പ്രവാസികൾ വൃക്കരോഗങ്ങളെ കരുതിയിരിക്കണമെന്ന് ഡോ.എ.എൻ നാഗരാജ്

ഇത്തരം അവസ്ഥകൾ ഒഴിവാക്കാനും ധാരാളം വെള്ളം കുടിക്കേണ്ടത്​ അത്യന്താപേക്ഷിതമാണെന്ന്​ നാഗരാജ്​ പറഞ്ഞു

പ്രവാസികൾ വൃക്കരോഗങ്ങളെ കരുതിയിരിക്കണമെന്ന് മസ്ക്കറ്റിലെ അപ്പോളോ ആശുപത്രി യൂറോളജി വിഭാഗത്തിലെ ഡോ.എ.എൻ നാഗരാജ്​. വൃക്കയിലെ കല്ലുകൾ പ്രവാസികളിൽ പ്രത്യേകിച്ച്​ പുറംജോലിക്കാരിൽ ധാരാളമായി കണ്ടുവരുന്നുണ്ട്​. ഇത്തരം അവസ്ഥകൾ ഒഴിവാക്കാനും ധാരാളം വെള്ളം കുടിക്കേണ്ടത്​ അത്യന്താപേക്ഷിതമാണെന്ന്​ ഡോ.നാഗരാജ്​ പറഞ്ഞു.

അമിതമായ ​ചൂടിൽ പുറം ജോലിക്കാരുടെ ശരീരത്തിലെ ജലാംശം വേഗത്തിൽ കുറയും. ധാരാളം വെള്ളം കുടിക്കുകയാണ്​ ഏക പ്രതിവിധി. ദിവസം പത്തു മുതൽ പന്ത്രണ്ട്​ വരെ ഗ്ലാസ്​ വെള്ളം എന്ന തോതിൽ മൂന്ന്​ മുതൽ നാലുലിറ്റർ വരെ വെള്ളം ശരീരത്തിന്​ അകത്തുചെല്ലണം. മുതിർന്ന പുരുഷൻമാരിൽ പ്രോസ്റ്റേറ്റ്​ കാൻസർ ബാധക്കുള്ള സാധ്യത കൂടുതലാണെന്നും ഡോ.നാഗരാജ്​ പറഞ്ഞു.

അപ്പോളോ ആശുപത്രിയിലെ ഓർത്തോപീഡിക്ക്​, യൂറോളജി ഡിപ്പാർട്ട്​മെൻറുകളുടെ വിപുലീകരണത്തിന്റെ ഭാഗമായി നടത്തിയ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. ജെനിറ്റോ യൂറിനറി സർജറിയാണ്​ യൂറോളജി വിഭാഗത്തിൽ പുതുതായി ആരംഭിച്ചത്​. സ്പോർട്സ്​ ഇഞ്ച്വറികൾക്കുള്ള വിശദമായ പരിശോധനയും ചികിൽസയുമാണ്​ ഓർത്തോപീഡിക്ക്​ വിഭാഗത്തിൽ ഏർപ്പെടുത്തിയത്​. ജർമനിയിൽ നിന്നുള്ള മുതിർന്ന ഓർത്തോപീഡിക്സ്​ ആന്റ്​ ട്രോമറ്റോളജി കൺസൾട്ടൻറ്​ ഡോ. വ്ലാദ്​മിർനെക്കിന്റെ സേവനമാണ്​ ഇതിനായി ലഭ്യമാക്കുക.