സെമി പോരാട്ടങ്ങള്‍ക്ക് നാളെ തുടക്കം
ക്വാര്‍ട്ടറില്‍ ബ്രസീലിനെ നാട്ടിലേക്ക് കയറ്റിവിട്ടതിന്റെ ആത്മവിശ്വാസത്തില്‍ ബെല്‍ജിയം. ഹസാര്‍ഡും ലുക്കാക്കുവും കെവിന്‍ ഡിബ്രൂണയുമടങ്ങുന്ന മുന്നേറ്റം ടീമിന് നല്‍കുന്ന മുന്‍തൂക്കം ചെറുതല്ല.
ലോകകപ്പ് സെമി പോരാട്ടങ്ങള്‍ക്ക് നാളെ തുടക്കം. രാത്രി 11.30 ന് നടക്കുന്ന ആദ്യ സെമി മത്സരത്തില്‍ ഫ്രാന്‍സ് - ബെല്‍ജിയത്തെ നേരിടും.
ക്വാര്‍ട്ടറില്‍ ബ്രസീലിനെ നാട്ടിലേക്ക് കയറ്റിവിട്ടതിന്റെ ആത്മവിശ്വാസത്തില്‍ ബെല്‍ജിയം. ഹസാര്‍ഡും ലുക്കാക്കുവും കെവിന്‍ ഡിബ്രൂണയുമടങ്ങുന്ന മുന്നേറ്റം ടീമിന് നല്‍കുന്ന മുന്‍തൂക്കം ചെറുതല്ല. കോച്ച് മാര്‍ട്ടിനെസ് റോബെര്‍ട്ടോയുടെ തന്ത്രങ്ങള്‍ കളിക്കളത്തില്‍ ഫലപ്രദമായി നടപ്പിലാക്കുന്നു അവര്‍. ബ്രസീല്‍ തോറ്റതും ആ തന്ത്രങ്ങള്‍ക്ക് മുന്നിലാണ്. 4 ഗോളടിക്കുകയും ഒരു ഗോളിന് വഴിവെക്കുകയും ചെയ്ത ലുക്കാക്കു, 2 ഗോളടിക്കുകയും 2 ഗോള്‍ അസിസ്റ്റ് ചെയ്യുകയും ചെയ്ത ഈഡന്‍ ഹസാര്‍ഡ്, ബെല്‍ജിയത്തിന്റെ പ്രതീക്ഷകളെ ചുമലിലേറ്റുന്നത് ഇവരാണ്.
മറുവശത്ത് സന്തുലിത ടീമാണ് ഫ്രാന്‍സും. മുന്നേറ്റത്തില്‍ എംബാപെയും ഗ്രീസ്മാനും ജിറൂഡുമടങ്ങിയ പ്രതിഭാധനരായ താരങ്ങള്‍. കരുത്തനായ പോള്‍ പോഗ്ബെ മധ്യനിരയില്‍. 3 ഗോളടിച്ച് ഫ്രാന്‍സിന്റെ ടോപ് സ്കോറര്‍മാരായ ഗ്രീസ്മാന്റെയും പത്തൊമ്പതുകാരനായ എംബാപെയുടേയും നീക്കങ്ങള്‍ സെമി കടത്തുമെന്നാണ് ഫ്രാന്‍സിന്റെ പ്രതീക്ഷ. പ്രീ ക്വാര്‍ട്ടറില്‍ അര്‍ജന്റീനയെ മൂന്നിനെതിരെ 4 ഗോളുകള്‍ക്കും ക്വാര്‍ട്ടറില്‍ ടൂര്‍ണമെന്റില്‍ ഒരിടത്തും ഗോള്‍ വഴങ്ങാതെയെത്തിയ യൂറുഗ്വായെ എതിരില്ലാത്ത 2 ഗോളുകള്‍ക്കും തോല്‍പ്പിച്ചാണ് ഫ്രാന്‍സിന്റെ സെമി പ്രവേശം.
ബെല്‍ജിയത്തിന്റെ തന്ത്രങ്ങളും ഫ്രാന്‍സിന്റെ യുവത്വവും ഏറ്റുമുട്ടാനൊരുങ്ങുമ്പോള്‍ ചൊവ്വാഴ്ച സെന്റ് പീറ്റേഴ്സ് ബര്‍ഗ് സ്റ്റേഡിയം കാത്തിരിക്കുന്നത് വീറുറ്റ പോരാട്ടം.
Adjust Story Font
16
