ഒമാനിലെ റോഡുകള്‍ അപകടാവസ്ഥ കുറഞ്ഞതും സുരക്ഷിതവുമെന്ന്​ സര്‍വെ

ഒമാൻ ഖത്തർ ഇൻഷൂറൻസ്​ കമ്പനിക്ക്​ വേണ്ടി യുഗോവ്​ ആണ്​ സർവേ നടത്തിയത്​.

ഒമാനിലെ റോഡുകൾ പൊതുവെ അപകടാവസ്ഥ കുറഞ്ഞതും സുരക്ഷിതവുമെന്ന്​ സർവേ ഫലം. ടെയിൽഗേറ്റിങ്​, അശ്രദ്ധമായ ഡ്രൈവിങ്​, പെട്ടന്ന്​ ലൈൻ മാറൽ, അമിത വേഗത തുടങ്ങിയവ ഒമാൻ ​റോഡുകളിൽ കുറഞ്ഞതായും വിവിധ വിഭാഗങ്ങളിൽ പെട്ടവരുടെ ഡ്രൈവിങ്​ ശീലങ്ങളെ കുറിച്ച്​ നടത്തിയ 'ഒമാൻ റോഡ്​ സേഫ്റ്റി മോണിറ്റർ' എന്ന സർവേ ഫലം അഭിപ്രായപ്പെടുന്നു.

ഒമാൻ ഖത്തർ ഇൻഷൂറൻസ്​ കമ്പനിക്ക്​ വേണ്ടി യുഗോവ്​ ആണ്​ സർവേ നടത്തിയത്​. സർവേയിൽ പങ്കെടുത്ത 59 ശതമാനം ഡ്രൈവർമാരും കഴിഞ്ഞ ആറുമാസത്തിനിടെ ഒരിക്കലെങ്കിലും പരമാവധി വേഗതയായ 120 കിലോമീറ്ററിൽ വാഹനമോടിച്ചിട്ടുണ്ട്​. പത്ത്​ ശതമാനം പേരാകട്ടെ നിയമപ്രകാരമുള്ള വേഗതാ പരിധി നിരവധി തവണകളിൽ മറികടന്നിട്ടുണ്ട്​.

ഒമാനിലെ റോഡ്​ സൗകര്യം മെച്ചപ്പെട്ടതായി അഭിപ്രായപ്പെട്ടത്​ 81 ശതമാനം പേരാണ്​. കൂടുതൽ റോഡ്​ സൗകര്യവും ഉയർന്ന നിലവാരവും സുഖകരമായ ഡ്രൈവിങ്ങ്​ അനുഭവം വർധിപ്പിച്ചതായി 63 ശതമാനം പേരും ചൂണ്ടികാട്ടി. 36 ശതമാനം പേരുടെ അഭിപ്രായത്തിൽ അപകടകരമായ ഡ്രൈവിങ്​ ഏറെ വർധിച്ചിട്ടുണ്ട്​. ഉയർന്ന വേഗതയെ കുറിച്ച ചോദ്യത്തിന്​ 121നും 140 കിലോമീറ്ററിനുമിടയിൽ വാഹനമോടിച്ചതായി 33 ശതമാനം പേർ അഭിപ്രായപ്പെട്ടു. 160 കിലോമീറ്റർ വരെ വേഗതയെടുത്തവർ 14 ശതമാനം പേരാണ്​. 161 കിലോമീറ്റർ മുതൽ 200 കിലോമീറ്റർ വരെ വേഗതയെടുത്തതായി അഭിപ്രായപ്പെട്ടതാകട്ടെ 12 ശതമാനം പേരാണ്​. ദേശീയ സ്ഥിതി വിവര മന്ത്രാലയത്തിന്റെ കണക്കനുസരിച്ച്​ ഈ വർഷത്തിന്റെ ആദ്യ മൂന്ന്​ മാസങ്ങളിൽ വാഹനാപകടങ്ങളുടെ എണ്ണത്തിലുണ്ടായത്​ 28.8 ശതമാനത്തിന്റെ കുറവാണ്​.