ആരാധകന്റെ സ്‌നേഹ പ്രകടനം അതിരുകടന്നു; സംഗീതനിശക്കിടെ ഗായകൻ അർജിത് സിംഗിന്റെ കൈക്ക് പരിക്ക്

മുംബൈ: 'കേസരിയ', 'തും ഹി ഹോ' തുടങ്ങി നിരവധി ഗാനങ്ങളിലൂടെ ആരാധകരുടെ ഹൃദയം കീഴടക്കിയ ബോളിവുഡ് ഗായകനാണ് അർജിത് സിംഗ്. ഇന്ത്യയിലുടനീളം സംഗീത പരിപാടി നടത്തുകയാണ് ഗായകനിപ്പോൾ. ഔറംഗബാദിൽ നടന്ന സംഗീത പരിപാടിക്കിടെ ആരാധകന്റെ അതിരുകടന്ന സ്‌നേഹപ്രകടനം കാരണം ഗായകന് പരിക്കേറ്റു.

സംഗീത പരിപാടിക്കിടെ ആവേശഭരിതനായ ആരാധകൻ അർജിത് സിംഗിന്റെ അടുത്ത് എത്തുകയും കൈപിടിച്ചു കുലുക്കുകയുമായിരുന്നു. എന്നാൽ ആരാധകന്റെ ഹസ്തദാനം മൂലം അർജീതിന്റെ ബൈലൻസ് തെറ്റുകയും കൈക്ക് പരിക്കേൽക്കുകയുമായിരുന്നു. എന്നാൽ അർജീത് ആരാധകനോട് ദേഷ്യപ്പെടുകയോ ചീത്തവിളിക്കുകയോ ചെയ്തില്ല. 'പകരം നിങ്ങൾ എന്താണ് ഈ ചെയ്തത്. എനിക്ക് കൈ അനക്കാൻ പറ്റുന്നില്ല. എന്റെ ഷോ എങ്ങനെ പൂർത്തിയാക്കും എന്ന് അർജീത് ആരാധകനോട് ചോദിച്ചു. എന്റെ എല്ലാ ആരാധകരുമായും ഇടപഴകാൻ ആഗ്രഹമുണ്ട്, നിങ്ങളുടെ സ്‌നേഹം അനുഭവിക്കാൻ ഇഷ്ടമാണ്. പക്ഷേ ഇത്തരത്തിലുള്ള കാര്യങ്ങൾ ആവർത്തിക്കരുത്..'അദ്ദേഹം പറഞ്ഞു.

തുടർന്ന് ഗായകന് വേദിയിൽ വെച്ച് പ്രാഥമിക ചികിത്സ നൽകുകയും ചെയ്തു. പിന്നീട് ശരിയായ ചികിത്സ നൽകുകയും ചെയ്തു. ഗായകന്റെ വലത് കൈക്കാണ് പരിക്കേറ്റിരിക്കുന്നത്. ഇതിനകം തന്നെ ഡൽഹി, ചെന്നൈ, കൊൽക്കത്ത, അഹമ്മദാബാദ് തുടങ്ങിയ നഗരങ്ങളിൽ സംഗീത പരിപാടി അവതരിപ്പിച്ചു. ഞായറാഴ്ച, ഔറംഗബാദിലെ ഛത്രപതി സംഭാജിനഗറിൽ സംഗീത നിശ നടക്കുമ്പോഴാണ് കൈക്ക് പരിക്കേറ്റത്. സംഭവത്തിന്റെ വീഡിയോകൾ സോഷ്യൽമീഡിയയിൽ വൈറലായിരിക്കുകയാണ്.