അധിക തുക ഈടാക്കാനുള്ള തീരുമാനം; വിശദീകരണവുമായി ഇന്ത്യൻ സ്കൂൾ ഡയറക്ടർ ബോർഡ്​ ചെയർമാൻ

അനിവാര്യമായ വികസന പ്രവർത്തനങ്ങൾക്കായുള്ള ഫണ്ട്​ സ്വരൂപിക്കുന്നതിന്റെ ഭാഗമായാണ്​ തുക ഈടാക്കാൻ തീരുമാനിച്ചതെന്ന്​ ചെയർമാൻ വിൽസൺ.വി.ജോർജ്​ 'മീഡിയാവണി'നോട്​ പറഞ്ഞു

ഒമാനിലെ ഇന്ത്യൻ സ്കൂളുകളിൽ പുതുതായി പ്രവേശനം തേടുന്നവരിൽ നിന്ന്​ അധിക തുക ഈടാക്കാനുള്ള തീരുമാനത്തിൽ വിശദീകരണവുമായി ഇന്ത്യൻ സ്കൂൾ ഡയറക്ടർ ബോർഡ്​ ചെയർമാൻ. അനിവാര്യമായ വികസന പ്രവർത്തനങ്ങൾക്കായുള്ള ഫണ്ട്​ സ്വരൂപിക്കുന്നതിന്റെ ഭാഗമായാണ്​ തുക ഈടാക്കാൻ തീരുമാനിച്ചതെന്ന്​ ചെയർമാൻ വിൽസൺ.വി.ജോർജ്​ 'മീഡിയാവണി'നോട്​ പറഞ്ഞു.

അടിസ്ഥാന സൗകര്യ വികസന ഫണ്ടിനത്തിൽ ക്യാപിറ്റൽ മേഖലയിലെ സ്കൂളുകളിൽ നൂറ്​ റിയാലും മറ്റ്​ പ്രദേശങ്ങളിൽ അമ്പത്​ റിയാലും തിരികെ ലഭിക്കാത്ത നിക്ഷേപമായി ഈടാക്കാനുള്ള ബോർഡ്​ തീരുമാനത്തിനെതിരെ വ്യാപക പ്രതിഷേധ മുയർന്നിരുന്നു. ഈ സാഹചര്യത്തിലാണ്​ ബോർഡ്​ ചെയർമാന്റെ വിശദീകരണം.

സ്കൂളുകളില്‍ കാലാകാലങ്ങളിൽ പുതുക്കി വരുന്ന ഫീസ് ഘടനയാണ്​ നിലവിലുള്ളത്​. ക്യാപിറ്റൽ മേഖലയിലെ സ്കൂളുകളിൽ മൂവായിരത്തിലധികം വിദ്യാർഥികളാണ്​ വൈകുന്നേരത്തെ ഷിഫ്റ്റിൽ പഠിക്കുന്നത്​. ഈ വർഷാവസാനം അൽ അൻസാബിൽ പുതിയ സ്കൂൾ തയാറാവുന്നതോടെ വൈകുന്നേരത്തെ ഷിഫ്റ്റുകൾ ഇല്ലാതാകുമെന്നും വില്‍സണ്‍ വി.ജോര്‍ജ് അറിയിച്ചു.