'മമ്മൂട്ടിയുമൊന്നിച്ചൊരു വിസ്മയ ചിത്രം'; മാമാങ്കത്തിന് ശേഷം പുതിയ ചിത്രവുമായി വേണു കുന്നപ്പിള്ളി
മെഗാസ്റ്റാറും കാവ്യാ ഫിലിംസും ഒരുമിക്കുന്ന പുതിയ ചിത്രം വിസ്മയ ചിത്രമായിരിക്കുമെന്ന് നിര്‍മാതാവ്
മാമാങ്കത്തിന് ശേഷം മമ്മൂട്ടിയും വേണു കുന്നപ്പിള്ളിയും വീണ്ടും ഒരുമിക്കുന്നു. മെഗാസ്റ്റാറും കാവ്യാ ഫിലിംസും ഒരുമിക്കുന്ന പുതിയ ചിത്രം വിസ്മയ ചിത്രമായിരിക്കുമെന്ന് നിര്‍മാതാവ് വേണു കുന്നപ്പിള്ളി പറഞ്ഞു. മമ്മൂട്ടിയുടെ ജന്മദിനമായ ഇന്നാണ് വേണു കുന്നപ്പിള്ളിയുടെ സ്വന്തം നിര്‍മാണ കമ്പനിയായ കാവ്യ ഫിലിംസ് പുതിയ ചിത്രം ഒരുങ്ങുന്ന കാര്യം അറിയിച്ചത്.
സിനിമയില്‍ അന്‍പതാണ്ട് പൂര്‍ത്തിയാക്കുന്ന മമ്മൂട്ടിയ്ക്ക് ബി.ജെ.പി ആദരം അര്‍പ്പിക്കാന്‍ കൊച്ചിയിലെ താരത്തിന്‍റെ വസതിയിലെത്തിയപ്പോള്‍ വേണു കുന്നപ്പള്ളിയും അവിടെയുണ്ടായിരുന്നു. പുതിയ സിനിമാ പ്രഖ്യാപനമാണോയെന്ന ആരാധകരുടെ സംശയങ്ങള്‍ക്ക് അവസാനം നല്‍കി നിര്‍മാതാവ് ആന്‍റോ ജോസഫ് പുതിയ പ്രൊജക്ട് തന്നെയാണെന്ന് സോഷ്യല്‍ മീഡിയയിലൂടെ അറിയിക്കുകയും ചെയ്തിരുന്നു.
ഏറെ വിവാദങ്ങള്‍ക്കൊടുവില്‍ എം പത്മകുമാര്‍ സംവിധാനം ചെയ്‍ത പിരീഡ് ആക്ഷന്‍ ചിത്രമായ 'മാമാങ്കം' 2019ലാണ് പ്രദര്‍ശനത്തിനെത്തിയത്. ചന്ദ്രോത്ത് വലിയ പണിക്കര്‍ എന്ന കഥാപാത്രമായി മമ്മൂട്ടി എത്തിയ ചിത്രത്തില്‍ ഉണ്ണി മുകുന്ദന്‍, അച്യുതന്‍ ബി നായര്‍, സിദ്ദിഖ്, പ്രാചി തെഹ്‍ലാന്‍, സുരേഷ് കൃഷ്‍ണ, മണിക്കുട്ടന്‍, സുദേവ് നായര്‍, കനിഹ, അനു സിത്താര. ഇനിയ തുടങ്ങി വലിയ താരനിരയും ഉണ്ടായിരുന്നു.
അതേസമയം 'ബിഗ് ബി'ക്കു ശേഷം അമല്‍ നീരദിനൊപ്പം ഒന്നിക്കുന്ന 'ഭീഷ്‍മ പര്‍വ്വം', നവാഗതയായ രതീന ഷെര്‍ഷാദ് ഒരുക്കുന്ന 'പുഴു' എന്നിവയാണ് മമ്മൂട്ടിയുടേതായി ഇനി പുറത്തിറങ്ങാനിരിക്കുന്ന ചിത്രങ്ങള്‍.
Adjust Story Font
16
