ഖത്തറുമായി വ്യാപാര ബന്ധം തുടരുന്ന കമ്പനികൾക്കെതിരെ പ്രതികാര നടപടി ഉണ്ടാകില്ലെന്ന്​ സൗദി അനുകൂല രാജ്യങ്ങൾ

ഗൾഫ്​ മേഖലയിൽ തുടരുന്ന പ്രതിസന്ധി തങ്ങളുടെ പ്രവർത്തനങ്ങളെ ബാധിച്ചേക്കുമെന്ന ആശങ്കയാണ്​ ഇതോടെ ഇല്ലാതാകുന്നത്

ഖത്തറുമായി വ്യാപാര ബന്ധം തുടരുന്ന യു.എസ്​ കമ്പനികൾക്കെതിരെ പ്രതികാര നടപടിയൊന്നും ഉണ്ടാകില്ലെന്ന്​ സൗദി അനുകൂല രാജ്യങ്ങൾ. ഗൾഫ്​ മേഖലയിൽ തുടരുന്ന പ്രതിസന്ധി തങ്ങളുടെ പ്രവർത്തനങ്ങളെ ബാധിച്ചേക്കുമെന്ന ആശങ്കയാണ്​ ഇതോടെ ഇല്ലാതാകുന്നത്​.

ഖത്തറിനെതിരെ ഉപരോധ സമാനമായ സാഹചര്യം രണ്ടുമാസം പിന്നിടുന്ന വേളയിലാണ്​ സൗദി അനുകൂല രാജ്യങ്ങൾ യു.എസ്​ കമ്പനികൾക്ക്​ പുതിയ ഉറപ്പ്​ നൽകുന്നത്​. ഇതു സംബന്ധിച്ച്​ സൗദി ഉൾപ്പെടെ നാലു രാജ്യങ്ങൾ യു.എസ്​ സ്റ്റേറ്റ്​ സെക്രട്ടറി റെക്സ്​ ടില്ലേഴ്സണ്​ കത്ത്​ കൈമാറിയതായി വാർത്താ ഏജൻസി വെളിപ്പെടുത്തി. ഖത്തറിൽ വൻതോതിൽ വ്യാപാരം തുടരുന്ന കമ്പനികളോട്​ അതിന്റെ പേരിൽ വിവേചനം പുലർത്തില്ലെന്നും കത്തിൽ സൗദി അനുകൂല രാജ്യങ്ങൾ വ്യക്തമാക്കുന്നു. സമാനമായ ഉറപ്പ്​ യൂറോപ്യൻ രാജ്യങ്ങൾക്കും യുഎ.ഇ നൽകിയതായാണ്​ റിപ്പോർട്ട്​. എന്നാൽ ഇതു സംബന്ധിച്ച്​ ഔദ്യോഗിക പ്രതികരണമൊന്നും ഉണ്ടായിട്ടില്ല.

ഖത്തർ ഉൾപ്പെടെ എല്ലാ ഗൾഫ്​ രാജ്യങ്ങളുമായും ഏറ്റവും മികച്ച വ്യാപാരമാണ്​ യു.എസ്​ കമ്പനികൾ നടത്തുന്നത്​. ഗൾഫ്​ പ്രതിസന്ധി എത്രയും പെട്ടന്ന്​ പരിഹരിക്കാൻ അമേരിക്കയെ പ്രേരിപ്പിക്കുന്ന ഘടകങ്ങളിൽ ഇതും ഉൾപ്പെടും. അടുത്ത മാസം ആറിനാണ്​ കുവൈത്ത്​ അമീർ അമേരിക്കയിലെത്തുന്നത്​. വൈറ്റ്​ഹൗസിൽ യു.എസ്​ പ്രസിഡന്റ്​ ​ഡൊണാൾഡ്​ ട്രംപുമായി നടത്തുന്ന ചർച്ചയിൽ ഗൾഫ്​ പ്രതിസന്ധി പരിഹരിക്കാൻ ഉതകുന്ന ഫോർമുല ഉരുത്തിരിയും എന്നാണ്​ പ്രതീക്ഷ.