അതിർത്തികൾ കൊണ്ട്​ വേർതിരിക്കാൻ കഴിയാത്ത സുപ്രധാന വികാരങ്ങളാണ്​ സ്നേഹവും ഭക്ഷണവുമെന്ന് സാനിയയും ഷുഹൈബും

ദുബൈ കറാമയിൽ 'സ്ഥാൻ' റസ്റ്റോറന്റ്​ ഉദ്ഘാടനം ചെയ്ത ശേഷം മാധ്യമങ്ങളോടു സംസാരിക്കുകയായിരുന്നു ഇരുവരും

അതിർത്തികൾ കൊണ്ട്​ വേർതിരിക്കാൻ കഴിയാത്ത സുപ്രധാന വികാരങ്ങളാണ്​ സ്നേഹവും ഭക്ഷണവുമെന്ന്​ പ്രമുഖ ഇന്ത്യൻ ടെന്നിസ്​ താരം സാനിയാ മിർസയും ഭർത്താവ്​ ഷുഹൈബ്​ മാലികും. ദുബൈ കറാമയിൽ 'സ്ഥാൻ' റസ്റ്റോറന്റ്​ ഉദ്ഘാടനം ചെയ്ത ശേഷം മാധ്യമങ്ങളോടു സംസാരിക്കുകയായിരുന്നു ഇരുവരും.

സ്നേഹത്തെപ്പോലെ രുചി വൈവിധ്യങ്ങളും നാടുകളെ അടുപ്പിക്കുകയും കോർത്തിണക്കുകയും ചെയ്യുമെന്ന്​ സാനിയ മിർസയും ഷുഹൈബ്​ മാലികും അഭിപ്രായപ്പെട്ടു. പ്രണയത്തിൽ ഏറ്റവും അവസാനം മാത്രമാണ്​ തങ്ങൾ രണ്ടു രാജ്യക്കാരാണ്​ എന്ന കാര്യം ചിന്തിച്ചതെന്നും അവർ വ്യക്തമാക്കി.

ഇന്ത്യ, പാകിസ്താന്‍, അഫ്ഗാനിസ്ഥാൻ എന്നീ രാജ്യങ്ങളുടെ തനതു വിഭവങ്ങളും സ്ട്രീറ്റ്​ ഫുഡും ആധികാരികതയോടെ ഒരുക്കി സംസ്കാരങ്ങളുടെ സൗഹാർദ്ദം ലോകത്തിനു പരിചയപ്പെടുത്തുകയാണ്​ ലക്ഷ്യമെന്ന്​ സ്ഥാൻ ഡയറക്ടർ രോഹിത്​ മുരല്യ പറഞ്ഞു. കാബുൾ, പേഷ്​വാർ, കറാച്ചി, ബോംബേ, ഡൽഹി തുടങ്ങിയ നഗരങ്ങളുടെ ഭക്ഷണത്തിനൊപ്പം അവയുടെ സ്വഭാവവും ചര്യകളും സമ്മേളിക്കുന്ന സ്​ഥാനമായി റസ്​റ്ററൻറ്​ മാറും. ഇന്ത്യ പാലസ്​, ഗോൾഡൻ ഡ്രാഗൺ റസ്റ്റോറന്റുകളിലൂടെ കീർത്തി കേട്ട എസ്​.എഫ്​.സി ഗ്രൂപ്പിന്റെ പുതിയ സംരംഭമാണ്​ സ്ഥാൻ. എസ്​.എഫ്​.സി സ്​ഥാപകനും ചെയർമാനുമായ കെ. മുരളീധരൻ, എക്​സിക്യൂട്ടിവ്​ ഷെഫ്​ ഗുനീത്​ സിംഗ്​ തുടങ്ങിയവരും വാർത്താ സമ്മേളനത്തിൽ സംസാരിച്ചു. ദുബൈ ഇന്ത്യൻ കോൺസുൽ ജനറൽ വിപുൽ, സുധീർ കുമാർ ഷെട്ടി, പി.വി. ചന്ദ്രൻ തുടങ്ങിയവരും ഉദ്​ഘാടന ചടങ്ങിൽ സംബന്ധിച്ചു.