'ഹൃദയം' റിലീസ് തീയതി പുറത്തുവിട്ടു; ഫാൻഷോയ്ക്ക് തയ്യാറെടുത്ത് പ്രണവ് ഫാൻസ്

പ്രണവ് മോഹൻലാൽ ചിത്രം 'ഹൃദയം' റിലീസ് തീയതി പുറത്തുവിട്ടു. വിനീത് ശ്രീനിവാസൻ സംവിധാനം ചെയ്യുന്ന ചിത്രം ജനുവരി 21ന് തിയേറ്ററുകളിലെത്തും. മോഹൻലാൽ ആണ് റിലീസ് തീയതി ഔദ്യോഗികമായി സോഷ്യൽമീഡിയയിലൂടെ പ്രഖ്യാപിച്ചത്. വിനീത്, പ്രണവ് തുടങ്ങി നിരവധിപേർ റിലീസ് പോസ്റ്റർ പങ്കുവെച്ചിട്ടുമുണ്ട്.

റിലീസ് തീയതി പ്രഖ്യാപിച്ച് നിമിഷങ്ങൾക്കകം തന്നെ11 കേന്ദ്രങ്ങളിൽ ഫാൻസ് ഷോകൾ ഹൗസ്ഫുള്ളായി. പത്തനംതിട്ട, ചങ്ങനാശ്ശേരി, തിരുവനന്തപുരം, ആലപ്പുഴ, കോട്ടയം എന്നിവിടങ്ങളിലെ തീയേറ്ററുകളിൽ ഗ്ലോബൽ പ്രണവ് മോഹൻലാൽ ഫാൻസ് ആൻഡ് വെൽഫെയർ ഓർഗനൈസേഷൻറെ ആഭിമുഖ്യത്തിൽ 8 മണിക്ക് ഫാൻഷോകൾ പ്രഖ്യാപിച്ചിരിക്കുന്നത്.

പ്രണവിനെ കൂടാതെ കല്യാണി പ്രിയദർശൻ, ദർശന രാജേന്ദ്രൻ തുടങ്ങിയവരാണ് ചിത്രത്തിലെ പ്രധാന താരങ്ങൾ. ഹിഷാം അബ്ദുൾ വഹാബ് ഈണം നൽകിയിരിക്കുന്ന 'ഹൃദയ'ത്തിലെ ഗാനങ്ങൾ ഇതിനകം സോഷ്യൽമീഡിയയിൽ വൈറലാണ്. 'ദർശന' സോംഗ് ഇതിനോടകം തന്നെ ഹിറ്റ് ലിസ്റ്റിൽ ഇടം പിടിച്ചിട്ടുണ്ട്. ജേക്കബിൻറെ സ്വർഗ്ഗരാജ്യം പുറത്തിറങ്ങി അഞ്ച് വർഷത്തിനു ശേഷമാണ് വിനീത് പുതിയ ചിത്രവുമായി വരുന്നവരുന്നത്. മെറിലാൻഡ് സിനിമാസിൻറെ ബാനറിൽ വിശാഖ് സുബ്രഹ്‌മണ്യമാണ് ചിത്രം നിർമ്മിക്കുന്നത്.