അനുവാദമില്ലാതെ സെല്‍ഫി എടുക്കാന്‍ ശ്രമിച്ച ആരാധകന്‍റെ കൈ തട്ടിമാറ്റി ഷാരൂഖ് ഖാന്‍; വീഡിയോ
കറുത്ത ജാക്കറ്റും കൂളിംഗ് ഗ്ലാസും വച്ചു എയര്‍പോര്‍ട്ടില്‍ നിന്നും പുറത്തേക്കിറങ്ങുന്ന ഷാരൂഖിനെ വീഡിയോയില്‍ കാണാം
ഷാരൂഖ് ഖാന്‍ മുംബൈ വിമാനത്താവളത്തില്‍
മുംബൈ: അനുവാദമില്ലാതെ സെല്‍ഫി എടുക്കാന്‍ ശ്രമിച്ച ആരാധകന്‍റെ കൈ തട്ടിമാറ്റി ബോളിവുഡ് നടന്‍ ഷാരൂഖ് ഖാന്‍. മുംബൈ വിമാനത്താവളത്തില്‍ വച്ചാണ് സംഭവം. മാനേജർ പൂജ ദദ്‌ലാനിക്കൊപ്പം വിമാനത്താവളത്തിൽ നിന്ന് പുറത്തുപോകുമ്പോഴാണ് ആരാധകനെ സെല്‍ഫി എടുക്കുന്നതില്‍ നിന്നും നടന്‍ തടഞ്ഞത്.
കറുത്ത ജാക്കറ്റും കൂളിംഗ് ഗ്ലാസും വച്ചു എയര്‍പോര്‍ട്ടില്‍ നിന്നും പുറത്തേക്കിറങ്ങുന്ന ഷാരൂഖിനെ വീഡിയോയില്‍ കാണാം. ആരാധകര്‍ക്ക് നേരെ കൈ വീശിയും ഫ്ലൈയിംഗ് കിസ്സെറിഞ്ഞുമായിരുന്നു നടന്‍ കടന്നുപോയത്. ഇതിനിടയിലാണ് ഒരാള്‍ അനുവാദമില്ലാതെ സെല്‍ഫി എടുക്കാന്‍ ശ്രമിച്ചത്. ഷാരൂഖ് ഇയാളുടെ കൈ തട്ടിമാറ്റുകയായിരുന്നു. സംഭവത്തിന്‍റെ സമൂഹമാധ്യമങ്ങളില്‍ വൈറലായിട്ടുണ്ട്. ഷാരൂഖിനെ അനുകൂലിച്ചും എതിര്‍ത്തും നിരവധി പേരാണ് കമന്‍റ് ചെയ്യുന്നത്. ആരാധകരില്ലെങ്കില്‍ താരങ്ങളില്ലെന്നായിരുന്നു ഒരാളുടെ അഭിപ്രായം. എല്ലാവരെയും പോലെ സിനിമാതാരങ്ങളും മനുഷ്യരാണെന്ന് മറ്റൊരാള്‍ കമന്‍റ് ചെയ്തു.
രാജ്കുമാര്‍ ഹിറാനിയുടെ 'ഡങ്കി' എന്ന ചിത്രത്തിലാണ് കിംഗ് ഖാന്‍ ഇപ്പോള്‍ അഭിനയിച്ചുകൊണ്ടിരിക്കുന്നത്. കശ്മീരിലായിരുന്നു ചിത്രത്തിന്‍റെ ഷൂട്ടിംഗ്. തപ്സി പന്നുവാണ് നായിക. ഈ വര്‍ഷം തന്നെ ഡങ്കി റിലീസ് ചെയ്യും. അതേസമയം ആറ്റ്‍ലി സംവിധാനം ചെയ്യുന്ന ഷാരൂഖ് ചിത്രം ജവാന്‍ ജൂണ്‍ 3ന് തിയറ്ററുകളിലെത്തും. നയന്‍താരക്കൊപ്പം വിജയ് സേതുപതിയും ചിത്രത്തില്‍ അഭിനയിക്കുന്നുണ്ട്.
Adjust Story Font
16
