ഇനിയുള്ള വർഷങ്ങളിലും സജി എനിക്ക് വളരെ പ്രിയപ്പെട്ടവനായി തുടരും; ഹൃദയം തൊടുന്ന കുറിപ്പുമായി സൗബിൻ
തന്‍റെ ജീവിതത്തിലെ ഏറ്റവും വെല്ലുവിളി നിറഞ്ഞ അനുഭവമായിരുന്നു കുമ്പളങ്ങി നൈറ്റ്സ് എന്നാണ് സൗബിൻ പറയുന്നത്
കുമ്പളങ്ങി നൈറ്റ്സിന്റെ മൂന്നാം വാര്‍ഷികത്തില്‍ ഹൃദയം തൊടുന്ന കുറിപ്പുമായി നടന്‍ സൗബിൻ ഷാഹിര്‍. ചിത്രത്തില്‍ സജി എന്ന കഥാപാത്രമായിട്ടാണ് സൗബിൻ എത്തിയത്. ഏറെ ചര്‍ച്ച ചെയ്യപ്പെട്ട കഥാപാത്രമായിരുന്നു സജി. തന്‍റെ ജീവിതത്തിലെ ഏറ്റവും വെല്ലുവിളി നിറഞ്ഞ അനുഭവമായിരുന്നു കുമ്പളങ്ങി നൈറ്റ്സ് എന്നാണ് സൗബിൻ പറയുന്നത്.
സൗബിന്‍റെ കുറിപ്പ്
'കുമ്പളങ്ങി നൈറ്റ്സിന്റെ ഭാഗമാകുന്നത് തീർച്ചയായും എന്‍റെ സിനിമാ ജീവിതത്തിലെ ഏറ്റവും അത്ഭുതകരവും വെല്ലുവിളി നിറഞ്ഞതുമായ അനുഭവമാണ്. സജി ആദ്യമായി എന്‍റെ അടുത്ത് വന്നപ്പോൾ, കഥാപാത്രത്തിന്റെ പല ഷേഡുകളും ഞാൻ എങ്ങനെ പുറത്തെടുക്കുമെന്ന് എനിക്ക് തീരെ ഉറപ്പില്ലായിരുന്നു. എന്നാൽ അതിശയിപ്പിക്കുന്ന പിന്തുണയും ടീം വർക്കും കൊണ്ട്, സിനിമ ഞങ്ങൾ പ്രതീക്ഷിച്ചതിലും കൂടുതൽ മാന്ത്രികമായി മാറി. മുഴുവൻ അഭിനേതാക്കളും അണിയറപ്രവർത്തകരുമായി ഇത് എത്ര രസകരമായ അനുഭവമാണ്. ഇനിയുള്ള എല്ലാ വർഷങ്ങളിലും സജി എനിക്ക് വളരെ പ്രിയപ്പെട്ടവനായി തുടരും. എല്ലാ സ്നേഹത്തിനും അഭിനന്ദനങ്ങൾക്കും നന്ദി. ഇത് തീർച്ചയായും ഒരു പദവിയാണ്, ഞാൻ എന്നേക്കും അഭിമാനിക്കുന്ന ഒന്നാണ്.' സൗബിൻ തന്‍റെ കുറിപ്പിൽ പറഞ്ഞു. ''ഇത് 3 വർഷമായി! ഞാൻ വല്ലാതെ തളർന്നിരിക്കുന്നു. എന്നോട് കനിവ് കാണിച്ചതിന് നന്ദി, എന്നെ സ്നേഹിച്ചതിന് നന്ദി. 3 വർഷമായി എന്ന് എനിക്ക് വിശ്വസിക്കാൻ കഴിയുന്നില്ല'' ചിത്രത്തിലൂടെ വെള്ളിത്തിരയില്‍ അരങ്ങേറ്റം കുറിച്ച അന്ന ബെൻ കുറിച്ചു.
നവാഗതനായ മധു സി.നാരായണന്‍ സംവിധാനം ചെയ്ത ചിത്രം 2019 ഫെബ്രുവരി 7നാണ് തിയറ്ററുകളിലെത്തിയത്. ഫഹദ് ഫാസില്‍ ആയിരുന്നു ചിത്രത്തില്‍ വില്ലന്‍ കഥാപാത്രത്തെ അവതരിപ്പിച്ചത്. ഷെയ്ന്‍ നിഗം, ശ്രീനാഥ് ഭാസി, മാത്യു തോമസ്, ഗ്രേസ് ആന്‍റണി എന്നിവരായിരുന്നു മറ്റു കഥാപാത്രങ്ങളെ അവതരിപ്പിച്ചത്. ജനപ്രീതിയുള്ള ചിത്രം, മികച്ച സ്വഭാവ നടന്‍ എന്നീ രണ്ടു സംസ്ഥാന പുരസ്കാരങ്ങളും ചിത്രത്തിന് ലഭിച്ചിരുന്നു.
Adjust Story Font
16
