യൂഫോറിയ താരം ആം​ഗസ് ക്ലൗഡ് മരിച്ചനിലയില്‍

കാലിഫോർണിയ: എച്ച്.ബി.ഒയുടെ സൂപ്പര്‍ ഹിറ്റ് സീരീസ് യൂഫോറിയയിലൂടെ പ്രശസ്തനായ നടൻ ആം​ഗസ് ക്ലൗഡിനെ വീട്ടില്‍ മരിച്ച നിലയില്‍ കണ്ടെത്തി. 25കാരനായ അംഗസിനെ കാലിഫോർണിയ ഓക്‍ലാൻഡിലെ വീട്ടിലാണ് മരിച്ച നിലയിൽ കണ്ടെത്തിയത്.

യൂഫോറിയയില്‍ മയക്കുമരുന്ന് വ്യാപാരിയായ ഫെസ് എന്ന കഥാപാത്രത്തെ അവതരിപ്പിച്ചാണ് ആം​ഗ‌സ് ശ്രദ്ധേയനായത്. മരണ കാരണം കുടുംബം പുറത്തുവിട്ടിട്ടില്ല. രണ്ടാഴ്ച മുന്‍പാണ് ആംഗസിന്‍റെ പിതാവിന്‍റെ മരണം സംഭവിച്ചത്. പിന്നാലെയാണ് അംഗസിന്‍റെയും മരണം.

"ആംഗസ് തന്റെ ഏറ്റവും അടുത്ത സുഹൃത്തായ അച്ഛനുമായി വീണ്ടും ഒന്നിച്ചു എന്നറിയുന്നത് മാത്രമാണ് ഞങ്ങൾക്ക് ആശ്വാസം"- കുടുംബം പ്രസ്താവനയിൽ അറിയിച്ചു. ആംഗസ് മാനസിക സംഘര്‍ഷം നേരിട്ടിരുന്നുവെന്നും കുടുംബം പ്രതികരിച്ചു. നിശബ്ദമായി തനിച്ചല്ല എല്ലാം നേരിടേണ്ടതെന്ന് ഈ മരണം ഓര്‍മപ്പെടുത്തുവെന്ന് കുടുംബം പറഞ്ഞു.

'എനിക്ക് നിങ്ങളെ മിസ് ചെയ്യുന്നു'വെന്ന് പിതാവ് മരിച്ച ദിവസം ആം​ഗസ് ഇൻസ്റ്റഗ്രാമിൽ കുറിക്കുകയുണ്ടായി. പിതാവിന്‍റെ മരണാനന്തര ചടങ്ങുകള്‍ക്ക് ശേഷം അയര്‍ലന്‍ഡില്‍ നിന്ന് ആംഗസ് തിരിച്ച് കാലിഫോര്‍ണിയയിലെ വീട്ടിലെത്തിയിരുന്നു. തുടര്‍ന്നാണ് മരിച്ച നിലയില്‍ കണ്ടെത്തിയത്.

ആംഗസിന്‍റെ വിയോഗത്തില്‍ എച്ച്.ബി.ഒ ദുഃഖം രേഖപ്പെടുത്തി- "ആംഗസ് ക്ലൗഡിന്റെ വിയോഗം അറിഞ്ഞ് ഞങ്ങള്‍ ആഗാധ ദുഃഖത്തിലാണ്. അദ്ദേഹം അപാരമായ കഴിവുള്ളയാളായിരുന്നു. എച്ച്.ബി.ഒയുടെയും യൂഫോറിയ കുടുംബത്തിന്റെയും പ്രിയപ്പെട്ട ഭാഗമായിരുന്നു. ഈ ദുഷ്‌കരമായ സമയത്ത് അദ്ദേഹത്തിന്റെ സുഹൃത്തുക്കളെയും കുടുംബാംഗങ്ങളെയും ഞങ്ങൾ അനുശോചനം അറിയിക്കുന്നു".

നോർത്ത് ഹോളിവുഡ്, ദ ലൈൻ എന്നീ ചിത്രങ്ങളിൽ ആംഗസ് ക്ലൌഡ് അഭിനയിച്ചിരുന്നുവെങ്കിലും പ്രശസ്തനായത് യൂഫോറിയയിലൂടെയായിരുന്നു. 2019 ജൂണിൽ ആദ്യമായി സംപ്രേഷണം ചെയ്തതിനു പിന്നാലെ യൂഫോറിയ സൂപ്പര്‍ ഹിറ്റായി. 2022 ആയപ്പോഴേക്കും യുഎസിൽ ഈ ദശകത്തിൽ ഏറ്റവും കൂടുതൽ ട്വീറ്റ് ചെയ്യപ്പെട്ട ടിവി ഷോ ആയി യൂഫോറിയ മാറി.