കുവൈത്തില്‍ പാര്‍പ്പിടകാര്യ മന്ത്രിക്കെതിരെ കുറ്റവിചാരണാ നോട്ടീസ്

പാർപ്പിടനയം നടപ്പാക്കുന്നതിൽ മന്ത്രി പരാജയപ്പെട്ടതായും പാർലമെന്റിനെ തെറ്റിദ്ധരിപ്പിച്ചതായും ആരോപിച്ച്​ ശുഐബ് അൽ മുവൈസിരി എംപിയാണ് പാർപ്പിട കാര്യമന്ത്രി യാസർ അബലിനെതിരെ ഗ്രില്ലിങ് നോട്ടീസ് നൽകിയത് .

കുവൈത്തിൽ പാർപ്പിടകാര്യ മന്ത്രിക്കെതിരെ കുറ്റവിചാരണാ നോട്ടീസ് . പാർപ്പിടനയം നടപ്പാക്കുന്നതിൽ മന്ത്രി പരാജയപ്പെട്ടതായും പാർലമെന്റിനെ തെറ്റിദ്ധരിപ്പിച്ചതായും ആരോപിച്ച്​ ശുഐബ് അൽ മുവൈസിരി എംപിയാണ് പാർപ്പിട കാര്യമന്ത്രി യാസർ അബലിനെതിരെ ഗ്രില്ലിങ് നോട്ടീസ് നൽകിയത് .

പൗരന്മാരുടെ പാർപ്പിട പ്രശ്നം കുവൈത്ത് നേരിടുന്ന ഏറ്റവും വലിയ വെല്ലുവിളിയാണെന്ന് ശുഐബ് അൽ മുവൈസിരി കുറ്റവിചാരണക്കു അനുമതി തേടി സമർപ്പിച്ച നോട്ടീസിൽ ചൂണ്ടിക്കാട്ടി . 1993ലാണ് രാജ്യത്തു പാർപ്പിടനിയമം പാസാക്കിയത് . വീടിനു അപേക്ഷ നൽകി കാത്തിരിക്കുന്നവർക്ക് മൂന്നു വർഷത്തിനുള്ളിൽ സർക്കാർ വീട് നിർമിച്ചു നൽകണമെന്ന നിയമം പാർലമെന്റ് പാസ്സാക്കി പതിനഞ്ചു വർഷം പിന്നിട്ടിട്ടും പാർപ്പിട പ്രതിസന്ധിക്കു പരിഹാരംകാണാൻ സാധിച്ചിട്ടില്ല 1,10,000 സ്വദേശികളാണ്​ വീടിനായി കാത്തിരിക്കുന്നത്​. ഇത്​ രാജ്യത്തെ മൊത്തം കുടുംബങ്ങളുടെ പകുതി വരും. വൻകിട ഭവന പദ്ധതികളുമായി ബന്ധപ്പെട്ട്​ മന്ത്രി പാർലമെന്റിൽ അവതരിപ്പിച്ച കണക്കുകളിൽ വൈരുധ്യമുണ്ടെന്നും ശുഐബ് അൽ മുവൈസിരി ആരോപിച്ചു . ജാബിർ അഹ്മദ്​ ഭവന പദ്ധതിയിൽ 600 വീടുകൾക്ക്​ മാത്രമാണ്​ കേടുപാടുള്ളത്​ എന്നാണ്​ മന്ത്രി പാർലമെന്റിൽ വിശദീകരിച്ചത്​. എന്നാൽ, ഹൗസിങ്​ അതോറിറ്റി പുറത്തുവിട്ട റിപ്പോർട്ട്​ പ്രകാരം 4500 വീടുകൾ ക്കു അറ്റകുറ്റപണി ആവശ്യമായിട്ടുണ്ട്​ . തെറ്റായ കണക്കുകൾ നൽകി മന്ത്രി ജനങ്ങളെ തെറ്റിദ്ധരിപ്പിക്കുകയാണെന്നും ഗ്രില്ലിങ് നോട്ടിസിൽ പറയുന്നു. കുറ്റവിചാരണ നേരിടാൻ താൻ തയാറാണെന്നും ഉന്നയിച്ചിരിക്കുന്ന ചോദ്യങ്ങൾക്കെല്ലാം വ്യക്​തമായ മറുപടിയുണ്ടെന്നും മന്ത്രി യാസർ അബുൽ പറഞ്ഞു.മേയ്​ ഒമ്പതിന്​ ചേരുന്ന പാർലമെന്റ്​ യോഗത്തിൽ കുറ്റവിചാരണ പ്രമേയം പരിഗണനക്കെടുക്കു​മെന്ന്​ സ്പീക്കർ മർസൂഖ്​ അൽ ഗാനിം വ്യക്​തമാക്കി.