അതിസാഹസിക ആക്ഷന്‍ രംഗങ്ങള്‍; പ്രേക്ഷകരെ ത്രില്ലടിപ്പിച്ച് മഡ്ഡിയുടെ ട്രെയ്ലര്
ഇന്ത്യയിലെ ആദ്യ 4×4 മഡ് റേസ് ചിത്രമായ മഡ്ഡിയുടെ റിലീസ് ഡിസംബര്‍ 10 നാണ്.
പ്രേക്ഷകരെ ആകാംക്ഷഭരിതരാക്കുന്ന അഡ്വഞ്ചറസ് ആക്ഷനുകളുമായി മഡ്ഡിയുടെ ട്രെയ്ലര്. ഇന്ത്യയില്‍ തന്നെ ആദ്യമായാണ് 4×4 മഡ് റേസ് പ്രമേയമായി ഒരു സിനിമ പുറത്തിറങ്ങുന്നത്. നവാഗതനായ ഡോ. പ്രഗഭലാണ് ചിത്രത്തിന്‍റെ സംവിധായകന്‍. ബോളിവുഡ് താരം അര്‍ജുന്‍ കപൂര്‍, രഞ്ജി പണിക്കര്‍, ഉണ്ണി മുകുന്ദന്‍ എന്നിവരാണ് ട്രെയിലര്‍ സോഷ്യല്‍മീഡിയ പേജിലൂടെ പങ്കുവെച്ചത്.
ലോകസിനിമകളില്‍ പോലും അപൂര്‍വമായി മാത്രം കാണപ്പെടുന്ന മഡ്ഡ് റേസിംഗ് ആസ്പദമാക്കിയുള്ള ഒരു ആക്ഷന്‍ ത്രില്ലറാണ് സിനിമ. അതുകൊണ്ടുതന്നെ ആ ഒരു സസ്പെന്‍സ് ട്രെയ്ലര് കാണുന്ന പ്രേക്ഷകരില്‍ നിറയുന്നുണ്ട്.. ട്രെയിലറിന്‍റെ മറ്റൊരു ആകര്‍ഷണം ചിത്രീകരണത്തിന് ഉപയോഗിച്ചിരിക്കുന്ന വാഹനങ്ങളാണ്.
ചിത്രീകരണത്തിനുള്‍പ്പെടെ അഞ്ച് വര്‍ഷത്തിലധികം ചെലവിട്ടാണ് സിനിമ പൂര്‍ത്തിയാക്കിയിട്ടുള്ളത്. നവാഗതരായ പ്രധാന അഭിനേതാക്കളെ ഓഫ് റോഡ് മഡ് റേസിംഗില്‍ രണ്ട് വര്‍ഷത്തോളം പരിശീലിപ്പിച്ചതിന് ശേഷം ഡ്യൂപ്പുകളെ ഉപയോഗിക്കാതെയാണ് ഈ ചിത്രത്തിന്‍റെ അതിസാഹസിക രംഗങ്ങള്‍ ചിത്രീകരിച്ചിരിക്കുന്നത്. ഈ വരുന്ന ഡിസംബര്‍ 10ന് ലോകമെമ്പാടും 1500ലധികം തീയേറ്ററുകളിലൂടെ ചിത്രം പ്രദര്‍ശനത്തിനെത്തും. കോവിഡ് വ്യാപനത്തോടെ പ്രദര്‍ശനം നീണ്ടുപോയ തികച്ചും വ്യത്യസ്തമായ ഈ ചിത്രത്തിനായ് സിനിമ പ്രേമികള്‍ വളരെ പ്രതീക്ഷയോടെയാണ് കാത്തിരിക്കുന്നത്.
കെ.ജി.എഫിലൂടെ ശ്രദ്ധേയനായ സംഗീത സംവിധായകന്‍ രവി ബസ്റൂര്‍ ആദ്യമായി മലയാളത്തിലെത്തുന്നു എന്നത് ചിത്രത്തെ കൂടുതല്‍ ശ്രദ്ധേയമാക്കുന്നു. രാക്ഷസന്‍ സിനിമയിലൂടെ ശ്രദ്ധേയനായ സാന്‍ ലോകേഷാണ് എഡിറ്റിങ് നിര്‍വഹിച്ചിരിക്കുന്നത്. ഇതുവരെ പുറം ലോകം കണ്ടിട്ടില്ലാത്ത മനോഹരവും, അതിസാഹസികവുമായ ലൊക്കേഷനാണ് ചിത്രത്തിന്‍റെ മറ്റൊരു പ്രത്യേകത. മലയാളം കൂടാതെ തമിഴ്, തെലുങ്ക്, കന്നഡ, ഹിന്ദി, ഇംഗ്ലീഷ് എന്നീ ഭാഷകളിലും മഡ്ഡി ദൃശ്യ വിരുന്നൊരുക്കുന്നുണ്ട് . പുതുമുഖങ്ങളായ യുവന്‍ കൃഷ്ണ, റിദ്ദാന്‍ കൃഷ്ണ, അനുഷ സുരേഷ്, അമിത് ശിവദാസ് നായര്‍ എന്നിവരാണ് പ്രധാന വേഷങ്ങളില്‍ അണിനിരക്കുന്നത്. ഹരീഷ് പേരടി, ഐ.എം.വിജയന്‍, രണ്‍ജി പണിക്കര്‍, സുനില്‍ സുഗത, ശോഭ മോഹന്‍, ഗിന്നസ് മനോജ് എന്നിവരാണ് ചിത്രത്തിലെ മറ്റ് താരങ്ങള്‍.
വിജയ് സേതുപതിയും, ശ്രീ മുരളിയുമാണ് മഡ്ഡിയുടെ മോഷന്‍ പോസ്റ്റര്‍ പുറത്തുവിട്ടത്. ചിത്രത്തിന്‍റെ ടീസര്‍ ബോളിവുഡ് നടന്‍ അര്‍ജുന്‍ കപൂര്‍, ഫഹദ് ഫാസില്‍, ഉണ്ണി മുകുന്ദന്‍, അപര്‍ണ ബാലമുരളി, ആസിഫ് അലി, സിജു വില്‍സണ്‍, അമിത് ചക്കാലക്കല്‍ എന്നീ താരങ്ങള്‍ കഴിഞ്ഞ ഫെബ്രുവരിയില്‍ അവരുടെ സോഷ്യല്‍ മീഡിയ പേജിലൂടെ പുറത്തുവിട്ടിരുന്നു.
Adjust Story Font
16
