട്. ആര്‍ആര്‍ആറിലെ ചുവടുകള്‍ സോഷ്യല്‍ മീഡിയയില്‍ ഇപ്പോഴും തരംഗമാണ്. വ്യവസായി ആനന്ദ് മഹീന്ദ്രയും ആ ട്രെൻഡിൽ പങ്കുചേർന്നു. ആര്‍ആര്‍ആര്‍ താരം രാംചരണിൽ നിന്നാണ് അദ്ദേഹം 'നാട്ടുനാട്ടു'വിന്റെ ചുവടുകൾ പഠിച്ചത്.

മഹീന്ദ്ര ഗ്രൂപ്പിന്‍റെ ജെനറേഷന്‍ 3 ഫോര്‍മുല ഇ കാറിന്‍റെ ലോഞ്ചിനോട് അനുബന്ധിച്ചാണ് ആനന്ദ് മഹീന്ദ്രയും രാംചരണും കണ്ടുമുട്ടിയത്- "രാമചരണില്‍ നിന്നും നാട്ടുനാട്ടു ഗാനത്തിന്‍റെ അടിസ്ഥാന ചുവടുകള്‍ പഠിച്ചു. നന്ദി. ഓസ്‌കര്‍ നേടട്ടെ പ്രിയ സുഹൃത്തേ"- ഈ ട്വീറ്റിനൊപ്പം സ്റ്റെപ്പ് പഠിക്കുന്ന ദൃശ്യവും ആനന്ദ് മഹീന്ദ്ര പങ്കുവെച്ചു.

ട്വീറ്റിന് രാംചരൺ മറുപടി നല്‍കി- "ആനന്ദ് മഹീന്ദ്ര ജീ, എന്നേക്കാൾ വേഗത്തിൽ താങ്കള്‍ ചുവടുകള്‍ പഠിച്ചു. രസകരമായ സംവാദമായിരുന്നു. ആര്‍ആര്‍ആര്‍ ടീമിനുള്ള താങ്കളുടെ ആശംസകൾക്ക് നന്ദി"

'നാട്ടുനാട്ടു' ഗാനം പോലെ തന്നെ ആനന്ദ് മഹീന്ദ്രയുടെയും രാംചരണിന്‍റെയും ദൃശ്യവും വൈറലായി. ഒരു മില്യണിലധികം പേര്‍ ഇതിനകം ആ വീഡിയോ കണ്ടുകഴിഞ്ഞു. രണ്ട് ഇതിഹാസങ്ങള്‍, മനോഹരമായ നിമിഷം, എന്തൊരു ഫിറ്റ്നസ് തുടങ്ങി നിരവധി കമന്‍റുകള്‍ വീഡിയോയ്ക്ക് താഴെ കാണാം.

Summary- industrialist Anand Mahindra joined the trend as he was seen learning a few steps of 'Naatu Naatu' from none other than the movie's star Ram Charan