തൊട്ടതെല്ലാം പൊന്നാക്കിയ സംവിധായകനൊപ്പം ഷാറുഖ് ഖാൻ; "ദങ്കി" 2023-ൽ പുറത്തിറങ്ങും

ബോളിവുഡ് സൂപ്പർ താരം ഷാറുഖ് ഖാന്റെ അടുത്തതായി അഭിനയിക്കുന്ന ചിത്രം '3 ഇഡിയട്ട്‌സ്', 'മുന്നാ ഭായ് എം.ബി.ബി.എസ്', 'പി.കെ' തുടങ്ങിയ സൂപ്പർ ഹിറ്റ് ചിത്രങ്ങളുടെ സംവിധായകൻ രാജ് കുമാർ ഹിറാനിക്കൊപ്പം. 'ദങ്കി' എന്ന് പേരിട്ടിരിക്കുന്ന ചിത്രം 2023 ഡിസംബർ 22-നാണ് റിലീസ് നിശ്ചയിച്ചിരിക്കുന്നത്. തപ്‌സി പന്നു ആണ് ചിത്രത്തിൽ നായിക എന്നാണ് സൂചന.

ചിത്രത്തിന്റെ വ്യത്യസ്തമായ അനൗൺസ്‌മെന്റ് വീഡിയോ ഷാറുഖ് ഖാൻ തന്റെ ഇൻസ്റ്റഗ്രാം അക്കൗണ്ടിലൂടെ പുറത്തുവിട്ടു. ഷാറുഖും രാജ്കുമാർ ഹിറാനിയും ഒന്നിച്ചുള്ള വീഡിയോയിൽ സൂപ്പർ താരം സംവിധായകനോട് അവസരം ചോദിക്കുന്നതാണ് ചിത്രീകരിച്ചിരിക്കുന്നത്. കോമഡി, വൈകാരിക രംഗങ്ങൾ, റൊമാൻസ് തുടങ്ങിയവ ഉൾപ്പെടുന്നതാണ് ചിത്രത്തിന്റെ സ്‌ക്രിപ്‌റ്റെന്ന് വീഡിയോയിൽ രാജ്കുമാർ ഹിറാനി പറയുന്നുണ്ട്.

'പ്രിയ രാജ്കുമാർ ഹിറാനി സർ, അങ്ങ് എന്റെ സാന്താക്ലോസ് ആണ്. അങ്ങ് തുടങ്ങിക്കോളൂ, ഞാൻ സമയത്ത് എത്തിച്ചേർന്നോളാം. സത്യത്തിൽ ഞാൻ സെറ്റിൽ തന്നെ താമസം തുടങ്ങും. അവസാനം അങ്ങേയ്‌ക്കൊപ്പം ജോലി ചെയ്യാൻ കഴിഞ്ഞതിൽ വിനയവും അത്ഭുതവും തോന്നുന്നു.' - വീഡിയോ ഇൻസ്റ്റഗ്രാമിൽ പോസ്റ്റ് ചെയ്ത് ഷാറുഖ് കുറിച്ചു. തപ്‌സി പിന്നുവിനെയും തന്റെ ഭാര്യ ഗൗരി ഖാനെയും പോസ്റ്റിൽ ഷാറുഖ് ടാഗ് ചെയ്തിട്ടുണ്ട്.

2003-ൽ സഞ്ജയ് ദത്തിനെ നായകനാക്കി 'മുന്നാ ഭായ് എം.ബി.ബി.എസ്സി'ലൂടെ സംവിധാന അരങ്ങേറ്റം കുറിച്ച രാജ്കുമാർ ഹിറാനി പിന്നീട് സംവിധാനം ചെയ്ത എല്ലാ ചിത്രങ്ങളും സൂപ്പർ ഹിറ്റുകളായിരുന്നു. രണ്ട് ചിത്രങ്ങളിൽ സഞ്ജയ് ദത്തിനെ നായകനാക്കിയ ഹിറാനി ആമിർ ഖാനെ കേന്ദ്ര കഥാപാത്രമാക്കി അവതരിപ്പിച്ച '3 ഇഡിയട്ട്‌സ്', 'പി.കെ' എന്നിവ ബോളിവുഡിലെ എക്കാലത്തെയും വലിയ ഹിറ്റുകളിൽ ഇടംപിടിച്ചു. പിന്നീട്, രൺബീർ കപൂറിനെ നായകനാക്കി സഞ്ജയ് ദത്തിന്റെ ജീവചരിത്ര ചിത്രമായ 'സഞ്ജു'വും ഹിറാനി സംവിധാനം ചെയ്തു.

സംവിധാനം ചെയ്യുന്ന ചിത്രങ്ങളുടെ എഡിറ്റിംഗും സ്വയം നിർവഹിക്കുന്നു എന്ന പ്രത്യേകതയും രാജ്കുമാർ ഹിറാനിക്കുണ്ട്. പി.കെ, സഞ്ജു, സാലാ ഖദൂസ് എന്നീ ചിത്രങ്ങൾ നിർമിക്കുകയും ചെയ്തു. ദങ്കിയിൽ നിർമാണ പങ്കാളിത്തവും ഹിറാനിക്കുണ്ട്.

2018-ൽ പുറത്തിറങ്ങിയ സീറോ ആണ് ഷാറുഖ് ഖാൻ അഭിനയിച്ചതിൽ അവസാനം പുറത്തിറങ്ങിയ ചിത്രം. നമ്പി നാരായണന്റെ ജീവിതത്തെ ആസ്പദമാക്കിയുള്ള 'റോക്കട്രി: ദി നമ്പി എഫക്ട്', 'ലാൽ സിങ് ഛദ്ദ', 'ബ്രഹ്‌മാസ്ത്ര' എന്നീ ഷാറുഖ് അഭിനയിച്ച ചിത്രങ്ങൾ ഈ വർഷം പുറത്തിറങ്ങാനിരിക്കുന്നുണ്ട്. റോക്കട്രിയിലും ലാൽ സിങ് ഛദ്ദയി അതിഥി വേഷത്തിലാണ് ഷാറുഖ് എത്തുന്നത്.

'പത്താൻ', 'ടൈഗർ 3', ആറ്റ്‌ലി സംവിധാനം ചെയ്യുന്ന പേരിടാത്ത ചിത്രം എന്നിവയാണ് 'ദങ്കി'ക്കു മുമ്പായി 2022-ൽ റിലീസ് ചെയ്യുന്ന ഷാറുഖ് ചിത്രങ്ങൾ.