പൃഥ്വിരാജ് പറഞ്ഞ സര്‍പ്രൈസ് പുറത്തുവിട്ട് മമ്മൂട്ടിയും മോഹന്‍ലാലും
തങ്ങളുടെ ഫേസ്ബുക്ക് പേജുകളിലൂടെയാണ് സൂപ്പര്‍താരങ്ങള്‍ സര്‍പ്രൈസ് പുറത്തുവിട്ടത്.
ആകാംക്ഷയ്ക്ക് വിരമമിട്ടുകൊണ്ട് പൃഥ്വിരാജ് കഴിഞ്ഞ ദിവസം സൂചിപ്പിച്ച ആ സര്‍പ്രൈസ് പുറത്തുവിട്ടിരിക്കുകയാണ് മമ്മൂട്ടിയും മോഹന്‍ലാലും. 'കാപ്പ' എന്ന ചിത്രത്തിന്‍റെ മോഷന്‍ പോസ്റ്ററാണ് സിനിമ പ്രേമികളെ ത്രസിപ്പിച്ചുകൊണ്ട് സൂപ്പര്‍ താരങ്ങള്‍ പങ്കുവെച്ചിരിക്കുന്നത്. പൃഥ്വിരാജ്, ആസിഫ് അലി, മഞ്ജു വാര്യര്‍, അന്ന ബെന്‍ എന്നിവരെ കേന്ദ്ര കഥാപാത്രങ്ങളാക്കി വേണു സംവിധാനം ചെയ്യുന്ന ചിത്രമാണ് കാപ്പ.
മോഷന്‍ പോസ്റ്ററില്‍ നാല് പേരും കടന്നുവരുന്നുണ്ട്. ഗുണ്ടയുടെ രൂപത്തില്‍ വ്യത്യസ്ത ഗെറ്റപ്പിലാണ് പൃഥ്വിരാജ്. കാപ്പ എന്ന ആക്ടും പിണറായി വിജയനുമെല്ലാം മോഷന്‍ പോസ്റ്ററില്‍ നിറഞ്ഞുനില്‍ക്കുന്നു.
തിരുവനന്തപുരം നഗരത്തിലെ അദൃശ്യ അധോലോകത്തിന്‍റെ കഥ പറയുന്ന, ജി ആര്‍ ഇന്ദുഗോപന്‍ എഴുതിയ 'ശംഖുമുഖി' എന്ന നോവെല്ലയെ ആസ്‍പദമാക്കിയാണ് സിനിമ. ഇന്ദുഗോപന്‍റേതു തന്നെയാണ് ചിത്രത്തിന്‍റെ തിരക്കഥ. ഫെഫ്‍ക റൈറ്റേഴ്സ് യൂണിയന്‍ നിര്‍മ്മാണ പങ്കാളിയാവുന്ന ആദ്യ ചലച്ചിത്ര നിര്‍മ്മാണ സംരംഭവുമാണ് ഇത്. അംഗങ്ങളുടെ ക്ഷേമ പ്രവര്‍ത്തനത്തിനുള്ള ഫണ്ട് സ്വരൂപിക്കുന്നതിന്‍റെ ഭാഗമായി തിയറ്റര്‍ ഓഫ് ഡ്രീംസ് എന്ന നിര്‍മ്മാണക്കമ്പനിയുമായി ചേര്‍ന്നാണ് റൈറ്റേഴ്സ് യൂണിയന്‍ ഈ സംരംഭത്തിന് തുടക്കം കുറിക്കുന്നത്.
ചിത്രത്തിന്‍റെ ഛായാഗ്രഹണം സാനു ജോണ്‍ വര്‍ഗീസ് ആണ്. എഡിറ്റിംഗ് മഹേഷ് നാരായണന്‍. സംഗീതം ജസ്റ്റിന്‍ വര്‍ഗീസ്. കലാസംവിധാനം ദിലീപ് നാഥ്. വസ്ത്രാലങ്കാരം സമീര സനീഷ്. ചമയം റോണക്സ് സേവ്യര്‍. സ്റ്റില്‍സ് ഹരി തിരുമലയും നിര്‍വഹിക്കുന്നു.
Adjust Story Font
16
