'പേര് പ്രഖ്യാപിച്ചപ്പോൾ തന്നെ പ്രേക്ഷകരിൽ ആകാംക്ഷ കൂട്ടി, സിനിമയും അതുപോലെയാകട്ടെ'; റോഷാക്കിനെക്കുറിച്ച് മമ്മൂട്ടി

പുത്തൻതലമുറയുടെ സിനിമ സങ്കൽപ്പങ്ങളെ പരിപൂർണമായി ഉപയോഗപ്പെടുത്തുന്ന പുതിയ സംവിധായകന്റെ ചിത്രമാണ് റോഷാക്കെന്ന് മമ്മൂട്ടി. ചിത്രത്തിന്റെ ടൈറ്റിൽ അനൗൺസ് ചെയ്തപ്പോൾ തന്നെ പ്രേക്ഷകരിൽ ആകാംക്ഷ വർധിച്ചുവെന്ന് മമ്മൂട്ടി പറഞ്ഞു. പേരിനെ പറ്റി പലരും ചർച്ച ചെയ്തുകണ്ടു. അത് ചിത്രത്തിന് ഗുണം ചെയ്തുവെന്നും മമ്മൂട്ടി പറഞ്ഞു. ഖത്തറിൽ റോഷാക്കിന്റെ പ്രമോഷന് എത്തിയപ്പോഴായിരുന്നു മമ്മൂട്ടി ഇക്കാര്യങ്ങൾ പറഞ്ഞത്.

മമ്മൂട്ടിയെ കാണുന്നതിനായി നിരവധി പേരാണ് പരിപാടി സംഘടിപ്പിച്ച സ്ഥലത്തേയ്ക്ക് എത്തിയത്. ഇത്രയും ആളുകൾ സിനിമ കാണുന്നതിനും എത്തുമെന്നാണ് കരുതുന്നതെന്ന് മമ്മൂട്ടി ചിരിച്ചുകൊണ്ട് പറഞ്ഞു. പേര് കൊണ്ട് പ്രേക്ഷകരിൽ ആകാംക്ഷ സൃഷ്ടിക്കാൻ സാധിച്ചു എന്ന പോലെ സിനിമയ്ക്കും കഴിയുമെന്നാണ് പ്രതീക്ഷ. ഏഴാം തീയതി ചിത്രം ലോകമെമ്പാടും റിലീസിനൊരുങ്ങുകയാണെന്നും എല്ലാവരും ചിത്രം കാണണമെന്നും മമ്മൂട്ടി പറഞ്ഞു.

പ്രഖ്യാപനം മുതൽ പ്രേക്ഷകർ വലിയ ആകാംഷയോടെ കാത്തിരിക്കുന്ന ചിത്രമാണ് റോഷാക്. കഴിഞ്ഞ ദിവസമാണ് റോഷാക്കിന്റെ സെൻസറിംഗ് പൂർത്തിയായത്. ക്ലീൻ യുഎ സർട്ടിഫിക്കറ്റാണ് ചിത്രത്തിന് ലഭിച്ചത്. ചിത്രം ഒക്ടോബർ ഏഴിന് തിയറ്ററുകളിൽ എത്തും. രണ്ട് മണിക്കൂർ മുപ്പത് മിനുറ്റാണ് ചിത്രത്തിൻറെ ദൈർഘ്യം. അമ്പരപ്പിൻറെയും ഭയത്തിൻറെയും ഭാവങ്ങൾ നിറച്ച് പുറത്തിറങ്ങിയ ചിത്രത്തിൻറെ പോസ്റ്ററുകളും മേക്കിങ് വിഡിയോയും ട്രെയിറും പ്രേക്ഷകരിൽ റോഷാക്കിനെക്കുറിച്ചുള്ള ആകാംക്ഷ കൂട്ടിയിരുന്നു. റിലീസ് പ്രഖ്യാപന പോസ്റ്ററും ഏറെ ശ്രദ്ധേയമാണ്. തലയോട്ടിക്ക് സമാനമായ രൂപത്തിൽ മമ്മൂട്ടിയുടെ ലൂക്ക് ആന്റണിയും നിഴലും നിൽക്കുന്നതാണ് പോസ്റ്റർ. യു.എ സർട്ടിഫിക്കേഷൻ ലഭിച്ചു എന്ന വിവരം തലയോട്ടിയുടെ മറ്റു ഭാഗങ്ങളായും മമ്മൂട്ടിയുടെ തലയും നിഴലും രണ്ടു കണ്ണുകളായും പോസ്റ്ററിൽ അടയാളപ്പെടുത്തുന്നു.

ഒരു പ്രതികാരത്തിൻറെ കഥയാണ് ചിത്രമെന്ന് ചില അനുമാനങ്ങൾക്കൊപ്പം വൈറ്റ് റൂം ടോർച്ചറിനെ കുറിച്ചെല്ലാം ചർച്ചകൾ കൊടുമ്പിരി കൊള്ളുകയാണ്. ആദ്യചിത്രമായ കെട്ട്യോളാണ് എൻറെ മാലാഖ വമ്പൻ വിജയമാക്കി തീർത്ത നിസാം ബഷീർ ഒരുക്കുന്ന സിനിമയുടെ നിർമാണം നിർവഹിച്ചിരിക്കുന്നത് മമ്മൂട്ടി കമ്പനി ആണ്. കൊച്ചിയിലും ദുബൈയിലുമായാണ് റോഷാക്കിൻറെ ചിത്രീകരണം പൂർത്തീകരിച്ചത്. മമ്മൂട്ടിയെ കൂടാതെ ഷറഫുദ്ധീൻ, ജഗദീഷ്, ഗ്രേസ് ആൻറണി, ബിന്ദു പണിക്കർ, സഞ്ജു ശിവറാം, കോട്ടയം നസീർ, ബാബു അന്നൂർ, മണി ഷൊർണ്ണൂർ തുടങ്ങിയവരും ചിത്രത്തിൽ അഭിനയിക്കുന്നു. അഡ്വഞ്ചേഴ്സ് ഓഫ് ഓമനക്കുട്ടൻ, ഇബ്ലീസ് എന്നീ ചിത്രങ്ങൾക്ക് തിരക്കഥ ഒരുക്കിയ സമീർ അബ്ദുളാണ് തിരക്കഥ ഒരുക്കിയിരിക്കുന്നത്.

പ്രോജക്ട് ഡിസൈനർ :ബാദുഷ, ചിത്രസംയോജനം: കിരൺ ദാസ്, സംഗീതം: മിഥുൻ മുകുന്ദൻ, കലാസംവിധാനം: ഷാജി നടുവിൽ, പ്രൊഡക്ഷൻ കൺട്രോളർ: പ്രശാന്ത് നാരായണൻ, ചമയം: റോണക്‌സ് സേവ്യർ, എസ്. ജോർജ്, വസ്ത്രാലങ്കാരം: സമീറ സനീഷ്, പി.ആർ.ഒ: പ്രതീഷ് ശേഖർ.