'കൈയും കാലും എടുക്കുന്നതിലും എളുപ്പല്ലേ തീര്‍ക്കുന്നത്'; ആസിഫ് അലിയുടെ കൊത്ത് ടീസര്‍ വീഡിയോ

ആസിഫ് അലിയെ നായകനാക്കി സിബി മലയില്‍ സംവിധാനം ചെയ്യുന്ന 'കൊത്ത്' സിനിമയുടെ ടീസര്‍ റിലീസ് ചെയ്തു. ആസിഫ് അലിയുടെ പിറന്നാളിനോടനുബന്ധിച്ചാണ് ആദ്യ ടീസര്‍ റിലീസ് ചെയ്തത്. രാഷ്ട്രീയ പ്രതികാരവും കൊലപാതകവും ആണ് ചിത്രത്തിന്‍റെ പ്രമേയമെന്നാണ് ടീസര്‍ നല്‍കുന്ന സൂചന. ഷാനു, സുമേഷ് എന്നീ രണ്ടു ചെറുപ്പക്കാരെ കേന്ദ്രീകരിച്ചാണ് ചിത്രത്തിന്‍റെ കഥാപുരോഗതി. സംവിധായകനും നിര്‍മാതാവുമായ രഞ്ജിത്ത് ചിത്രത്തിലൊരു പ്രധാന വേഷത്തിലെത്തുന്നുണ്ട്. നിഖില വിമലാണ് നായിക.

റോഷൻ മാത്യു, സുരേഷ് കൃഷ്ണ, സുദേവ് നായർ എന്നിവരാണ് മറ്റ് താരങ്ങൾ. അയ്യപ്പനും കോശിക്കും ശേഷം ഗോള്‍ഡ് കോയിൻ മോഷൻ പിക്ചേഴ്സിന്‍റെ ബാനറിൽ രഞ്ജിത്തും പി. എം. ശശിധരനും ചേർന്ന് കൊത്ത് നിർമിക്കുന്നത്. മികച്ച നാടക രചയിതാവിനുള്ള സംസ്ഥാന സർക്കാരിന്‍റെ പുരസ്ക്കാരം ആറു തവണ കരസ്ഥമാക്കിയ ഹേമന്ത് കുമാറാണ് കൊത്തിന്‍റെ തിരക്കഥ ഒരുക്കിയിരിക്കുന്നത്. ഛായാഗ്രഹണം പ്രശാന്ത് രവീന്ദ്രൻ. സംഗീതം കൈലാസ് മേനോൻ. വരികള്‍ ഹരിനാരായണന്‍, മനു മഞ്ജിത്ത്. ചിത്ര സംയോജനം റതിന്‍ രാധാകൃഷ്ണന്‍. എക്സിക്യൂട്ടീവ് പ്രൊഡ്യൂസര്‍ അഗ്നിവേശ് രഞ്‍ജിത്ത്. പ്രൊഡക്ഷന്‍ കണ്‍ട്രോളര്‍ ബാദുഷ.

Summary:The teaser of the movie 'Kothu' starring Asif Ali and directed by Sibi Malayil has been released.