വിസ പുതുക്കുന്നതിന്​ അനുമതിപത്രം; കുവൈത്തിലെ മലയാളികൾ ഉൾപ്പെടെയുള്ള എൻജിനീയർ ബിരുദധാരികൾ പ്രതിസന്ധിയില്‍

പുതിയ നിബന്ധന മൂലം നിരവധി പേർക്ക് ഇഖാമ പുതുക്കാൻ കഴിയാത്ത സാഹചര്യമാണ് നിലവിലുള്ളത്

വിസ പുതുക്കുന്നതിന്​ എഞ്ചിനീയേഴ്സ് സൊസൈറ്റിയുടെ അനുമതി പത്രം വേണമെന്ന നിബന്ധന വച്ചതോടെ കുവൈത്തിലെ മലയാളികൾ ഉൾപ്പെടെയുള്ള എൻജിനീയർ ബിരുദധാരികൾ പ്രതിസന്ധിയില്‍ . പുതിയ നിബന്ധന മൂലം നിരവധി പേർക്ക് ഇഖാമ പുതുക്കാൻ കഴിയാത്ത സാഹചര്യമാണ് നിലവിലുള്ളത്. വിഷയത്തിൽ അടിയന്തരമായി ഇടപെടണമെന്ന് കുവൈത്തിലെ ഇന്ത്യൻ എൻജിനീയർമാർ എംബസിയോട്​ അഭ്യർഥിച്ചു.

യോഗ്യത ഉറപ്പാക്കുന്നതിനാണ് എൻജിനീയർമാരുടെ ഇഖാമ പുതുക്കുന്നതിനു മാൻപവർ അതോറിറ്റി പുതിയ നിബന്ധന വച്ചത് . എൻജിനീയേഴ്സ്​ സൊസൈറ്റിയുടെ എൻഒസി വേണമെന്നാണ് നിബന്ധന. കുവൈത്ത്​ എൻജിനീയേഴ്സ്​ സൊസൈറ്റിയിലെ അംഗത്വ കാർഡോ അവർ നൽകുന്ന എൻ.ഒ.സിയോ സമർപ്പിച്ചാൽ മാത്രം എൻജിനീയറിങ്​ വിസ പുതുക്കിക്കൊടുത്താൽ മതിയെന്നാണ്​ തീരുമാനം. എൻജിനീയറിങ്​ ബിരുദം നേടിയ കോളജിന്റെ അംഗീകാരവും ഗ്രേഡും ഉൾപ്പെടെ പരിഗണിച്ച്​ മാത്രമാണ്​ എൻജിനീയേഴ്സ്​ സൊസൈറ്റി എൻ.ഒ.സി നൽകുന്നത്​. ഇന്ത്യയിൽ നാഷനൽ ബോർഡ്​ ഓഫ്​ അക്രഡിറ്റേഷന്റെ അംഗീകാരം അടിസ്ഥാനമാക്കിയാണ്​ എൻ.ഒ.സി നൽകുന്നത്​.

കേരളത്തിൽനിന്ന്​ 18 കോളജുകൾ മാത്രമാണ് ലിസ്റ്റിലുള്ളത്​. നൂറിലേറെ വരുന്ന അഫിലിയേറ്റഡ്​ കോളേജുകളിൽ നിന്നും പഠിച്ചിറങ്ങിയ എൻജിനീയർമാർ അംഗീകാരമില്ലാത്തവരായി വിസ പുതുക്കാനാവാതെ മടങ്ങേണ്ടി വരുന്ന സാഹചര്യമാണ് നാക്​ അക്രഡിറ്റേഷൻ ഉള്ള കോളേജുകൾ പോലും മതിയാവില്ല എന്നതാണ്​ അവസ്ഥ. കുവൈത്ത്​ എൻജിനീയേഴ്സ്​ സൊസൈറ്റിയിൽ രജിസ്റ്റർ ചെയ്യുന്നതിന്​ പരീക്ഷയുൾപ്പെടെ കടുത്ത നിബന്ധനകളുമുണ്ട്​. 70 ദീനാറാണ്​ പരീക്ഷാ ഫീസ്​. പ്രതിവർഷം 20 ദീനാർ അംഗത്വം പുതുക്കാൻ നൽകണം. സബ്സ്​ക്രിപ്ഷൻ ഫീസായി 30 ദീനാർ വേറെയും നൽകണം. കഴിഞ്ഞ ദിവസങ്ങളിലെ എൻജിനീയേഴ്സ്​ സൊസൈറ്റി ആസ്ഥാനത്ത്​ വൻ തിരക്കാണ്​ അനുഭവപ്പെട്ടത്​. കമ്പനികൾ എൻജിനീയർമാരോട്​ അടിയന്തരമായി എൻജിനീയേഴ്സ്​ സൊസൈാറ്റിയിൽ രജിസ്റ്റർ ചെയ്യാനും അംഗത്വം പുതുക്കാത്തവരോട്​ പുതുക്കാനും ആവശ്യപ്പെട്ടിട്ടുണ്ട്​.