"പുറത്തായത് ഒരേ ദിവസം; ഇന്ന് അതേ ഷോയിൽ അവൾ ജഡ്‌ജി, അതിഥിയായി ഞാനും"

ഏറ്റവും പുതിയ ചിത്രമാണ് 'ആൻ ആക്ഷൻ ഹീറോ'യുടെ പ്രൊമോഷൻ തിരക്കിലാണ് നടൻ ആയുഷ്മാൻ ഖുറാന. ക്യാമ്പസ് മെഡിക്കല്‍ കോമഡി ചിത്രമായ 'ഡോക്ടര്‍ ജി'ക്ക് ശേഷം ആയുഷ്മാൻ നായകനായി എത്തുന്ന ചിത്രത്തിനായി പ്രേക്ഷകർ ആകാംക്ഷയോടെയാണ് കാത്തിരിക്കുന്നത്. ചിത്രത്തിന്റെ പ്രൊമോഷന്റെ ഭാഗമായി പ്രമുഖ റിയാലിറ്റി ഷോയായ ഇന്ത്യൻ ഐഡലിൽ പ്രത്യേക അതിഥിയായി ആയുഷ്മാൻ എത്തുകയാണ്. ആയുഷ്മാൻ എത്തുന്ന ഈ വാരാന്ത്യത്തിലെ പ്രത്യേക എപ്പിസോഡിനായി ടെലിവിഷൻ പ്രേക്ഷകരുടെയും കാത്തിരിപ്പ് ചെറുതല്ല.

ശനിയാഴ്ച സംപ്രേഷണം ചെയ്യാനിരിക്കുന്ന എപ്പിസോഡിൽ നിന്നുള്ള ഒരു ചെറിയ വീഡിയോ ക്ലിപ്പ് സോണി എന്റർടൈൻമെന്റ് ടെലിവിഷൻ പങ്കിട്ടിരുന്നു. ഇന്ത്യൻ ഐഡലിലെ ജഡ്ജിമാരിൽ ഒരാളായ നേഹാ കക്കറുമായുള്ള രസകരമായ ഒരു അനുഭവമാണ് ആയുഷ്മാൻ പങ്കുവെച്ചിരിക്കുന്നത്. "ഇന്ത്യൻ ഐഡലിന്റെ ഒഡീഷന് താനും നേഹയും ഒന്നിച്ചായിരുന്നു എത്തിയത്. അന്ന് ഞങ്ങൾ രണ്ടുപേരും പുറത്തായി. തിരിച്ച് ഡൽഹിക്കുള്ള ട്രെയിനിലും ഞങ്ങൾ ഒരുമിച്ചായിരുന്നു. ഏകദേശം അമ്പതോളം പേരായിരുന്നു അന്ന് ഒഡീഷന് വന്നിട്ട് പുറത്തായത്. ഇന്ന് അവൾ ഇവിടെ ജഡ്ജിയാണ്. അവളുടെ ഷോയിൽ ഞാൻ അതിഥിയായും എത്തിയിരിക്കുന്നു. ഏറെ സന്തോഷമുള്ള കാര്യമാണിത്"; ആയുഷ്മാൻ പറഞ്ഞു.

നിരവധി പേരാണ് ട്വിറ്ററിൽ പങ്കുവെച്ച വീഡിയോക്ക് താഴെ കമന്റുമായി എത്തിയിരിക്കുന്നത്. ഇരുവരുടെയും പോരാട്ടത്തിന്റെ കഥയാണിതെന്നും ഏറെ പ്രചോദനം നൽകുന്നതാണെന്നും ആളുകൾ അഭിപ്രായപ്പെട്ടു. നിരവധി പേർ വീഡിയോ ഷെയർ ചെയ്തിട്ടുമുണ്ട്.

2003ൽ താൻ റിയാലിറ്റി ഷോയുടെ വിധികർത്താക്കളിൽ ഒരാളായിരുന്നപ്പോൾ ആയുഷ്മാനെ ഒഡീഷൻ ചെയ്തിരുന്നതായി ഗായകൻ പലാഷ് സെൻ നേരത്തെ പറഞ്ഞിരുന്നു. ഇന്ത്യൻ ഐഡലിൽ നിന്ന് പുറത്തായതിന് പിന്നാലെ വീഡിയോ ജോക്കിയായി ആയുഷ്മാൻ ശ്രദ്ധനേടി. തുടർന്ന് 2012ൽ ഷൂജിത് സിർകാറിന്റെ വിക്കി ഡോണറിലൂടെയാണ് അദ്ദേഹം അഭിനയരംഗത്തേക്ക് കടന്നുവന്നത്. വ്യത്യസ്തമായ കഥാപാത്രങ്ങളിലൂടെ വളരെ ചുരുങ്ങിയ നാളുകൾ കൊണ്ടുതന്നെ ബോളിവുഡിൽ തന്റെ ഇടം നേടിയെടുത്തയാൾ കൂടിയാണ് ആയുഷ്മാൻ ഖുറാന. ഇപ്പോൾ റിലീസിനൊരുങ്ങുന്നു ആൻ ആക്ഷൻ ഹീറോയും ബോക്സോഫീസ് കീഴടക്കുമെന്നാണ് റിപ്പോർട്ടുകൾ.

അനിരുദ്ധ് അയ്യര്‍ സംവിധാനം ചെയ്യുന്ന ആൻ ആക്ഷൻ ഹീറോയിൽ ഇതുവരെ ചെയ്തിട്ടില്ലാത്ത ഒരു കഥാപാത്രത്തെയാണ് ആയുഷ്മാൻ അവതരിപ്പിക്കുന്നത്. ഡിസംബർ രണ്ടിനാണ് ചിത്രത്തിന്റെ റിലീസ്. കൂടാതെ, അനന്യ പാണ്ഡെയ്‌ക്കൊപ്പം ഡ്രീം ഗേൾ 2 എന്ന സിനിമയുടെ ചിത്രീകരണവും ആയുഷ്മാൻറെതായി അണിയറയിൽ ഒരുങ്ങുന്നുണ്ട്.