അനിയത്തിപ്രാവിലെ ആരും കേൾക്കാത്ത പാട്ടിതാ ..."തേങ്ങുമീ വീണയിൽ പാട്ടുറങ്ങും നേരം"

കേരളത്തിലെ കാമ്പസുകളെ ഇളക്കി മറിച്ച ഫാസിലിന്‍റെ സൂപ്പർഹിറ്റ് ചിത്രം അനിയത്തിപ്രാവിലെ ആരും കേൾക്കാത്ത ഈ പാട്ട് പങ്ക് വെയ്ക്കുകയാണ് സംഗീത സംവിധായകൻ ഔസേപ്പച്ചൻ.

ഈയിടെ അന്തരിച്ച കവിയും ഗാനരചയിതാവുമായ എസ് രമേശൻ നായരോടുള്ള ആദരവിന്‍റെ സൂചകമായിട്ടാണ് ഔസേപ്പച്ചൻ ഈ ഗാനം പുറത്തു വിട്ടത്. അനിയത്തിപ്രാവിനു വേണ്ടി എസ്. രമേശൻ നായർ എഴുതി ഔസേപ്പച്ചൻ സംഗീതം പകർന്ന് യേശുദാസും ചിത്രയും ആലപിച്ച പാട്ടാണിത്.എന്നാൽ ചിത്രത്തിന്‍റെ ക്ലൈമാസിന് മാറ്റം വന്നതോടെ പാട്ട് ചിത്രത്തിൽ ഉപയോഗിച്ചില്ല.

ഔസേപ്പച്ചന്‍റെ കയ്യിൽ ഇക്കാലമത്രയും ഭദ്രമായിരുന്ന ഈ ഗാനം രമേശൻ നായർ വിട വാങ്ങിയപ്പോൾ ആദരവോടെ സംഗീത പ്രേമികൾക്കായി പുറത്തു വിടുകയായിരുന്നു. ചിത്രത്തിലെ നായകന്‍ കുഞ്ചാക്കോ ബോബനും ഫേസ്ബുക്കിലൂടെ പാട്ട് റിലീസായ കാര്യം അറിയിച്ചിരുന്നു.